Both 10 - Sơ̆p Hlabơar Nơ̆r 'Bok Kei-Dei

'Bar hlak tơmo lat 'nao

¹ Kơplah noh Kră Yang khan kơ inh: Ih athei man 'bar hlak tơmo lat thoi 'bar hlak tơmo lat adrol ki păng năm tŏk tơ Inh tơ kơpal kông ti; ih kư̆m athei pơm minh pôm hom păng tơ̆r.

² Inh gô chih tơ kơpal 'bar hlak tơmo lat noh dôm nơ̆r Inh đei chih tơ 'bar hlak tơmo lat adrol ki mă ih teh pơchah lê̆ boih, đơ̆ng noh tah 'bar hlak tơmo lat âu lăm hom.

³ Thoi noh inh pơm minh pôm hom păng 'long keo pơm 'bar hlak tơmo lat thoi 'bar hlak tơmo lat adrol ki, đơ̆ng noh năm tŏk tơ kông, chĕp 'bar hlak tơmo lat noh,

⁴ Kră Yang sư chih tơ kơpal 'bar hlak tơmo noh nơ̆r sư đei chih thoi adrol ki, mă mơjĭt Khôi juăt tơtă mă Kră Yang pơma kơ lu iĕm đơ̆ng lăm ŭnh tơ kơpal kông, lăm năr iĕm akŭm. Đơ̆ng noh Kră Yang pơjao ăn tơmo lat kơ inh.

⁵ Inh jur wih đơ̆ng kông, tah lê̆ 'bar hlak tơmo lat noh tơ lăm hom mă đêl inh pơm păng lê̆ 'bar hlak tơmo lat tơ noh truh dang ei, kiơ̆ thoi Kră Yang pơkă kơ inh boih.

⁶ Kon pơlei Isơrael năm đơ̆ng sơlŭng đak Jakan truh tơ Mêsêra; Arôn lôch păng 'bŭ tơ noh, Êlêasar kon drŏ-nglo sư, bơ̆jang pơm 'bok soi tơm tơplih kơ sư.

⁷ Đơ̆ng noh kon pơlei Isơrael năm truh tơ Gutgôđa đơ̆ng Gutgôđa truh tơ Jôtbata, jơ̆ dêh mă đei lơ đak glung.

⁸ Kơplah noh, Kră Yang klah lê̆ adrĕch Lêwi pha, wă tung hom pơgơ̆p Kră Yang dơ̆ng 'bơ̆t anăp Kră Yang wă bơ̆jang pơm 'bok soi kơ Sư păng yua anăn Kră Yang sơkat pŭn hiôk ăn kơ kon pơlei. Truh tơ dang ei,

⁹ Thoi noh lu bơngai Lêwi ưh kơ đei teh jang sa hơdai hăm lu 'nhŏng oh lu sư, Kră Yang boih jơ̆ tơmam lu sư, kiơ̆ thoi Kră Yang đei khan boih hăm lu sư.

¹⁰ Inh oei tơ kơpal kông lăm puăn-jĭt năr păng puăn-jĭt măng kư̆m thoi adrol ki, na Kră Yang mơ̆ng nơ̆r inh; lăp đon ưh pă wă pơlôch iĕm,

¹¹ Kră Yang khan kơ inh: Iung bĕ, năm adrol kơ kon pơlei, mơ̆t iŏk dêh mă Inh đei pơkă pơkăm hăm 'bok lu sư.

Hli yom kơ Kră Yang

¹² Ơ bơngai Isơrael, dang ei Kră Yang 'Bok Kei-Dei iĕm tơtă athei pơm kiơ? Athei băt hli yom kơ Kră Yang 'Bok Kei-Dei iĕm, yak kiơ̆ đĭ trong Sư, 'mêm kơ Sư păng bơ̆jang kơ Kră Yang 'Bok Kei-Dei iĕm hăm đĭ jơhngơ̆m, đĭ bơhngol iĕm,

¹³ wei răk khôi juăt păng nơ̆r tơtă Kră Yang mă inh đei bơtho ăn kơ lu iĕm năr 'nâu, wă kơ lu iĕm đei pŭn hiôk?

¹⁴ Lu plĕnh păng lu tăl plĕnh kơjung hloh, teh păng dôm tơmam kơpal teh noh jơ̆ đơ̆ng Kră Yang 'Bok Kei-Dei.

¹⁵ Noh boih Kră Yang 'mêm kơ 'bok lu iĕm, Sư rơih iŏk iĕm đơ̆ng lăm lu kon pơlei nai. Thoi lu iĕm năr âu.

¹⁶ Na lu iĕm, athei băt hli yom kơ Kră Yanga 'nĕ pă arăng kơ̆l dơ̆ng.

¹⁷ Yua kơ Kră Yang 'Bok Kei-Dei lu iĕm jơ̆ Kră Yang 'Bok Kei-Dei kơ lu yang păng yŏng kơ đĭ-đăng lu yŏng, wă khan Kră Yang 'Bok Kei-Dei Tih Hloh, mơsêh mơyang păng trŏ kơ hli yom. Sư ưh kơ pơdê bơngai bu, kư̆m ưh kơ đei pơgâm sa bu.

¹⁸ Sư tơgŭm lu bơngai mơti păng bơngai adro po, 'mêm mơnat kơ bơngai tơmoi, ăn tơmam sa păng hơbĕn ao kơ lu sư.

¹⁹ Lu iĕm athei 'mêm mơnat kơ lu bơngai tơmoi yua kơ lu iĕm kư̆m jing bơngai tơmoi lăm dêh Êyiptơ.

²⁰ Iĕm athei băt hli yom kơ Kră Yang 'Bok Kei-Dei iĕm, bơ̆jang kơ Sư, oei kơjăp lăm Sư păng yua anăn Sư pơkă pơkăm.

²¹ Sư boih mă Tơ'ngla lu iĕm hơri ư-ang păng Sư boih Kră Yang 'Bok Kei-Dei iĕm Tơ'ngla hlôi pơm dôm tơdrong pran kơtang tih păng krưp, mă măt lu iĕm 'bôh boih.

²² Kơplah 'bok lu iĕm jur tơ dêh Êyiptơ, đei lăp tơpơh-jĭt 'nu đĕch; mă dang ei, Kră Yang 'Bok Kei-Dei ăn kơ iĕm lơ thoi sơnglŏng tơ kơpal plĕnh ti.