2 Goriinto 9 - Bibliyeeda Ghaydit

Weeta fuga Gristo

¹ Asi ghamneawa ghwaraanya aba heedeanyu gideaba geang'oorneegwa iita haleanjeeda sisapa geadi jea eataw fuga ghaydidi,

² aba gideaba ghaanali gidoowoosti hidaat, ak ghaaghwari geaw aba badahuukeagwa aba heeda fuga Makedoniya, nea gideaba fuga Akaya ea hidaat ghang'eada indeara; iidu gidoogasayi ea niimajeek fuga saang'a mwaatkwa.

³ Iidu geajeagu fuga eaduupcheewi ak abeeda ea moawa ghwaroodeanya bwaageat aba badahuukeagwa gidamwadaagha aba ng'asheanji, ak abeeda goowooschi hidaat, gawuurji gidearukuteaydi jea awuurjeewana;

⁴ amadu nea ghaawunyi nea geadeani fuga Makedoniya, ak ghaahidu nea moowoosi hidaat, gajeapwaaspwaaseasa, ak abeeda ea mwajeamuusa eerukuna gil aba badahuukeagwa, aba damani sindi jeeda masaweegean.

⁵ Hean ghaadaayi gideaba ghwadoabiiw reekusiinda fuga eaduupcheewi ak ghwahidu heedeang'wa gooshooynanean, ak gabean gwasin gidida sigu ghayi ooheeleesiin, ak gagasa ea hidaat ak ea mawuurji gissidiing'sa gawuurji gissiitaydaawa masooda.

⁶ Asi gaydargu ng'asheanji: siida hista gea ng'ay gayghwalach gea ng'ay, nea siida histeawa inyeanda jeeda gayghwalaja inyeanda jeeda.

⁷ Daba siisi sinda gadiyeeda gidagasiida aba uhuudaanyi, adagwasin nea magassa ghana eediing'sa, aba gideaba ASEETA ghabwariiy siidida adayiida haleanjeeda aba jeedeeshiin.

⁸ Nea ASEETA ghoamu ghoanyiideagwa ghawooda, ak abeeda goondeawi agooga heeluutka haleanjeeda sean aba galeagasean abeeda ghoanyiideagwa muuchi aba giliwas gadiya miy.

⁹ Gawuurji gissing'oarda bea gideaba, “Niidaarda, ak ghoadaw fuga barbari; doobiiwnataanyi gayghwashng'u damanda manda muudeanooda”.

¹⁰ Nea siida adaw mbeeyooda siida jea gwahista ak ghoah mukaate ghoah hamita gaygagooneegwa ak gwalakuuneegwa haleanjeeda ak ghwanung' ghoahaada booga aba doobiiwnateang'wa,

¹¹ Gajeenung' abaruura aba naweadinga sean abeeda gwanyeaniidi jeesingeagwa muuchi, nea aba naweedeanya gayghoadaw ASEETA badiischooda;

¹² aba gideaba gadiyeeni maygabeachi gideaba gayghaweat fuga ghaydidi aba gidagasa, gayghwanung' gabadiischeesa buuneeda ASEETA muuchi ea ghwanaawda.

¹³ Aba simsimdeaba gadiyeeni, gajoakghaambiida ASEETA aba mureedeang'wa aba masooda Giijasta miy bea Gristo, ea aba badayda inyeanda jeesingeagwa oatawji saawa ea buuneesean;

¹⁴ nea saawa ghamwaash ASEETA muuchi aba badahuukeagwa, aba dagheerjeanduumeeda naawda mida jeedeang'wa.

¹⁵ Eebadiischeesiina ASEETA aba gidagooneasa mwoamu usi rukunoodean!