1 SAMWELI 17 - Bibliyeeda Ghaydit

Gang'uchi Goliyati sea Israeli

¹ Damandida abeeda fuga Filisti ghabwada geat lugweega nyaawa aba ng'ucheeda, ak gabassa geat Soko, mida ng'eanyiida Yuda, ak gawus aba dageascheeda Soko ea dea Aseka, mida Efes-damimu.

² Nea Sawli ghabwat geat sea fuga Israeli, ak gawus aba moangoachiyda Ela, ak gwasin badiida gichea gang'ucheata sea fuga Filisti.

³ Hean ghamiinaada fuga Filisti aba uhuuda giijeeda meatkweeni, nea fuga Israeli ghamiinaada aba uhuuda giijeeda meatkweeda niirja, nea abeeda gwanda moaheani mida dageascheeda.

⁴ Ak gwarina jeeda museasooda Filisti siida ng'waan siguura gheawungaaschi Goliyati, bea ng'eanyiida Gati, nea geawundaanyi ghwahita geatin lah ea gili mwanang'.

⁵ Nea gwandeawa ngoofajeanda hang'waay sisna lagheanga oomng'i aba uhuudaanyi, ak gookwa gooteeda ng'ucheeda, nea durumanata goati ea giloohaji laadam bea lagheanga oomng'i.

⁶ Nea geeshangaaschi gookweala haleanjeeda ng'ucheeda sisna lagheanga oomng'i, ea jilooyeanda sisna lagheanga oomng'i iina hamarjoojigaaschi.

⁷ Nea murguuda ng'utaanyi gawuurji sea dikghnyeanda, nea ghuuta ng'utaanyi durumanataanyi ea giloohaji damanamuudi. Nea iissa goosheedeawa shirikarajeanda nea ghwasar igeambooda.

⁸ Ak iissa ghamiinaada, ak goojuursa lugooda Israeli nea gwayeesha, “Anda ghoapkaanyi abata ng'ucheeda? Neada aniini ea meawoosi siida Filisti, nea agooga moowoosi fuga gadiyeesa Sawli? Ageani siida jea dabearji.

⁹ Ama ammu dabearji ak ghabwaran dami, abeeda aseasa gajeahuuwa fugeagwa bea gadiyeeda; ama aajoarji niny ak ghaabwarji ghami, abeeda agooga gajahuuwa fugaasa bea gadiyeeda, ak googadiyeeseasa.”

¹⁰ Ghwalamda siidida bea Filistiin ak gwayi, “Askweareani geang'eaway lugooda Israeli; agoona siida jea dabearji.”

¹¹ Iidu nea ghwayiiy Sawli ea Israeelessean ng'asheesu bea siida Filistiin, gwahirbaban ak ghabeal muuchi.

Dawdi aba seamooda gheeh Sawli

¹² Abeeda Dawdi baleandeaba siidida was Furati bea Betlehemeeda Yudahiin, siguura gheawungaaschi Yese; nea abeeda gwandeawa orju sis; nea abeeda niny ea gweargweeda gil damanda Sawli, ak ea niwaasiit muuchi.

¹³ Nea orjooga hees asamwagu bea Yese ghwaat geeshta Sawli gaweay ng'ucheeda; nea gheawunga orjoagaaschi asamwagu weay ng'ucheeda ea Eliyabu gil was duweacheeda, nea dea bassa ea Abinadabu, nea deaba samwagu ea Shama.

¹⁴ Dawdi niny dea mwanang'; ak ghwaat orjooga hees asamwagu ghwaat geeshta Sawli,

¹⁵ nea iissa ghabeawa Dawdi hiji ea hoowa ghabeawa heeda Sawli ghoahaaghwa gisilga ghwaan aba Betlehemu.

¹⁶ Iissa ghapka fuga Filisti ak gang'ula geat aba eawooji haradam, sakteayda ea shing'ada.

¹⁷ Ng'ata ghwalamda Yese ak gwayeesha orjeedaanyi was Dawdi, “Asi easiina orjooga giyeang'wa booga sibeash mwanyiida lakwandeeda, ea mukaatajeesu atamanamughuushiin, ak gilamwaji aada jeeda museasooda heeda orjooga giyeang'wa;

¹⁸ ak giyaadi eara eanooga was riranga heeda shirikarajeanda haw ambal fih sagalama. Ak gidaahi giduurji ak giyeanean iita.”

¹⁹ Nea abeeda Sawli sea buuneesean bea Israeli gwanda moangoachiyda Ela, nea gang'uchi sea fuga Filisti.

²⁰ Hean ghang'eat Dawdi nea ghaghar gayeew, ak gwanung'usa gisilga siida jea ghoahaaghwa, ak ghwaat hamita ak gwasin gidarukusa Yese; ak ghwahidu jeeda museasooda damanda beawa lugooda ng'ucheeda nea goojuur giijuureanda ng'ucheeda.

²¹ Ng'ata gwajip geat fuga Israeli ea fuga Filisti aba ng'ucheeda nea goohareersiinyi geat.

