1 Goriinto 14 - Bibliyeeda Ghaydit

Ng'asha suuk goona Guroorooda Ghaydit

¹ Anung' ghoah bariinyeega, gida jea agassa, nea goosinyi badiida aba haleanjeeda jea eegu bea guroorooda, raanya gideabali ghoaramwaarji.

² Aba gideaba siida baloola iit nuut meabaloola buuneeda goobalool ASEETA; aba gideaba manda siida nal ng'asheagaaschi, niny gwaruku makcheameeda funyaat aba jeeda Guroorooda.

³ Nea aba meatkweeda niirja, siida ramoorani goobalool buuneeda aba giidiing'nooda nyaawa nea goomajeek ea geandeayda salagheang'da.

⁴ Siida baloola iit nuut goomajeek geaw niny, nea siida ruku ramooranga goomajeek ganiisa.

⁵ Ak geagasayi aniini gideaba gajabaloolana iit nuut, nea ghwaraanya muuchi gideaba gajaramoarana. Aba gideaba siida ramoorani ea haweewa siida baloola iit nuut, geaghus gwaroopu siinuut, ak abeeda geemajeek ganiisa.

⁶ Ak ghamneawa fuga eaduupcheewi, iyaawunyi heedeang'wa ak geabalooli aba iit nuut, abeeda gaydanung' anyagaadaydaan, geaghus darukuneegwa nea ghaadahaaji ghana aba fughareeda, ghana daramooran, ghana aba giinealshooda?

⁷ Eara haleanjeeda mandeawana gurooruunatka, uurji durumbeati, ghanea gidoondooriida gil, iimwanya nea gwaheeli nyeashta, gajeanaldaan duumda was?

⁸ Aba gideaba giiguuleanda iinyaa nyeashta meanala, gajea ng'eaha siida jea ea hidaat aba ng'ucheeda?

⁹ Asi gwasunu eara agooga; iyoobalooli iit nuut meanala, gajea ng'eaha jea ghwanal gissirgu? Aba gideaba gajuurjeewana siida rukwiisa ng'asheega jeameeda.

¹⁰ Asi gwanda iidiga saang'a heeli aba jeeda ng'eanyiida, ak ea manda dea meanala girugu.

¹¹ Abeeda iimwaanali ginyah iitida, gaydoaw rabascheanda aba heeda siida balool nea siida balool gayghoah rabascheanda aba heedeanyu.

¹² Gwasunu eara aba heedeang'wa; aba gideaba googasayi muuchi gideaba gajahuuwa fuga mideawa uurda aba Guroorooda, agassa muuchi gideaba gajandeawana ak ghoadeaschi ganiisa.

¹³ Asi, siida baloola iit nuut ea damwaasha ASEETA eataw roopiideayda.

¹⁴ Aba gideaba iyaamwaashchi ASEETA aba iit nuut, ghamwaash guroroodeanyu ASEETA, nea fughareedeanyu ea mandeawana haghweega.

¹⁵ Abeeda gaydasin naaha? Gaydamwaash ASEETA aba guroorooda earada gaydamwaash aba fughareeda, gaydasarman aba guroorooda ak gaydasarman earada aba fughareeda.

¹⁶ Eara gwasa, ang'iing'i iibadiischeesi aba guroorooda, siidida uurji gilimida jaroodean gaygwayeendaan “Amina” iing'ata badiischeesiindaang'u iimwanala gidirgu?

¹⁷ Aba gideaba gwadeepa badiischeesiina muuchi, iidu siida niirja ea maloosiina gil.

¹⁸ Geabadiischeesi ASEETA aba gideaba geabalooli iit nuut ea daadarameagwa oogasean;

¹⁹ amadu, aba jeeda ganiisa ghaabwariinyi gideaba gaydabaloola ng'asha muut aba fughareedeanyu, ak ghaanaali buuneeda suurja, ea ghwalaabwa hoowa gideaba gaydabaloola ng'asha sagalamnyooji damanamughuush aba iit nuut.

