1 Yohaana 2 - Bibliyeeda Ghaydit

Gristo dea jea ghaweadeasa gil

¹ Diibigeasu manang'i, geang'oorneegwa ng'asheesu ak abeeda ea moosini riing'eeda; ama mida siida nisin riing'eeda, abeeda geandeawi siida ghuuteanya aba heeda Bwaabwa nea Yesu Gristoyda doabiiwaat gil;

² nea niny ea siida jea ghoadayda leadeeda riing'eegaasa, ak ea meakghusa gaasa ak ghwahit eara riing'eega muunda ng'eanyiisean.

³ Aba badaydeaba nih abeeda geanali gideaba geanali niny, iisiing'waanyi diigheanyeekaaschi.

⁴ Nea dea eena, “Ghaanali niny” nea gafool diigheanyeekaaschi gabang'uya, ak eara huumeanda ea manda jeadaanyi;

⁵ nea siida wassean ang'waay ng'asheandaanyi, aba jeadaanyi niny bariinyeega huumwa bea ASEETA ea majeek. Aba jeedeaba nih geanali gideaba geendi jeadaanyi:

⁶ siida eena gwanda jeedeaba niny gammiisa gideaba gayghabeada gidabeada niny.

⁷ Fuga aabwariinyi, meang'oorneegwa digheandeesh, nih diigheanda ghayi bea garayi ghayi oayiinyi amwadiin gil; diigheandeaba waas ng'asheanda ghayi oayiinyini.

⁸ Ak geang'oorneey digheandeesh bea huumwa aba jeadaanyi ea jeedeang'wa, aba gideaba misaneeda ning'ata ak ea niiboong'u weeshinda huumwa.

⁹ Siida eena geandi jeeda weeshinda, nea ghwasit orjeeda ghaamwat gwanda jeeda misaneeda eara ghamneawa.

¹⁰ Nea siida bwariiy orjeeda ghaamwat, siisi gwanda jeeda weeshinda, nea aba jeadaanyi ea manda ng'asheanda jea gweadu rusooda.

¹¹ Nea siida sit orjeeda ghaamwat gwanda jeeda misaneeda ak gwaneayeewa jeeda misaneeda ak ea mwanala heeda gal, aba gideaba nidukuta gheanyangaaschi misaneeda.

¹² Geang'oorneegwa agooga, diibiga manang'i, aba gideaba sisamsa riing'eegeagwa, aba badaydaanyi.

¹³ Geang'oorneegwa agooga, ghweaniga, aba gideaba noanali ninyeeda ghayi bean ghang'eada giing'eeta. Geang'oorneegwa agooga, gheareemanga, aba gideaba noajoarji diita muyiin. Geang'oorneegwa agooga, diibiga aba gideaba noanali Ghweanda.

¹⁴ Neang'oorneegwa agooga ghweaniga, aba gideaba noanali ninyeeda ghayi bean ghang'eada giing'eeta. Neang'oorneegwa agooga gheareemanga, aba gideaba goondeawi uurda, nea goobiida ng'asheanda ASEETA jeedeang'wa, ak ea noataraamnyi diita muyiin.

¹⁵ Adoabwariinyi ng'eanyiida ea haleanjeeda mida muunda ng'eanyiida. Aba gideaba siida bwariiy ng'eanyiida, bariinyeega Ghweanda ea manda jeadaanyi.

¹⁶ Aba gideaba haleanjeeda sean mida muunda ng'eanyiida, was haleanjeeda gasa saseeda ea haleanjeeda gasa gheanyanga ea ghwarjeeda eaweega, suh maleapna heeda Ghweanda, gwaleabu heeda ng'eanyiida.

¹⁷ Ak ng'eanyiida gayghang'ata sea ng'asheagaaschi bea geawunda gheang'da; nea deasina gidagasiida ASEETA gaygoobiida ea ghoah damanda manda muudeanooda.

¹⁸ Diibiga, nih damanda huuydean; gawuurji gidaghayi oayiing'di bea gideaba gayghwahidu weajoocheanda Gristo, ak eara ghamneawa ea goola ghapka gea saang'a was weajoodiga Gristo; hean ghoah gidasinali gideaba damanda huuydean.

¹⁹ Nea saawa ghabeawa heedeanya, ak ea maba meatkweedeanya; aba gideaba inyeeda gaba meatkweedeanya, gwachi gaygoobiida heedeanya; hean ghang'eatng'eat gwarita jarooda, ak ghwadaajiit gideaba maba sean meatkweedeanya.

²⁰ Ak agooga ea nimwaareagwa dea ghaydit, ak ghoanali oogasean.

²¹ Geang'oorneegwa nea meakna gideaba moanali huumeanda, gweagu gideaba ghoanali, ak ginali gideaba manda ng'uyeega jea gwaleabu jeeda huumeanda.

²² Gaba ng'eaha ng'uya geaghus dea shaang' gideaba Yesu mii Gristo gil. Nih weajoocheanda Gristohi, dea shaang' Bwaabwa ea Orjeeda.

²³ Manda siida jea ghwashaang' Orjeeda ak gwandeawa Ghweanda. Dea mwas Orjeeda gwandeawa eara Ghweanda.

²⁴ Anung'waada ng'asheega ghayi oayiinyi aba mwadi goobiida jeesingeagwa. Asi iyabiida jeesingeagwa ng'asheega ghayi oayiinyi aba mwadi, abeeda gajoopiidana jeeda Orjeeda ea jeeda Ghweanda.

²⁵ Nea nih ea heeleeda ghayi rukuneasa gil, nea ea eaweega manda muudeanooda.

²⁶ Geang'oorneegwa ng'asheesu aba badayda fugiga gasa gwareenganeegwa;

²⁷ nea giimearda ghayi oanyaschi aba headaanyiin gwanda jeesingeagwa, ak ghanyea moogassi ghoanaaleagwa sih; aba gideaba giimeardida ghoanaaleagwa haleanjeeda sean, ak ea huumwa, ak ea manda ng'uyeega, gawuurji gidaghayi anaaldaneegwa, oopiidana jeadaanyi.

²⁸ Asi ghamneawa diibiga manang'i, oopiidana jeadaanyi, aba gideaba iihidu abeeda geaghuschi ak ea meebiiktani bwadaw aba baspaseega aba hinoadaanyi.

²⁹ Iyoanali gideaba niny ea doabiiwaat, abeeda ghoanali gideaba siida sina ng'asheega doobiiweadi gwajiilu niny.