Mateyo 24 - Baibo Busansulushi Bwa Libuku Ili

Jesu mbwaakaamba shakunyonyooka kwa Ŋanda yakwe Lesa

¹ Jesu ndyaakaswa muŊanda yakwe Lesa, bashikwiiya bakwe bakamutondesha mbuli mboyakayakwa kabotu Ŋanda iyo.

² Sombi Jesu wakabakumbula ayi, “Te mwashibona shoonse ishi? Ntoomulwiita calushinisho ayi taaku libwe nabi lyomwi lyeshi likacaale palibwenyina, oonse alaakumwayululwa.”

Makatasho alimwi amapensho

³ Jesu ndyaakalinga kushiite paKalundu ka Olifi, bashikwiiya bakwe bakaya kuli nguwe beenka akumwiipusha ayi, “Amutulwiite, ino shintu ishi shilaakucitika lili? Tulaakwishibila kunshi ayi ciindi cakwisa kwanu alimwi amamanino a cishi shashikila?”

⁴ Jesu wakabakumbula ayi, “Amucenjele kwaamba ayi kutakabi muntu nabi womwi eshi akamucenjeeke.

⁵ Mukwiinga bantu baanji balaakwisa muliina lyangu akunokwaamba ayi, ‘Ndime wooyo Usalitwe wakwe Lesa,’ alimwi balaakucenjeeka bantu baanji.

⁶ Mulaakunyumfwa nkondo ampuuwo sha nkondo, sombi mwebo mutakalisukami. Ishi shilaakucitika, sombi teshi kwaamba ayi ngomamanino a cishi.

⁷ Mushobo umwi ulaakubukila ubye, abwalo buleelo bulaakubukila bulelonyina. Kulaakuba nsala ashitentanshi mumisena ipusenepusene.

⁸ Shoonse ishi ngamatalikilobo a mapensho.

⁹ “Lyalo balaakumutola mukupenshekwa alimwi akumucaya. Bantu ba mishobo yoonse balaakumupata ceebo ca liina lyangu.

¹⁰ Ciindi ico, bantu baanji balaakucileka kushoma. Balaakutalika kulyaaba akupatana beene abeene.

¹¹ Kulaakwisa balaluki baanji babeshi abo beshi bakabece bantu baanji.

¹² Ceebo bubi bulaakufula, lyalo lusuno lwa bantu baanji lulaakuceya.

¹³ Sombi uyo eshi akayuminine kushikila kumamanino a mapensho aya, ulaakupulushikwa.

¹⁴ Lyalo Makani Abotu aya aamba shaBweene bwa kwiculu, alaakushimikilwa mucishi coonse kwaamba ayi akabe mbobukamboni kubantu boonse. Kuswawaawo, cishi ndyeshi cikamaane.

Cintu cilya Ciloondesha

¹⁵ “Aboobo, na mukabone Cintu cilya Ciloondesha ico ncaakaamba mulaluki mukulukulu Danyelo, kaciimfwi paMusena Usalalite (utoobelenga anyumfwishishe),

¹⁶ lyalo abo bali kuJudeya bakacicile kutulundu.

¹⁷ Uyo eshi akanooli paciluli ca ŋanda, atakaseluki kwaamba ayi akushe shili muŋanda yakwe.

¹⁸ Alakwe eshi akanooli mumuunda atakabooleli kuŋanda mukubwesa cakufwala ca peculu.

¹⁹ Mapensho kubanakashi beshi bakanooli pakati, abeshi bakanoocite baana bayamwa munshiku isho!

²⁰ Kamupaila kwaamba ayi kucica kwanu kutakabi ciindi ca mupewo, nabi bushiku bwakookesha bwa Cibelu.

²¹ Mukwiinga mapensho eshi akabeeko ciindi ico taakwe kubonekawo kale, kuswabo Lesa ndyaakalenga cishi ca panshi kushikila asunu. Ncakwiila teshi akabooleewo.

²² Nshiku isho sha mapensho neshitakwe kufwimpishikwa, naakwiinga taaku muntu nabi womwi wakacaala kaali muumi. Sombi ceebo ca baabo basalitwe, inshiku isho shilaakufwimpishikwa.

²³ “Ciindi ico, na umwi muntu akamwaambile ayi, ‘Amubone, Usalitwe wakwe Lesa uli kokuno,’ nabi umwi alakwe akamwaambile ayi, ‘Amubone, ngulya uli kokulya,’ mutakamunyumfwili.

²⁴ Mukwiinga abo balyaamba cakubeca ayi, ‘Ndi Usalitwe wakwe Lesa,’ nabi ayi, ‘Ndi mulaluki,’ balaakwisa. Balaakucita shitondesho sha nkusu sha kwiculu alimwi ashaankamiko kwaamba ayi bacenjeeke, na kacikonsheka, abaabo boonse mbwaakasala Lesa.

²⁵ Amunyumfwishe mukwiinga nebo ndamulwiitilabo limwi shintu shoonse kashitana kucitika.

