Maako 15 - Baibo Busansulushi Bwa Libuku Ili

Jesu mbwaakoomboloshekwa kuli Pilato

¹ Ndibwakaca macuunsacuunsa, bamatanjilili ba bapailishi, bamaloba, bafundishi ba Milawo alimwi abamwi boonse beendelesha nkuta, bakalifuyafuya pantu pomwi. Mpeeke Jesu bakamwaanga akumutola mumaansa akwe Pilato.

² Mpomunyaawo Pilato wakeepusha Jesu ayi, “Sa ndiwe Mwaami wa baJuda?” Jesu wakamukumbula ayi, “Mwacaamba nobeene.”

³ Lyalo bamatanjilili ba bapailishi bakabekesha Jesu shikani shiinji.

⁴ Pilato wakamwiipusha alimwi ayi, “Sa webo tocite cakwaambaawo pamakani aya? Nyumfwa shikani kufula nshebatookwaambila.”

⁵ Sombi Jesu taakwe kukumbulaawo alimwi, mpeeke Pilato wakacelemanabo.

Jesu mbwaakapingulwa kucaikwa

⁶ Pabushiku bwa Pasika bwakwiibaluka kusotokela, Pilato lyoonse wakalinga kwaangulula kaili womwi uli woonse ngweenga basenga.

⁷ Paciindi ico musankwa umwi wiitwa ayi Balabasi wakalinga muntolongo ababye bamwi abo bakabukila cishi akucaya bantu mucimfulunganya.

⁸ Bantu baanji bakabungana akusenga Pilato ayi abacitile bweenka mbuli mbwaacita lyoonse pabushiku bwa Pasika.

⁹ Lyalo Pilato wakabeepusha ayi, “Sa mulisuni ayi mwaangulwite Mwaami wa baJuda?”

¹⁰ Mukwiinga Pilato wakalinga kwishi ayi bamatanjilili ba bapailishi bakatola Jesu kuli nguwe ceebo bakamufwita munyono.

¹¹ Sombi bamatanjilili ba bapailishi bakayungoola bantu kusenga Pilato ayi abaangulwite Balabasi mumusena wakwe Jesu.

¹² Pilato wakeepusha bantu alimwi ayi, “Ino ntoomucita buyani uyu ngomwiita ayi Mwaami wa baJuda?”

¹³ Lyalo bantu boonse bakoolobesha ayi, “Aapopwe pamucilingano!”

¹⁴ Pilato wakabeepusha ayi, “Ino ncibiibinshi ncaacita?” Lyalo bakeendilishaawo koolobesha ayi, “Aapopwe pamucilingano!”

¹⁵ Ono Pilato mukusuna ayi asangalashe bantu, wakabaangulwita Balabasi. Mpeeke Pilato wakaamba ayi Jesu akwiipwe misako. Kuswawaawo, wakamwaaba kubashilumamba ayi apopwe pamucilingano.

Bashilumamba mbobakaseka akuweluluka Jesu

¹⁶ Bashilumamba bakatola Jesu akumwinjisha muŋanda ya Mweendeleshi, akubunganya bashilumambanyinaabo bamwi boonse.

¹⁷ Mpomunyaawo bakamufwalika cisani cifubelafubela, bapanga mushini wa myuumfwa akuubika pamutwi wakwe.

¹⁸ Lyalo bakatalika kumwaansha anga nkumulemeka ayi, “Waboneka oMwaami wa baJuda!”

¹⁹ Kuswawaawo bakatalika kumuuma mumutwi akasako, kumushipila mate alimwi akunoofukama panshi, kumulemeka cakubeca.

²⁰ Ndibakamana kumuseka akumuweluluka boobo, bakamufuula cisani cifubelafubela cilya akumufwalika shakufwala shakwe. Lyalo Jesu bakamutola kuya mukumupopa pamucilingano.

Jesu mbobakamupopa pamucilingano

²¹ Ndibakalinga kuya munshila, bashilumamba bakakumanya musankwa umwi wiitwa ayi Simoni wa kuSailini kaaswa mumishi. Mpeeke bashilumamba bakamukakatisha ayi anyamune mucilingano wakwe Jesu. (Simoni wakalinga ngoishi Alekisanda aLufasi.)

²² Lyalo Jesu bakamutola kumusena wiitwa ayi Gologota (nkokwaamba ayi musena wa cifuwa ca mutwi.)

²³ Bakeelesha kumupa waini ngobakasenkanya andulwe, sombi Jesu wakakaka kunwa.

