2 Goriinto 13 - Bibliyeeda Ghaydit

Reekusiinda huuydean ea giighata

¹ Nih deaba samwagu gil aba wunooda aawunyi heedeang'wa. Giidiinyeanda wassean gayghwadaajiit aba ghuusispa muushoodi iyeenya ghanea samwagu.

² Asi geareekusi fugiga ghayi sin riing'eeda amwadiin sea buuneesean, ak ghamneawa geareekusi saawa eara ea meandani hiji, gawuurji gidaghayi easindi damanda eandeawi hiji aba bareanoodeanyu bea iyeenya, bea gideaba iyaawunyi gicha ea maydaaghu saawa–

³ iidu nea googaseadayi asikteawana gideaba Gristo balool aba jeedeanyu. Niny mii ng'arng'ar aba heedeang'wa, niny gwandeawa uurda aba jeesingeagwa.

⁴ Aba gideaba niny ghayi geengoor aba jeeda ng'arng'aranda, ak goobiideewa uurda ASEETA. Nea geawooschi ng'arng'ari aba badaydeaba niny, amadu nea gagadiyeeseegwa gajeendeayeena sea niny aba uurda ASEETA.

⁵ Asi asawsiina geat agooga, adaaha ea ghoang'waanyi masaweegeagwa. Asima geat, agooga. Ghana moanali agooga gideaba Yesu Gristo gwanda jeesingeagwa? Geaghus aba huumwa araanya gideaba gajeesimeegwa!

⁶ Ak ghaararji gideaba gajanala gideaba aseasa miyeeraanya.

⁷ Iidu geamoashchi ASEETA ea moosini ng'asheanda muy, mii gideaba geegasayi eadaheasa gideaba sisimeasa gil, geegasayi asina ng'asheanda doabiiw, earapeadi siwuurjeewi aseasa fuga raay.

⁸ Aba gideaba mwoamu usi eesina ng'asheanda wassean yamuuji sea huumeanda, geaghus eesina ng'asheanda was huumeanda.

⁹ Aba gideaba geehoosanyi iisiwooschi ng'arng'ari ak goondeawi agooga uurda. Gissimwaashchi ASEETA gideaba gagasa amajeegiita.

¹⁰ Ghaang'waarji barawajeanji nea geawooschi sheageewaneegwa, nea geabaysiini gideaba iyaawunyi ea mwaang'waaniidi aba uurdeanyu bea gheambalmeeda ghayi goonan Ng'utamiida jea dadeekna nea mii dea nyarjeawda.

¹¹ Aba huuydeanda, abeaha seayu fuga eaduupcheewi. Asina naweadingeagwa, ayiinya gideargu, daba siisi mwas nuut, abeaha weayda, ak abeeda ASEETA mideawa bariinyeega ea weayda gaygoobiida heedeang'wa.

¹² Ookata geat aba samoodeaba geat ghaydit.

¹³ Ghoaghadeagwa fuga sean ghaydidi.

¹⁴ Dagheerjeanduumeeda Ng'utamiida was Yesu Gristo, ea bariinyeega ASEETA ea bareanyeeda Guroorooda Ghaydit gagasa andeawana oogasean.