²⁶ “Nabi na bantu bakamwaambile ayi, ‘Bana uli muluyanga,’ mutakaiiko. Nabi bamwi bakamwaambile ayi, ‘Usalitwe wakwe Lesa uliyubite muŋanda,’ mutakabanyumfwili.

²⁷ Ceebo MwanaaMuntu ulaakwisa bweenka mbuli kubeka kwa mfula mwiculu kuswa kwicwe akushika kumbo.

²⁸ “Kuli koonse kuli mutuntu, amakubi nkwaabungana.

Kwisa kwa Mwanaamuntu

²⁹ “Na akamanebo mapensho a nshiku isho, lisuba lilaakubabo munshinshe, mweenshi ulaakucileka kumunika, nyenyeenshi shilaakuloka kuswa mwiculu, ashalo nkusu sha mwiculu shilaakutenkaanishikwa.

³⁰ Lyalo kulaakuboneka citondesho ca MwanaaMuntu mwiculu, mpeeke bantu ba mishobo yoonse ya pacishi ca panshi balaakulila, ndyeshi bakabone MwanaaMuntu keesa mumakumbi ankusu alimwi abulemu bukankamika.

³¹ Kulaakunyumfwika lupeenga lwa nkusu, lyalo ulaakutuma baanjelo bakwe kwaamba ayi babunganye bantu bakwe basalitwe kuswa kwicwe, kumbo, kumalenge alimwi akumatwa kushikila cishi coonse mpociswa ampoceela.

Ciiyo ca cisamu ca mukuyu

³² “Amwiiye ciiyo kuswa pacisamu ca mukuyu. Na mwabona misampi ya ncico yatalika kutontolatontola, amatewu na atalika kusonsa, muleshiba ayi meensa ali pafwaafwi.

³³ Mbweeke ubo amwebo, na mukabone shintu shoonse ishi, mukeshibe kwaamba ayi MwanaaMuntu uli pafwaafwi kwisa, ingayi ulibo pamulyango.

³⁴ Ntoomulwiita calushinisho ayi shintu shoonse ishi shilaakucitika bantu boonse baliiwo bulya kabatana kumaninina kufwa.

³⁵ Liculu alimwi acishi ca panshi shilaakumana, sombi maswi angu teshi akamaneewo, sobwe.

Taaku ushi bushiku nabi ciindi

³⁶ “Sombi pamakani a bushiku bwakwisa nabi ciindi, taakuuwo nabi womwi ushi. Baanjelo boonse ba kwiculu tabeshi, nabi MwanaaMuntu teeshiiwo, sombibo baTa beenka.

³⁷ Kwisa kwa MwanaaMuntu kulaakuba bweenka mbuli mbocakalinga ciindi cakwe Nowa.

³⁸ Ceebo munshiku shakwe Nowa, muyoba kootana kwisa, bantu bakalinga kulya, kunwa akweebana, kushikila bushiku Nowa ndyaakenjila mubwaato.

³⁹ Taaku ncebakalinga kwishi kushikila maanshi ndyaakesa akubalobya boonse. Mbomunya ubo mbweshi cikabe pakwisa MwanaaMuntu.

⁴⁰ Paciindi ico na basankwa bobilo bakacanike mumuunda, umwi ulaakutolwa, sombi umwi ulaakucaala.

⁴¹ Banakashi bobilo balaakunoopela, umwi ulaakutolwa, sombi umwi ulaakucaala.

⁴² “Anu kamulibambitebo lyoonse, mukwiinga tamwishi bushiku Mwaami wanu ndyeshi akese.

⁴³ Sombi mwishibe ayi, na mwine ŋanda kaashi ciindi mashiku nceshi ashiteemo mwiipi, inga kaalashabo, kwaamba ayi atesi mukwiipa muŋanda yakwe.

⁴⁴ Paceebo ceeco, amwebo mulyeelete kunolibambite lyoonse ceebo MwanaaMuntu ulaakwisa paciindi ncemutamwiingashite.

Musebenshi ushomeka autashomeki

⁴⁵ “Ino nguli musebenshi ushomeka ucite maano? Ngooyo mwaami wakwe ngwaakapa mulimo wakubona babye, akunoobapa cakulya paciindi ceelete.

⁴⁶ Ulicite coolwe musebenshi uyo Mwaami wakwe ngweshi akacane kaasebensa boobo.

⁴⁷ Ntoomulwiita calushinisho ayi, mwaami wakwe ulaakumupa mulimo wakulama shintu shoonse nshaacite.

⁴⁸ Sombi na ngumusebenshi mubiibi ulaakuyeeya ayi, ‘Mwaami wangu wacelwa kwisa,’

⁴⁹ lyalo ulaakutalika kuuma basebenshinyina, kulya akunwa pantu pomwi abacakolwa.

⁵⁰ Lyalo mwaami wa musebenshi uyo ulaakwisa pabushiku mbwaatengashite alimwi aciindi ncaateshi.

⁵¹ Ulaakumupa mulandu akumuwaala kooko nkweshi kukanooli bantu baamba nshebataciti alimwi nkweshi bakanoolila akulumanya meeno.”