²² Ak gwanung'usa Dawdi hamita heeda siida fura haleanjeeda ak ghafwach gawa madeeda ng'ucheeda ak gawa googeachi orjooga ghaamwat.

²³ Nea damanda abaloola saawa, ging'ulayi, ghwahidu siidida daruus was Filisti bea ng'eanyiida Gati, siguura gheawungaaschi Goliyati, nea gwaleabu jeeda lugooda Filisti, ak gwarugu ng'asheega uurji gea ghayi. Ak ghwayiiy Dawdi.

²⁴ Hean nea ghwadaah buuneesean bea Israeli siidida, gamng'aw aba madeadaanyi, nea ghabeal muuchi.

²⁵ Ak gwayi fuga Israeli, “Noadaayi siisi wuniin? Aba huumwa siisi ghwaan goong'eawi Israeli; nea siida jea ghabwar siisi, gayghoadaw sugoocheanda baruureega, ak gayghoadaw hudaanyi ak gayghwanung' goobal geat fuga gheanyaawa aba jeeda Israeli.”

²⁶ Ng'ata gwayeesha Dawdi fuga miinaada aba murdeadaanyi, “Gajeataw naaha siichea ghabwar siisi bea Filistiin, nea gageanda baspaseega aba jeeda Israeli? Aba gideaba siisi ng'eaha was Filisti meeyiilean, jea goong'eawi lugooda ASEETA mideawa eaweegean?”

²⁷ Ak ghwasha buuneeda nea ghoanyaash geat, “Nih gichea eataw siichea ghabwar siidida.”

²⁸ Nea abeeda gwayiing'shi orjeeda ghaamwat haw siguura Eliyabu damanda abaloola buuneeda; ak ghwanyareas Eliyabu aba badayda Dawdi, ak gwayi, “Ghwasaan gisini naaha ang'iing'i aba hiji? Ak ginung'usi ng'eaha gisilga ng'ayiin aba dareapcheeda? Aniini ghaanali ghwarjeadaang'u ea gidamuyda gurooroadaang'u; aba gideaba guwuni ng'ula ng'ucheeda.”

²⁹ Ghwalamda Dawdi ak gwayeesha, “Ghamneawa neasinyi naaha? Eara ng'asheanda mwaydanyaashta?”

³⁰ Ng'ata ghwayam geaw ak googeal geaw hichpa sih, ak goobaloola ng'asheegiga; ak ghwashaayda buuneeda ng'asheega gidagwachi bea mwadi.

³¹ Iidu nea geayiiy ng'asheega gwachi rugu Dawdi, geebiikta eergu ng'asheesu aba madeeda Sawli; ak goojeakta siida gawa gaguursa niny.

³² Ng'ata gwayeesha Dawdi Sawli, “Adaghabeal gurooroomba sih aba badaydeaba siisi; gaygawa siidaang'u bea gadiyeeda gang'uchi sea siisi bea Filistiin.”

³³ Hean gwayeesha Sawli Dawdi, “Ang'iing'i miimuusi ng'ucheewana siisi bea Filistiin; aba gideaba ang'iing'i guwoosi baleanda, nea niny ea siida ng'ucheeda gil ghang'eada damanda waseewa gheareemaneeda.”

³⁴ Ghwalamda Dawdi ak gwayeesha Sawli, “Siidaang'u bea gadiyeeda gooheagwiidi gisilga ghwaan; nea iissa iihidu ng'adiida, ghana idamooda, ak ghoang'waay dayeenda gisilleanda aba jeeda nooga,

³⁵ ghaahoanyi ak ghaabwarji ak geageandeawi ghuuta; ama ng'eedu nea gagalnean, iissa geang'ooyni deamuuka ak ghaabwarji ea danuus.

³⁶ Siidaang'u bea gadiyeeda nibwar ng'anyeeka ea idamoonga, ak siisi meeyiila was Filistiin gaygawuurji agi aba jeedeaba suh, aba gideaba niing'eawi lugooda ASEETA mideawa eaweega.”

³⁷ Ak gwayeesha Dawdi, “Ng'utamiida ghayi aghuuhanaan budilga ng'adiida ea budilga idamooda, gayghoaghuuhanaan geatindeaba siisi bea Filistiin.” Hean gwayeesha Sawli Dawdi, “Una ak gagasa ghoahaaghwaneey NG'UTAMIIDA!”

³⁸ Ng'ata gageanu Sawli hang'daanyi bea ng'ucheeda ak gooshuup Dawdi, ak gooshuup ngoofajeanda oomu bea gharinyeanda uhuudaanyi, ea gooteeda ng'ucheeda.

³⁹ Ak gwarasa Dawdi ng'uta badayda hang'weaka ng'ucheeda, ak gwasimsa beata ak ghwaraay, aba gideaba moang'wa ghwaat. Ng'ata gwayeesha Dawdi Sawli, “Aniini mwammuusi daat haleanjeeni; aba gideaba moang'wa daat.” Ak ghafwakta Dawdi sean.

