1 Goriinto 15 - Bibliyeeda Ghaydit

Duunooda Gristo

¹ Asi fuga eaduupcheewi, ghamneawa gaydeapkeaneegwa Giijastida miy ghayi earukuneegwean, ghayi oang'waanyi was dea oamiinaadawi,

² amadu geelealneegwa, aba iyoang'waanyi muuchi ak geaghus gaba masaweegeagwa mwadaagha.

³ Aba gideaba geagonyeegwa giijasta majeek bea huumwa ghayi sigoonan, bea gideaba Gristo ghami aba riing'eegaasa gawuurji ginyaashta ng'ooruutka,

⁴ ea gideaba geebuy, ea gideaba geetuudu eaweeteaba samwagu, aba ginyaashta ng'ooruutka,

⁵ ea gideaba nibussiinyi sea Gefa, ea biissa giinealangiga atamaniyeenyean.

⁶ Iimuchu gabusiinyi sea fuga naawa bughalaji muut aba damwanagi, nea aba jeedeaba fiisu gwanda gea saang'a duugwanda eara ghamneawa, nea mwaatkwa gwanda gea nimeewa.

⁷ Iimuchu gabusiinyi sea Yakobo, ea gicha giijasoodiga sean.

⁸ Amadu aba huuydeandeaba sean, geabussinyeewi aniini, ak geawuurjeewi siida siji nea mii ghwahita damandaanyi.

⁹ Aba gideaba aniini geawooschi mwanang'eawa giijasoodiga, biissa ea mamiisean gideaba gajeeguureewean giijasoocheanda, aba gideaba ghayi naaghabwaschi ganiiseeda ASEETA.

¹⁰ Iidu aba dagheerjeanduumeeda ASEETA ea naahuuyi gideawuurjeewi bea ghamneawa, nea dagheerjeanduumeadaanyi aba heedeanyu ea maba mwadaagha. Aba meatkweeda niirja ghaaraanyi muuchi aba sinooda gadiyeeda ea dalaabwa hoowa siida wassean aba saawa, nea mii aniini gil, nih gwasin dagheerjeanduumeeda ASEETA mida heedeanyu.

¹¹ Asi ii aniini gil, ghanea fugiga, nih gissirukwiidi gil, ak hean ghoamwaschi.

Duunoodeanya

¹² Asi ghamneawa iinukwa geerukwiida gideaba Gristo niduuna miyeeda, anda ak gwayeena fuga mwaatkwa manda duunooda fuga nimeewa.

¹³ Ama manda duunooda fuga nimeewa, ada abeeda Gristo ea mii gwaduudu;

¹⁴ ama Gristo ii mii gwaduudu, abeeda rukwiideaydeanya bea giijasta gaba mwadaagha ak masaweegeagwa gaba mwadaagha.

¹⁵ Iissa eara aseasa geanung' eahuuwa gili sinapiisi ASEETA ng'uyeega, aba gideaba geemuuwu gideaba niiduudu Gristo, was dea mii gwaduudu ii huumwa gil gideaba ghami ak ea mii gwaduudu.

¹⁶ Aba gideaba ii meetuutuuna fuga nimeewa, abeeda eara Gristo ea mii gwaduudu.

¹⁷ Ama Gristo ii mii gwaduudu, masaweegeagwa gaba mwadaagha, ada abeeda ea gudu andana jeeda riing'eegeagwa.

¹⁸ Gwasunu abeeda eara fugiga sean ghayi meewa aba jeeda Gristohiin ea nirooda.

¹⁹ Aba gideaba aba jeedeaba eaweesu bea ghamneawean iisindeawi rarooda aba heeda Gristo, gidabal geabwaydaneasa ea ealaabwana hoowa buuneesean.

²⁰ Ak aba huumwa Gristo ea niduuna miyeeda, was haghweega madeeda aba jeeda fuga nimeewa.