²⁰ Fuga eaduupcheewi, adoahuuyi diibiga aba fughareengeagwa; ahuwa diibiga aba ng'asheega munyas, nea aba fughareengeagwa ghoahuuyi fuga hees.

²¹ Geang'waar aba jeeda deaweeda gideaba, “Aba ghuusiga fuga baloola iit nuut, ea biissa ghuusiga rabasta gaydeabalool fiisu, ak eara gwasa ghanyea maygooleeysean iit, gwarugu Ng'utamiida.”

²² Asi, iit nuut gwadeagooda gil ak ea maba fuga mideawa masaweega, gaba fuga mandeawana masaweega, nea ramooranga ea maba fuga mideawa masaweega.

²³ Asi iibwat geat ganiiseesean ak gabaloola sean iit nuut, amadu ghwahidu gah fuga jarooda, ghanea fuga mandeawana masaweega gil, heapi maygwayi goobeayi geasi?

²⁴ Ama ramoaran sean, amadu ghwahidu gah siida iiyiin gaygoohiimsa munyindaanyi, nea ng'asheegiga sean iiyiin gaygoorgweaksa,

²⁵ Makcheameeda jeadaanyi gajeanung' ghwadaajiit; ak abeeda gwatkuy, ak gayghabwat ASEETA ak gwarugu gideaba aba huumwa ASEETA gwanda jeedeang'wa.

²⁶ Fuga eaduupcheewi, asi gajeeyeenaan? Iyoabwachi geat, gaba siisi mideawa duumda, ea giinealshooda, ea giidaheachta, ea iit nuut, ghana roopunooda ng'asheega.

²⁷ Siida iibaloola iit nuut, ea dabaloola fih iyeenya ghanea samwagu gil adaghwanaawa, nea dasina galanyoojiga gwayamuutooschi; ak ea daroopuuna siyagi.

²⁸ Iimanda siichea gwaroopu, ea daba siisi siinda aba jeeda ganiisa, deabaloola geaw niny ea ASEETA.

²⁹ Nea sibanga ea dabaloola nea iyeenya ghanea samwagu, ak ea dasikteawana ng'asheega sirugu.

³⁰ Nea iisiitaheachsa ng'asheanda siinuut apteada, ea dasiinda siida ghwanyawa bea madeeda.

³¹ Aba gideaba ghoamuuschi oogasean gaba siisi ramoaran, ak abeeda ghwanal sean, nea geemajeek sean;

³² nea gurooruunatka sibanga iissa gwasissa gadiyeeda sibanga.

³³ Aba gideaba ASEETA mii ASEETA ang'uutooschi fih gil, niny gaba hoyyoo. Gawuurji aba jeeda ganiisajeega sean bea fuga ghaydidi.

³⁴ Nea gadeemga ea dasiinda aba jeesinga ganiisajeega. Aba gideaba manda gheata jea gabaloola, gagasa gweada geat ng'eanyi, gawuurji ginyaashta deaweeda.

³⁵ Ama mida ng'asheanda wassean gasa ghwanal, ea daanyaasha siyeenatka nyaawa aba ghoah. Aba gideaba gaba baspaseega gideaba gaygabalool gatmooda aba jeeda ganiisa.

³⁶ Heapi! Ng'asheanda ASEETA ghang'eada heedeang'wa ghana hisseegwa agooga nea goobwaageadi?

³⁷ Siida iiyeesha geaw guwoosi sibaneeda gil, ghana ea siida guroorooda, gayghamwas ng'asheesu eang'oorneegwean gideaba gwarugu Ng'utamiida.

³⁸ Nea siida iimwanala ng'asheesu, ea mwajeanaal niny.

³⁹ Asi fuga eaduupcheewi, asina badiida ak googasayi muuchi ramooranda ng'asheega, nea adoaheawi fuga baloola iit nuut;

⁴⁰ nea goosini ng'asheega sean badiida ea alooheeda.