Tushimpi 5 - Baibo Busansulushi Bwa Libuku Ili

Kucenjesha pamakani a bulale

¹ Omwanaangu, teya kutwi kubusongo bwangu. Kutika maswi angu aswa mumaano angu akunyumfwisha shintu.

² Lyalo ulaakwishiba kulilemeka, alimwi maswi ako alaakunootondesha ayi ulicite lushibo.

³ Mulomo wa mwanakashi shibulale ulaloka buuci, aalo maswi akwe aliteshimite abuumbi kwiinda mafuta.

⁴ Sombi kumeelelesho ulalulabo anga ngumululwe akuyasa anga ngumupeeni ukolete koonse koonse.

⁵ Myeendo yakwe ilatola kumusena wa bafu, ncakwiila ntaamwa shakwe shililulemebo kulufu.

⁶ Taaku ancaayeeyawo panshila ya buumi. Nshila shakwe shilipilingene, sombi lakwe taaku ancaabwene.

⁷ Nobana bangu, amunkutike, mutaswiiko kusheesho nsheentoomwaambila.

⁸ Mwanakashi wa mushobo uyo mumusoonoke. Mutakeeleshi kuya kufwaafwi aŋanda yakwe.

⁹ Ono na mwabula kucita boobo, bulemu bwanu bulaakutolwa kubantu bamwi. Lyalo mwebo mulaakucaikwa kamucili banike kubantu beshilunkutwe.

¹⁰ Ncakwiila buboni bwanu bulaakubwesekwa kubeensu, ee, shintu nshemwakayuwila shilaakubwesekwa abantu bamwi.

¹¹ Kumeelelesho abuumi bwanu mulaakunootongelabo, nkusu shaakumana mushiso sha mumubili wanu woonse.

¹² Lyalo mulaakwaamba ayi, “Anu ndakakakilanshi kwaambilwa? Nciinshi nceentakwe kusuminina kululikwa?

¹³ Nshindakalinga kunyumfwila bafundishi bangu nabi kukutika baabo bakalinga kunjiisha.

¹⁴ Ono mbulya ndashika kukunyonyooka, ee, kunyonyooka pameenso a bantu boonse.”

¹⁵ Shomeka kumukaako eenka bweenka mboonwa maanshi mumukalo wako omwiine.

¹⁶ Sa ulyeelete kushala baana mubanakashi ba mumikwakwa? Sa ulyeelete kuba abaana mubanakashi ba mumisena icanika bantu baanji?

¹⁷ Bana bako ababe mbaako omwiine weenka, ee, bekala andiwebo kuteshi abantu bamwi.

¹⁸ Mukaako aapekwe coolwe alimwi koosangalalila mumwanakashi ngowakeeba koocili mwanike.

¹⁹ Aabe anga ninsefu iyo isangalasha alimwi yeebeleka. Nkolo shakwe ashikukondeleshe. Lusuno lwakwe alukutolele moyo lyoonse.

²⁰ Omwanaangu, ceebonshi kusunisha shibulale? Sa ncibotu kusekanya bukome bwa muka mubyo?

²¹ Mwaami Lesa lakwe ulabona shoonse shicita muntu. Nshila shakwe shoonse lakwe ulishibwene.

²² Micito ya mucita shibi nkoose kuli nguwe mwiine. Ncakwiila mwiine ulacatwa kumwaando wa shibiibi shakwe.

²³ Ulafwa ceebo cakukaka kululamikwa akuya kucuumbwe ceebo ca buluya bwakwe butalifulili.