Shakubelenga 15 - Baibo Busansulushi Bwa Libuku Ili

Milawo ya pamilambu

¹ Mpomunyaawo Mwaami Lesa wakaambila Mose ayi,

² “Lwiita bene Isilaeli ayi mwaakwinjila mucishi ico nceshi nkamupe,

³ mucende, mbelele isankwa nabi mpongo inga yabengwa kuli ndime neMwaami Lesa ayi ngumulambu wakutenta, mulambu wakucita kweelana akushomesha cakulumbila, mulambu wakulyaaba nabi milambu ya pakusekelela mukupaila kwanu. Bweema bwa milambu ya shakulya iyi, bulansangalasha nebo neMwaami Lesa.

⁴ Lyalo uyo woonse uleta mulambu, ulyeelete kupa Mwaami Lesa kilogilamu yomwi ya fulaulo usenkene alita yomwi ya mafuta a olifi ayi ncipo ca fulaulo.

⁵ Ono pambelele yoonse ya mulambu wakutenta nabi mulambu umwibo, ulyeelete kubamba awaini uniini ayi ncipo ca cakunwa.

⁶ Na nimbelele isankwa yabengwa, makilogilamu 2 a fulaulo asenkene amalita 1.5 a mafuta a olifi alyeelete kupekwa ayi ncipo ca fulaulo,

⁷ kwiilikaawo amalita 1.5 a waini ayi ncipo ca cakunwa. Anu bweema bwa milambu iyi bulansangalasha nebo neMwaami Lesa.

⁸ Ono na ngumucende wabengwa kuli ndime neMwaami Lesa ayi ngumulambu wakutenta, mulambu wakucita kweelana akushomesha cakulumbila nabi mulambu wa bwanabwankashi,

⁹ palyeelete kuba amakilogilamu 3 a fulaulo usenkene amalita 2 a mafuta a olifi ayi ncipo ca fulaulo.

¹⁰ Ulyeelete kubikaawo amalita 2 a waini ayi ncipo ca cakunwa. Bweema bwa mulambu uyu bulansangalasha nebo neMwaami Lesa.

¹¹ “Nkokwaamba ayi ishi nsheshi shikanoopekwa pamucende womwi, mbelele isankwa yomwi, mwanaambelele nabi mpongo.

¹² Na kutoopekwa banyama basotoka pawomwi, mulyeelete kupa cipo ceelene pamunyama womwi awomwi.

¹³ Anu mwine Isilaeli woonse ulyeelete kucita mbomunya ubo pakubenga mulambu wa cakulya. Bweema bwa mulambu uyu bulansangalasha nebo neMwaami Lesa.

¹⁴ Ono na muswamashi uli pakati kanu, wakesa mukufwakasha nabi kwikalilila, wabenga mulambu wa cakulya, bweema ubo bunsangalasha nebo neMwaami Lesa, alakwe ulyeelete kucita mbomunya ubo.

¹⁵ Milawo njemunya iyi ilaakunookumite kuli ndimwe alimwi abaswamashi bashiite pakati kanu mumashalane anu oonse atoosa. Mwebo ambabo mulyeelenebo pameenso angu nebo neMwaami Lesa.

¹⁶ Aboobo mwebo alimwi ambabo mulyeelete kukonkela milawo amilasho yeenka iyi.”

¹⁷ Mpeeke Mwaami Lesa wakaambila Mose ayi,

¹⁸ “Lwiita bene Isilaeli ayi mwaakwinjila mucishi umo moontoomutola

¹⁹ alimwi mwaakulya shakulya shicanika mucishi ico, shimwi shilyeelete kubikwa palubasu ayi ncipo cangu neMwaami Lesa.

²⁰ Mulyeelete kupa cimaande citaanshi cakapangwa kubusu butaanshi kwaamba ayi ncipo kuli ndime neMwaami Lesa. Mulyeelete kucipa bweenka mbuli cipo ca fulaulo ngomwalupula.

²¹ Cipo ico cilyeelete kunoopekwa kuli ndime neMwaami Lesa kuswa kubusu bwanu butaanshi mumashalane anu oonse atoosa.

