Mateyo 10 - Baibo Busansulushi Bwa Libuku Ili

Batumwi bakwe Jesu bali likumi abobilo

¹ Jesu wakabunganya bashikwiiya bakwe bali likumi abobilo, wabapa nkusu shakukusha bashikaswa alimwi akushilika malwashi apusenepusene.

² Meena abo ngaaya, Simoni wiitwa ayi Pita alimwi aAndulu mukwabo, Jemusi mwanaakwe Sebedi aJoni mukwabo,

³ Filipo aBatolomeyo, Tomasi aMateyo shikusonkesha, Jemusi mwanaakwe Alufeyasi aTadeyasi,

⁴ Simoni shikulwanina lwaanguluko alimwi aJudasi Isikalyoti uyo wakaaba Jesu.

Jesu mbwaakatuma bashikwiiya bakwe

⁵ Jesu wakatuma bashikwiiya likumi abobilo abo akubalwiita ayi, “Mutayi mukwinjila mucishi ca baswamashi bakunsengwe nabi mundabala ya bene Samaliya.

⁶ Sombi mulyeelete kuya kubene Isilaeli bali anga nimbelele shisowekete.

⁷ Kamuya mukashimikile ayi, ‘Bweene bwa kwiculu buli pafwaafwi.’

⁸ Mukashilike balwashi, mukabushe bafu, akushilika bashimanata, alimwi akukusha bashikaswa. Mwapekwabo, amwebo mukapebo.

⁹ Mutabwesi maali a golodi, a silifa nabi a mukuba mumpotomona shanu.

¹⁰ Mutanyamuni coola nabi kunyamuna cakufwala ca peculu acimwi, nsapato nabi nkoli ceebo musebenshi ulyeelete kulita pancito yakwe.

¹¹ “Ono na mwashika mundabala nabi mumushi uli woonse, mulyeelete kuyandoola muntu weenga wamutambula. Mukekaale kuli nguwe kushikila mukasweemo umo.

¹² Pakwinjila muŋanda mukaambe ayi, ‘Luumuno lube amwebo.’

¹³ Lyalo na bantu bali muŋanda iyo bamutambula, luumuno lwanu lukabe ambabo. Sombi na babula kumutambula, mukasweemo aluumuno lwanu.

¹⁴ Na kwabula muntu nabi womwi weenga wamutambula nabi kukutika maswi anu, pakuswaamo mukalipaampe lusuko kushimpanta.

¹⁵ Ntoomulwiita calushinisho ayi pabushiku bwakoomboloshekwa, Lesa ulaakupa ndabala iyo mulandu unene kwiinda Sodoma aGomola!

Mapensho atoosa

¹⁶ “Amubone, ntoomutuma anga nimbelele pakati kabaumpe, aboobo amucenjelele anga ninsoka akulibombya anga nimpolobe.

¹⁷ Mukabacenjelele bantu ceebo balaakumutola munkuta akumukwiipa mushoonde shabo.

¹⁸ Balaakumutola kubaleli abamaami ceebo ca liina lyangu, kwaamba ayi mukape bukamboni pameenso abo alimwi akubaswamashi bakunsengwe.

¹⁹ Ono na bakamwaange, mutakalisukami ayi, ‘Ino tukaambe buyani?’ nabi ayi, ‘Tukaambenshi?’ mukwiinga Lesa ulaakumupa nceshi mukaambe.

²⁰ Ceebo teshi ndimwe mweshi mukanokwaamba, sombi Mushimu wakwe Ishiwanu uli kwiculu ngweshi ukabe muli ndimwe.

²¹ “Muntu ulaakubenga mukwabo wa lifumo lyomwi ayi acaikwe, abalo bamaishiwabo balaakubenga bana babo. Abalo baana balaakubukila bamashali babo, akubacaisha.

²² Bantu boonse balaakumupata ceebo ca ndime. Sombi uyo eshi akayuminine kushikila kumamanino a mapensho aya, ulaakupulushikwa.