⁴⁰ Ng'ata ghwaada geadi bileangida geatindaanyi, ak ghoawaam laghean muut miyaasiin aba jeeda ghealooda ak ghwayiin jeeda shageadaanyi mideawa nea gwanda makeamoadaanyi geatindaanyi, ak goosiipsa siidida bea Filistiin.

Ghwajoar Dawdi Goliyati

⁴¹ Eara siidida bea Filistiin goosiipsa Dawdi, ea gwaneekiisa, nea goosheedeawa siidaanyi sar igeambooda.

⁴² Hean nea ghoang'wearda siida Filisti, ak ghwadaah Dawdi, gafool; aba gideaba gudea baleanda, ak ea eesh nea miy aba leanga.

⁴³ Ghwalamda siida Filisti ak gwayeesha Dawdi, “Neada aniini geawooschi gudeeda, inyas geeyi bwak ea eanean bayiigean?” Ak ghamwaashta siida Filisti Dawdi aba aseecheekaaschi.

⁴⁴ Gwayeesha siida Filisti Dawdi, “Beeni heedeanyu, ak gaydaadaw banyeagaagu madoonyaka humng'eeda ea diyeanga jarooda.”

⁴⁵ Gwayeesha Dawdi siida Filisti, “Ang'iing'i beeni heedeanyu nea giyeadu ng'uta ea ng'uta ea jilooyeanda; ak gaydoan headaang'u aba gheawunga NG'UTAMIIDA bea lugweega, was ASEETA lugweega Israeli, ghayi iing'eawayi.

⁴⁶ Askweareani gayghwayiinyi NG'UTAMIIDA geatindeanyu, ak gaydanung' abisiina ng'eanyi, ak ghaalaji gheataang'u; ak gaydaadaw muscheeka lugooda Filisti madoonyaka ea diyeanga jarooda ghwaak; ak abeeda ghwanal buuneesean bea muunda ng'eanyiida gideaba gwanda ASEETA jeeda Israeli,

⁴⁷ ak abeeda ghwanal fiisu bwatgeadiin gideaba NG'UTAMIIDA malealuunana buuneeda ng'uta ea ng'uta fugaaschi; aba gideaba ng'ucheeda gaba NG'UTAMIIDA ak gayghwayiinyi geatingaasa.”

⁴⁸ Ghang'eat Goliyati ak ghwaan ea gwaneekiit ak gwaroonyi Dawdi, hean ghwahal geaw Dawdi, ak gawa roonyeeda lugooda gwanyeaschi sea siida Filisti.

⁴⁹ Ng'ata ghoabuuta geadi Dawdi jeeda shageadaanyi ak gageanu lagheaneeda, ak ghwayiin jeeda makeambooda ak gafu gheamamda siida Filisti; ak ghoabeada nea ghabwada jih ng'eanyi.

⁵⁰ Ak ghwajoara Dawdi siida Filisti makeambooda ea lagheaneeda, ak ghabwaay siida Filisti, ak ghabwar niny ea ghami; nea manda ng'uta geatinda Dawdi.

⁵¹ Ng'ata ghafwach Dawdi ak ghamiinaada aba badayda siida Filisti, ak gageanda ng'utaanyi ak gafakna jeeda labaldaanyi, ak ghwalaja gheata. Iidu nea ghwadaah fuga Filisti gideaba nimi siida nyaawa daruus, gamng'aw.

⁵² Ak goojuur fuga Israeli sea fuga Yuda nea gamaseaw fuga Filisti ea ghwahita Gati ea dooshinga Ekroni, nea muscheeka fuga Filisti meewiisa naweeda ghang'eada Shaaraimu ea ghwahita Gati ea Ekroni.

⁵³ Iidu nea gabiikna fuga Israeli hoanda fuga Filisti, hean ghwaat haleanjeeda mida jeeda museasooda nyaawa.

⁵⁴ Ak gageanu Dawdi uhuuda siida Filisti ak gweadu Yerusalemu; nea dabitaanyi ghwayiin jeeda maheemajeandaanyi.

Geayaat Dawdi heeda Sawli

⁵⁵ Daah Sawli Dawdi nea gawa gang'uchi fuga Filisti, gwayeesha Abneri was shirikarajeanda haw, “Abneri orjeeni gabeang'a?” Ghwalamda Abneri ak gwayeesha, “Ea sugoocheanda aba gidabiideata gurooroadaang'u, aniini mwaanali.”

⁵⁶ Gwayeesha sugoocheanda, “Anyaasha ang'iing'i orjeeda siida bea.”

⁵⁷ Ng'ata gabiikna Dawdi ng'ucheeda Filisti, ak ghwaat Abneri ea ghoahiita madeeda Sawli nea gwandeawa uhuuda siida Filisti aba geatindaanyi.

⁵⁸ Ghwalamda Sawli ak gwayeesha niny, “Orjeeda ang'iing'i guwoosi baleandeabeang'a?” Ghwasha Dawdi nea gwayeesha, “Aniini geawooschi orjeeda siidaang'u bea gadiyeeda siguura Yese was siida Betlehemu.”