²¹ Aba gideaba miyeeda ghayi gweadu siida, gwasunu eara duunooda miyeeda gweadu siida.

²² Gawuurji ghayi aba Adamu gameewa buuneesean, gwasunu eara aba heeda Gristo gaygwaduutu sean.

²³ Ak gaygaba siisi siituudu aba badiida ASEETA: Nea Gristo ea haghweega madeeda gil, nea damanda jea ghwahina gayghoan heeda fuga was gea Gristo.

²⁴ Iing'ata hiji gayghwahidu muudeanooda, damanda jea ghoadawa ASEETA was Bwaabwa gheambalmeeda iing'ata nyarjeawda sugoocheanduumeeda ea fuga ambaliischi sean ea uurda.

²⁵ Ak ghanyi goombaliischi ea eaghus ghwayiin weajoodigaaschi sean jeeda baneaguuka geeshangaaschi.

²⁶ Weajoocheanda huuydean jea eejakta miyeeda gil.

²⁷ “Aba gideaba ASEETA niyiin haleanjeeda sean jeeda baneaguuka geeshangaaschi.” Amadu nea gwayi “Haleanjeeda sean siyiin hing'eadaydaanyi,” ak ea daachi gideaba nimwas siida iin haleanjeeda sean hing'eadaydaanyi.

²⁸ Asi iisiyiin haleanjeeda sean jeeda baneaghuuka geeshangaaschi, abeeda Orjeeda gayghwayiin geaw jeeda baneaguuka ASEETA, ak abeeda ASEETA ghoah haleanjeeda sean aba hichpa giliwas siida.

²⁹ Asi ghamneawa gwayeenaan buuneeda iisiibatiisan aba hoorgeeda fuga nimeewa? Iimuchu nea meetuuna fuga nimeewa earahay, abeeda buuneeda geepaatiisaniisa naaha aba hoorgeeda nyaawa?

³⁰ Abeeda ghwasaan inyas geendi jeeda giidiinyeanda damanyoojiga seani?

³¹ Fuga eaduupcheewi, aniini gearugu ng'asheesu nea ghaaghwarji geaw aba badahuukeagwa agoogeeda mida jeeda Gristo Yesu was Ng'utamiideanyean, iissa geenuusan galeagasean!

³² Gaydanya naaha abeeda iyeabalooldi siida, aniini geang'ucheewi diyeanga aba Efesohiin? Aba iimaduutuuna fuga nimeewa, “Asi eeyeagiischeena nea geeleeshi, aba gideaba numuji gajeemeewa.”

³³ Adeereenganeegwa, “Baloolda muy iissa gwanuus searoojiga miyaas.”

³⁴ Anung' ghwadoabiiw fughareengeagwa, ak ea adagudoosinyi riing'eeda. Aba gideaba buuneeda mwaatkwa mandeawana fughareeda ASEETA. Geerugu ng'asheesu ak abeeda ghoabwaaspwaaschi.

Saseeda jea eetuudu

³⁵ Iidu gwadeepa ghoanyaashta sih, “Fuga nimeewa geetuutaydaan? Ak gayghapka nea gweadu sasanuuka uurjiin?”

³⁶ Ea siitasha, haleanjeeda ihisti maygwahissa heeda ea eaghus ghanyi ghami.

³⁷ Nea gidihisti ea mii bookcheanda niheedu, iissa gheang'nyeanda, deepa gaba ngaano ghana gaba booga suurja.

³⁸ Nea ASEETA ghoadaw saseeda loat nea gilinyoo ea mbeeyooda gil iissa ghwanyas saseadaanyi.

³⁹ Aba gideaba sasanuuka sean mawuurji, amadu sasanuuka buuneeda gawuurji, nuut gaba diyeanga, nuut gaba dariidaka, nuut gaba ghweayeega.

