2 Goriinto 8 - Bibliyeeda Ghaydit

Inyeanda jeeda fuga Gristo

¹ Fuga eaduupcheewi, geegasayi anala dagheerjeanduumeeda ASEETA ghayi siihiimu aba jeesinga ganiisajeega Makedoniya,

² nea aba jeeda simsimda ng'waan ea sawanadeeda, hean aba hawunda hooseaneega nyaawa ea barbaranyeeka nyaawa raanya ea nibaruur muuchi nea goobal geat aba meatkweeda nyaawa.

³ Ak ghoadayda aba gida amuusta, ak gaydamuuwu, ea ghwanaawda, aba gidagasiida saawa,

⁴ gamuseasa muuchi eataw gheata jea goobareanyi gadiyeani bea weeta fuga ghaydidiin–

⁵ nea nih ea mii gidasirardi gil, aba mwadi ghanyi ghoadaw geat Ng'utamiida ea biissa aseasa aba gidagasiida ASEETA.

⁶ Iidu geamiinyi gheang'da Dito nea geegasayi gawuurji gidaghayi bean ghoang'eata, gagasa ghoahiit aba jeedeang'wa gadiyeeni mideawa dagheerjeanduumeedean.

⁷ Ghamneawa iyoang'aldi aba haleanjeeda sean aba masaweega, ea rukunooda, ea fughareeda, aba jeeda gurooroosean, ea aba jeeda bariinyeegeagwa aba heedeanya, asikteawana gideaba ghoang'aldi aba gadiyeeni bea dagheerjeanduumeedean.

⁸ Asi gearugu ng'asheanji nea mii gideaba geagoonyi diigheanda, geagasayi asikteawana aba dagheerjeanduumeeda buuneeda suurja ak abeeda bariinyeegeagwa earada gaygaba huumwa.

⁹ Aba gideaba noanali dagheerjeanduumeeda Ng'utamiideanya was Yesu Gristo, earapeadi baruuriin, hean ghabwarbwariit aba badahuukeagwa, ak abeeda aba barbarandaanyi ghoahuuyi baruurji.

¹⁰ Nea aba badaydeaba ng'asheanji gaydagooneegwa badiida: ghwahit muuchi ghamneawa aba heedeang'wa giihiiteaba gidida gweayda heeta ng'ataan ak ea meakghusa sinooda gibwadi gasooda,

¹¹ asi aba gidoowoosti hidaat aba gidoogasiidi gagasa gweateayi sea gidoahiiti aba jeeda haleanjeeda oondeawi.

¹² Aba gideaba iinyo gwanda hidooda, abeeda gajeamwas aba gidida mideawa siidean, nea mii aba gidida mandeawanean.

¹³ Aba gideaba mearukuni ng'asheesu ak abeeda ghwanyas fuga mwaatkwa hooseaneega nea ghoanyaschi agooga sawanadeeda,

¹⁴ iidu aba ng'asheega giiyang'deayeeda aba haleanjeedeang'wa ghamneawa oondeawi saang'a gagasa ghaweat fuga gasa, ak abeeda haleanjeeda saang'a mideawa ghaweadeagwa iyoogasayi, ak abeeda gaygwanda giiyang'deayeeda.

¹⁵ Gawuurji gissing'oarda gideaba, “Siida awaam ea ghwasaang'ayiit maburda gil, nea dea awaam gea ng'ay mwasuunyeawana gil.”

Dito sea bareandaanyi

¹⁶ Gagasa eebadiischeesa ASEETA iin jeeda Dito gassoodida eandeawi aniini aba weeteang'wean.

¹⁷ Aba gideaba niny makghusa ging'ooyda ng'asheandeanya, niny abeeda gagasa muuchi hinnooda heedeang'wa aba uhuudaanyi.

¹⁸ Hean geecheagu niny sea orjeediyya nigeawiit iita aba rukwiideayda Giijasta miy aba jeesinga ganiisajeega seaniin;

¹⁹ ak ea meakghusa nih ak ghwahit, niny ghwaloat ganiisajeega ak geanung' eeteayeewana damanda sibeawi eesinana gadiyeedeanya bea bariinyeega, aba giigheambiita Ng'utamiida ak ghoah gwadeagooda gidida miy gasa jeesingaasaan.

²⁰ Ak ea meagassi gideaba gaygwarukuna sih badahuukaasa ng'asheega munyas aba badayda giimuusta sigu ak gang'ula gisilachiida haleanjeeda,

²¹ nea geesheedi ghanyi eapkaada ng'asheega miyaas, nea mii aba madeeda Ng'utamiida gil ak ghwahit, eara aba madeeda buuneeda.

²² Hean geecheagu sea saawa orjeediyya nigeawiit eesimsim ak geadaayi gideaba ea hidaat aba haleanjeeda saang'a, ak ghamneawa ea hidaat muuchi ea ghang'alda aba badayda masaweagaaschi adareamshi aba heedeang'wa.

²³ Asi aba iita Dito, niny bareanyeandeanyu ak ea siida easinuudayeewi gadiyeeda aba badahuukeagwa gil; nea gabiissa gagasa iita fuga siduupcheewi, saawa fuga ajeagu ganiisajeega, ak ea giigheambiita Gristo gil.

²⁴ Asi oahiimda aba madeeda ganiisajeega, bariinyeegeagwa ea gissighwardi geat aba badahuukeagwa aba heedeaba fiisu.