²³ Na bakamupenshe mundabala imwi, mukacicile kundabala imwi. Ntoomwaambila calushinisho ayi kamutana kumanisha mandabala oonse a muIsilaeli, MwanaaMuntu ulaakwisa.

²⁴ “Taaku muntu utokwiiya wiinda mufundishi wakwe alimwi taaku musebenshi wiinda mwaami wakwe.

²⁵ Anu uyo utokwiiya ulyeelete kuba bweenka mbuli mufundishi wakwe, alakwe musebenshi ulyeelete kuba mbuli mwaami wakwe. Ino na mwine ŋanda uleetwa ayi Bilusebulu, balo bekala muŋanda umo balaakweela kuli meena kubica?

Weelete kuloondwa

²⁶ “Aboobo mutaloondi bantu. Taaku cintu cifweketwe ceshi cikabule kufwekulwa, nabi cishisitwe ceshi cikabule kushibikwa.

²⁷ Isho nshentoomulwiita mumunshinshe mukashaambe lumwi lubala, asheesho nshemunyumfwa kumapela mukashaambile pameenso a bantu.

²⁸ Mutaloondi baabo bacayabo mubili, sombi tabacikoonshi kucaya muuya. Amuloonde Lesa ukonsha kucaya mubili amuuya woonse mumulilo utamaani.

²⁹ Sa te tuntiinga tobilo tuloolwa lyaali lyomwi? Sombi taaku kanga ntiinga nabi komwi nkeenga kalokela panshi kwakuteshiba Ishiwanu.

³⁰ Sombi mwebo amisusu ya mumitwi yanu yoonse ilibelengetwe.

³¹ Paceebo ceeco mutaloondi mukwiinga mwebo mulayandika kwiinda tuntiinga tuunji.

Shakusumina Jesu

³² “Uyo woonse weenga wansumina pameenso a bantu, anebo ndaakumusumina kuli baTa bali kwiculu.

³³ Sombi uyo weenga wankaka pameenso a bantu, anebo ndaakumukaka kuli baTa bali kwiculu.

Bantu balaakupansaana ceebo cakwe Jesu

³⁴ “Mutayeeyi ayi ndakesa mukuleta luumuno mucishi ca panshi. Nshikwe kuleta luumuno, sombi nkondo.

³⁵ Mukwiinga nebo ndakesa mukupansaanya mwaana musankwa abaishi, mwaana mwanakashi abanyina, alakwe mulokashi abapongoshi bakwe banakashi.

³⁶ Ono nkokwaamba ayi balwani ba muntu balaakuba baabo beenka mbwaakalaabo paŋanda.

³⁷ “Uyo woonse usuni baishi nabi banyina kwiinda ndime, taaelete kuba shikwiiya wangu. Uyo woonse usuni mwanaakwe musankwa nabi mwanakashi kwiinda ndime, taaelete kuba waangu.

³⁸ Uyo woonse utanyamuni mapensho akwe anga ngumucilingano akunkonkela, taaelete kuba waangu.

³⁹ Uyo woonse usunishi buumi bwakwe ulaakubusowa, sombi uyo usowa buumi bwakwe ceebo ca ndime, ulaakubucana.

Shilambu

⁴⁰ “Uyo woonse utambula ndimwe, ulatambula ndime alimwi uyo utambula ndime, ulatambula baTa abo bakantuma.

⁴¹ Uyo woonse utambula mulaluki wakwe Lesa ayi mukwiinga watumwa aLesa, alakwe ulaakutambula cilambu ca mutumwi. Uyo woonse utambula muntu ululeme ayi ceebo uliluleme, ulaakutambula cilambu ca bululami.

⁴² Uyo woonse upa nabi maanshi kuli womwi muniini wa baabo bankonkela, ayi mukwiinga ulankonkela, ncakwiila uyo teshi akabule cilambu.”