⁴⁰ Ak gwanda sasanuuka humng'eeda ea sasanuuka ng'eanyiida; nea giigheambiita sasanuuka humng'eeda ea agi, nea giigheambiita sasanuuka ng'eanyiida ea nuut gil.

⁴¹ Asi gwanda giigheambiidagi bea ASEETA, ak giigheambiit nuut gaba sheeda, nea giigheambiit nuut gaba miinga; aba gideaba miing'weanda gwaheeli sea miing'weanda aba giigheambiita.

⁴² Gwasunu eara duunooda fuga nimeewa. Gidasihista iissa ghami, nea gisiituudu ea mayghami.

⁴³ Geehista nea ghasghasaat, ak geetuuna nea gwandeawa giigheambiita. Geehista ng'arng'aranda, ak geetuudu nea gwandeawa uurda,

⁴⁴ Geehista saseeda gealaan, ak geetuudu saseeda guroorooda. Iimida saseeda gealaan, gwanda eara dea guroorooda.

⁴⁵ Gawuurji gissing'oarda bea gideaba, “Siida madeeda was Adamu ghoah siida mideawa eaweega”; nea Adamooda huuydean ea Guroorooda adawi buuneeda eaweega gil.

⁴⁶ Nea dea asheeda giibinda ea mii saseeda guroorooda gil, geaghus saseedida bea gealaaniin amang'ata ghabwat saseeda guroorooda.

⁴⁷ Siida madeeda ghayi gwaleabu ng'eanyiida, ak geesina birjeanda; siideaba iyeenya gwaleabu humng'eeda.

⁴⁸ Gawuurji siidida bea birjeandean, ea giduurji fugiga sisna birjeandean gil; gawuurji siidida bea humng'eedean, ea giduurji fugiga bea humng'eedean gil.

⁴⁹ Ak gawuurji sea gisiwuurjeati sea siida ghayi sisna sigeedean, gwasunu geewuurjeewi siidida ghayi leabu humng'eedean.

⁵⁰ Gearukuneegwa ng'asheesu, fuga eaduupcheewi: saseeda ea foojeanda maygwahearan sugoocheanduumeeda ASEETA, ghana dea jea ghami mayghoamu gwahearan dea mayghami.

⁵¹ Asi ng'ula gearukuneegwa agooga makcheameeda. Aseasa majeemeewa sean, ak gajeayameasa eesa sean,

⁵² aba gheadi nuwaas, aba dukuteayda gheanyanga ea jeadita, damanda jea ghwanyaasha durumbeateeda huuydean. Aba gideaba gayghwanya durumbeati, ak gaygwaduutu fuga nimeewa, ak ea maygudu ghwadaah miyeeda, ak aseasa gajeayameasa.

⁵³ Aba gideaba saseani meewean gayghanyi gookwa saseeda mayghami, nea saseeda jea ghami abeeda gookwa saseeda mayghami.

⁵⁴ Abeeda nih iissa ghamiin eaweeda jea gookweala saseeda mayghamiin, nea diita meewean gookwa dea mayghami, abeeda aba damani gaygwasa ng'asheanda ghayi sing'waar: “Miyeeda sijoar, ak ea nisa jooriischooda.”

⁵⁵ Ea miyeeda, jooriischoadaang'u gwanda yeenu? “Ea miyeeda, ng'weanindaang'u gwanda yeenu?”

⁵⁶ Ng'weaninda miyeeda riing'eeda, nea uurda riing'eeda ea deaweeda gil.

⁵⁷ Iidu gagasa eebadiischeesa ASEETA, dea goona jooriischooda aba Ng'utamiideanya was Yesu Gristo.

⁵⁸ Asi fuga eaduupcheewi aabwariinyi, andeawana alooheeda, ak ea adoabealbeali, ak goosinyi galeagasean gadiyeeda Ng'utamiida, ak ghoanali gideaba gadiyeedeang'wa mii mwadaagha gil aba heeda Ng'utamiida.