2 Goriinto 7 - Bibliyeeda Ghaydit

¹ Iinukwa geandeawi heeleesiini fugeasu aabwariinyi, abeeda ghang'wana geehuunyi geat aba ririnyoojiga sean bea saseeda ea guroorooda nea geemajeekchi ghaydidanda aba gheawalmeeda ASEETA.

Hooseaneega Bawlo

² Ajaaneasa gurooruunatkeagwa, aba gideaba miyeetiiysiina eara sih, ak ea miyeeng'ala sih seawshooda, ak ea miyeenyagaada aba hichpa sih.

³ Aniini mearukuni ng'asheanji aba girgweaksiindeang'wa, aba gideaba neabay dargu aba mwadi gideaba agooga goondi jeeda gurooruunatkaasa, iisimeewuudayi ghana iisindeayi.

⁴ Ak geandeawi muraneanduumeeda haw aba badahuukeagwa; ak gaydaghwar geaw muuchi aba badahuukeagwa; ak ea naanyaschi hawdeayda. Eara aba sawanaduutkaasa, aniini geahoosanyi muuchi.

⁵ Nea eara damanda sihitaawi Makedoniya, ghanyea mwanyasa sasanuukaasa hawdeayda geanyaschi sawanaduutka aba gheatkweaka sean ak geeng'uchi aba bwadaw, nea jih gwanda muuwda.

⁶ Nea ASEETA, geaniida salgheang'da fuga giisan, gageanda salgheang'deanya aba hinnooda Dito,

⁷ ak ea meakghusa hinoadaanyi ghabwada geandeayda salgheang'da gawuurji gidaghayi oogeandeaydi salgheang'daanyi, gawuurji girukuneasa bea gidoogasiidi, ea gidoogiisandi, ea gidoogasiidi weeteanyu, ak abeeda geahoosanyi muuchi.

⁸ Aba gideaba earapeadi naanyareascheegwa aba barawajeandeanyu, maydagiisan aba gili (earapeadi neagiisanyi aba giliin,) aba gideaba ghaadaayi gideaba barawajeandida niinyareaseagwa, earapeadi gheadi nuwaasi.

⁹ Aba giduurji, neahoosanyi, nea meakna gideaba googiisanyi agooga, gweagu gideaba geanung' agiisana ea eanung' aduukuunana; aba gideaba googiisandi fuga bada ASEETA, ak ea mwaageagwa lugooda aba badahuukaasa.

¹⁰ Aba gideaba giiseaneega fuga bada ASEETA iissa gweadu duukuunooda eadu lealeanooda ak ea manda gichea ghwanung' giisana, nea giiseaneega muunda ng'eanyiida gaygweadu miyeeda.

¹¹ Asi ang'ula badiini bea fuga bada ASEETEAN gaygwanyakneegwa naaha agooga, ak ea gassoomba naaha bea furoodeaba geediin, nih ana nyaras gil, nih hirbabandeemba naaha, bariinyeespa naaha, giidaydeaydeaba geaw bea naaha, ghoorjoomba naaha! Aba gheatkweaka sean noahiimu geat gideaba moondeawani ramaseamba gil aba ng'asheanji.

¹² Asi earapeadi eang'oorneegwean, mwaang'waari aba badaydeaba siidida adiiyiin, ak ea maba badaydeaba siidida siitiysean, geebaysiina gideaba bariinyeegeagwa aba heedeanya gajeataajiit aba heedeang'wa aba madeeda ASEETA.

¹³ Asi geegeandeawaneasa salgheang'da. Nuut aba geandeayda sigeandeawaneasa salgheang'da geehoosanyi muuchi aba hooseaneega Dito, aba gideaba fughareadaanyi noanung'unyi oogasean gafuuf.

¹⁴ Aba gideaba iyaaghwarji geaw aba madeadaanyi aba ng'asheanda wassean aba badahuukeagwa, ea maydabwaspwas; gaygawuurji haleanjeeda sean sirukuneegwa huumwa gil, ak eara ghwaroodeang'wa bea geat aba madeeda Dito ea niiw huumwa.

¹⁵ Nea gurooroadaanyi iissa gwarita damanyooji sean aba badahuukeagwa, iyapkaat mureedeang'wa bea oogasean, ea muuwda ea boodanda damanda oang'waanyi niny.

¹⁶ Geahoosanyi, aba gideaba geandeawi masaweega muuchi aba badahuukeagwa.