²² “Ono na muntu umwi cakuteshiba waalilwa kukonkela milawo iyi nebo neMwaami Lesa njendakapa Mose,

²³ alimwi na kunembo bene Isilaeli boonse baalilwa kucita shintu shoonse nebo neMwaami Lesa nshendakabaambila kwiinda muli Mose,

²⁴ ono cacanika ayi bakabisha mukuteshiba, balyeelete kubenga mucende ayi ngumulambu wakutenta. Bweema bwa mulambu uyu bulansangalasha nebo neMwaami Lesa. Balyeelete kubikaawo acipo ca fulaulo alimwi aca cakunwa ceelete. Cakwiilikaawo nimpongo isankwa ayi ngumulambu wakulekelelwa shibiibi.

²⁵ Mpeeke mupailishi ulaakucita kweelana amulawo wakusalasha bene Isilaeli, abalo balaakulekelelwa mukwiinga tabakwe kubisha kashanga, alimwi bakaleta amulambu wakulekelelwa shibiibi shabo ayi ncipo ca cakulya kuli ndime neMwaami Lesa.

²⁶ Anu boonse bene Isilaeli alimwi abaswamashi bashiite pakati kabo balaakulekelelwa, mukwiinga boonse bakalinga kukumiteeko kucilubo ico.

²⁷ “Ono na muntu umwi wabisha cakuteshiba, ulyeelete kubenga mpongo yanakashi icite mwaaka womwi ayi ngumulambu wakulekelelwa shibiibi.

²⁸ Lyalo mupailishi ulaakucita kweelana amulawo wakusalasha pameenso angu nebo neMwaami Lesa, kwaamba ayi asalashe muntu kucibiibi cakwe, mpeeke ulaakulekelelwa.

²⁹ Anu mulawo weenka uyu ulaakunookumite kumuntu uli woonse wabisha cakuteshiba, mwine Isilaeli nabi muswamashi ushiite pakati kabo.

³⁰ “Sombi muntu uli woonse ubisha kashanga, mwine Isilaeli nabi muswamashi, ulyeelete kuba amulandu wakuncobola nebo neMwaami Lesa. Aboobo ulyeelete kukushikwa kubantu bangu,

³¹ mukwiinga wakaka sheesho nshendakaamba nebo neMwaami Lesa, alimwi wasotoka kashanga milawo yangu. Nkokwaamba ayi mulandu wa cibiibi cakwe wamucalila mwiine.”

Muntu wakasotoka mulawo wa bushiku bwa Cibelu

³² Paciindi ico bene Isilaeli ndibakalinga kucili muluyanga, muntu umwi wakacanikwa kaatepa nkuni pabushiku bwakookesha bwa Cibelu.

³³ Mpeeke abo bakamucana kaatepa nkuni, bakamutola kuli Mose, Aloni alimwi akubene Isilaeli boonse.

³⁴ Nkomunya uko bakamulama mukwiinga kabatana kwishiba kabotu cakumucita.

³⁵ Lyalo Mwaami Lesa wakaambila Mose ayi, “Muntu uyo ulyeelete kucaikwa. Bene Isilaeli boonse balyeelete kumucaya kumabwe pansengwe lya misumba.”

³⁶ Aboobo bene Isilaeli boonse bakamukusha pansengwe lya misumba akumucaya kumabwe, kweelana aMwaami Lesa mbwaakaambila Mose.

Milawo ya pamansambaala a pacakufwala ca peculu

³⁷ Mpomunyaawo Mwaami Lesa wakaambila Mose ayi,

³⁸ “Lwiita bene Isilaeli ayi, ‘Amupange mansambaala mumakonko a shakufwala shanu sha peculu, akubikako ntambo ya mushobo waliculu kumansambaala oonse. Mulyeelete kucita boobo mumashalane anu oonse atoosa.

³⁹ Mansambaala ayo alaakunoomwiibalusha milawo yangu neMwaami Lesa akwiikonkela lyoonse na mwaabona. Aboobo teshi mukakonkele lunkumbwa lwa myoyo yanu ameenso anu.

⁴⁰ Anu mansambaala aya alaakunoomwiibalusha kulama milawo yangu yoonse, mpeeke mulaakubetabo limwi bantu bangu neenka.

⁴¹ Nebo ndime Mwaami Lesa, Lesa wanu. Ndakamukusha mucishi ca Ijipiti ayi mbe Lesa wanu. Nebo ndime Mwaami Lesa.’ ”