1 Goriinto 12 - Bibliyeeda Ghaydit

Gidaguh Guroorooda Ghaydit

¹ Fuga eaduupcheewi, asi ghamneawa aba iita haleanjeeda sigu bea guroorooda, aniini meagassi ea moanali.

² Ak ghoanali gideaba damanda ghayi oowooseewi fuga mandeawana masaweega, geehuteaweegwa ak ghoabwachi sanaamu, ak eara gwasa ghaaghanyi siiheeleewaneegwa.

³ Asi geagasayi gideaba anala gideaba manda siida jea gabaloola badayda Guroorooda ASEETA jea gwayi, “Yesu simwaashta!” Ak ea manda siida jea gwayi, “Yesu Ng'utamiida gil” geaghus gwarugu Guroorooda Ghaydit.

⁴ Asi gwaheeli giimuusta sigu, nea Guroorooda ea agi;

⁵ Ak gabiissa gwaheeli siinjeandinga gadiyeeda, nea Ng'utamiida ea agi;

⁶ Iidu gwaheeli uurda gadiyeeda, nea ASEETA ea akaleala dea adoabiiw sean aba badahuuka buuneesean.

⁷ Nea giliwas sih goohiimsa ASEETA Gurooroadaanyi aba alooheeda buuneesean.

⁸ Aba gideaba siyagi aba Guroorooda geataw gwaruku weaghuumeeda, nea geataw nuut gwaruku ng'asheega aba fughareeda aba gidabwariiyda Guroorooda,

⁹ nuut geataw masaweega aba Gurooroodida, nea nuut geataw giimuusta jea ghoahaabwa buuneeda aba Guroorooda asagiin,

¹⁰ nea nuut geataw gadiyeeda jea gwasina ng'asheega deamdeameedi, nea nuut geataw sibaneanduumeeda, nea nuut gooheeldooschi gurooruunatka, nuut heeluutka ghuusiga eemoojiga, nea nuut geataw roopiideayda ghuusiga eemoojiga.

¹¹ Nea gadiyoojusu seaniin gwasin akaleala aba Gurooroodida asakalealaan, ak gwalakiisa giliwassih nea gabwageaw gawuurji gidida gassiida ninyiin.

Roobuutka aasaang'a nea saseeda ea agi

¹² Gawuurji gidida waseata agi saseedean ak gabiissa gwandeawa damealga saang'aan, earapeadi damealga saang'aan gaba saseanagi, ak ea giduurji eara aba heeda Gristohi.

¹³ Nea aba Gurooroanagi geebaatiisaneasa aba saseanagi, fuga Yahudi ghanea fuga Giriki gili, ea giing'oonyanga gil ghanea fuga abal geat gil, hean geanung' ghwaleayda sean Gurooroanagi.

¹⁴ Aba gideaba saseeda mandeawana damealeanjagi gil aasaang'a.

¹⁵ Iyayi geeshta, “Aniini meawoosi geatinda, ak ea meabeahi saseeda,” nih mii gidamaygabeaheewa saseeda gil.

¹⁶ Ama ayi iita, “Aniini meawoosi gheang'da, ak ea meabeahi saseeda,” nih mii gidamaygabeaheewa saseeda gil.

¹⁷ Abeeda saseesean ii huuw gheang'da, abeeda iing'da gaygwanda yeenu? Amabeeda was saseesean iita, abeeda gwanda yeenu joonda gida?

¹⁸ Hean aba giduurji, ASEETA gageanu googuuyi giliwas roabwada mida saseeda, aba giliwas roabwada aba gidagasiida.

¹⁹ Ghwanyawa inyeeda ghoah roobuutka sean roobadeanagi, abeeda saseeda gaygwanda yeenu?

²⁰ Amadu ghamneawa roobuutka aasaang'a, amaduuku saseeda ea agi.

²¹ Ak ea mayghoamu gheang'da gwayeesha geatinda, “Aniini meagasseey,” nea moamu gwayeesha uhuuda geeshanga, “Aniini meagasseegwa.”

²² Abeeda iisiyam, roobuutkiga bea saseeda sideaksa ng'arng'aranyeekean gea sigasa muuchi gil,

²³ nea roobuutkiga bea saseeda mahaguuwa mureedean gajeatawa mureeda haw muuchi, nea roobuutkaasa manda leanga geanung' gwandeawa leanga muuchi ea ghwanaawda.

²⁴ Aba gideaba roobuutkaasa mideawa alooheeda magassa gil. Nea ASEETA ghayi gwasin saseeda, ak ghoadaw mureeda muuchi roobadeedida ashoayiin,

²⁵ ak abeeda ea dardaawaat saseeda, ak abeeda gang'ula geat roobuutka, gaba roobadeeni ng'ula nuut.

²⁶ Nea iisawana roobadeanagi, abeeda gwasawana roobuutka sean; nea iisisissa mureeda roobadeanagi, abeeda gahoosan sean.

²⁷ Asi noahuuyi saseeda Gristo nea gaba siisi was roobadeadaanyi.

²⁸ Nea ASEETA ea niloat giijasoodiga madeeda aba jeeda ganiisa, deaba iyeenya sibanga, geaba samwagu ea giinealshoodiga, ea fuga sina ng'asheega deamdeameadi, ea fuga aheabi buuneeda, ea weedanga, ea fuga ambaliischi, ea fuga baloola ghuusiga eemoojiga mwaatkwa.

²⁹ Neada ea giijasoodiga seani? Neada ea sibanga seani? Neada ea giinealshoodiga seani? Ak gwasina sean ng'asheega deamdeameadi?

³⁰ Neada ea siitaw sean giiheapta fuga miyeani? Neada gabaloola sea iit muudi? Ak ghoamu sean roopiideayda ng'asheega?

³¹ Asi agassa muuchi haleanjeeda hees jea eegu. Ak gaydaahiimneegwa naweeda miy muuchi mii adaaha.