²⁴ Mpomunyaawo bakamupopa pamucilingano akwaabana shisani shakwe mukuuma cisolo ayi babone womwi awomwi cisani nceshi atole.

²⁵ Ndibakamupopa pamucilingano ciindi cakalinga 9 koloko macuunsa.

²⁶ Maswi akalinga kutondesha ncebakacaila Jesu akalinga kulembetwe ayi, “Mwaami wa baJuda.”

²⁷ Jesu bakamupopa pakati pamicilingano ya beepi bobilo, umwi kulyaansa lyalulyo aumwi kucipiko. [

²⁸ Nkokwaamba ayi makani aya akacitika kweelana ambokulembetwe muMalembo akwe Lesa ayi, “Alakwe bakamubelengela pantu pomwi abamucita shibi.”]

²⁹ Mpeeke bantu bakalinga kwiindilaako, bakalinga kupukumunabo mitwi akunoocobola Jesu kabaamba ayi, “Amubone! Webo ndiwe wakalinga kwaamba ayi ulaakumwayulula Ŋanda yakwe Lesa akwiiyaka alimwi munshiku shotatwe.

³⁰ Ono lipulushe omwiine tubone. Seluka pamucilingano.”

³¹ Abalo bamatanjilili ba bapailishi alimwi abafundishi ba Milawo bakatalika kumuseka, kabaambooshanya bene ayi, “Wakalinga kupulusha bamwi, sombi waalilwa kulipulusha mwiine.

³² Atumubone Usalitwe wakwe Lesa, mwaami wa bene Isilaeli aseluke kuswa pamucilingano kwaamba ayi tushome.” Abalo abo mbwaakapopwaabo bakalinga kumutukana.

Jesu mbwaakafwa

³³ Lisuba ndilyakashika pakati ka mutwi, kwakaba munshinshe mucishi coonse kushikila 3 koloko malumwi.

³⁴ Paciindi ca 3 koloko peenka, Jesu wakoolobesha aliswi lya peculu ayi, “Eloi, Eloi, lama sabakatani?” Nkokwaamba ayi, “NobaLesa bangu, nobaLesa bangu, ino nciinshi ncemwandekeleshesha?”

³⁵ Ono bamwi abo bakalingaawo, ndibakanyumfwa maswi aya, bakaamba ayi, “Amunyumfwe utokwiita Elija.”

³⁶ Umwi mulikoto lyabo wakacica akubwesa mweepu akuusumpa muwaini ulula usashite. Lyalo wakabwesa kasako akubikako mweepu kwaamba ayi ape Jesu anwe. Mpeeke wakaamba ayi, “Atulindile tubone na Elija utoosa mukumuselushaawo pamucilingano.”

³⁷ Jesu wakoolobesha akutama aliswi lya peculu, watula moyo.

³⁸ Mpeeke cisani cakalinga kushitilisha muŊanda yakwe Lesa cakakwaamuka pakati, kuswa peculu tibili apanshi.

³⁹ Munene wa bashilumamba mwaanda wakalinga kwiimfwi pafwaafwi kaalangene aJesu. Ndyaakabona mbuli mbwaakafwa, wakaamba ayi, “Ncakwiila uyu muntu wakalinga Mwanaakwe Lesa!”

⁴⁰ Pakalinga abanakashi bamwi bakalinga kweebela palaale. Mulikoto lyabo mwakalinga Maliya wa kuMagadala, Maliya banyina Jemusi mwanikebantu aJosesi alimwi aSalomi.

⁴¹ Banakashi aba bakalinga kwisa cikonkela Jesu alimwi akumucafwa ndyaakalinga mucishi ca Galili. Pakalinga abamwi banakashi baanji mbaakesaabo kuJelusalemu.

Jesu mbwaakabikwa mucuumbwe

⁴² Pabushiku bwakulibambila (nkokwaamba ayi ciilo mbushiku bwakookesha bwa Cibelu) macolesha,

⁴³ Josefu wa kuAlimateya, mweendeleshi ulemekwa munkuta ya baJuda, wakalinga kulangilabo Bweene bwakwe Lesa. Muntu uyu wakaya kuli Pilato cakubula boowa mukusenga mutuntu wakwe Jesu.

⁴⁴ Pilato wakakankamana pakunyumfwa ayi Jesu wafwa kale. Lyalo wakeeta munene wa bashilumamba mwaanda, akumwiipusha na Jesu wafwa kalekale.

⁴⁵ Ono ndyaakanyumfwa kumunene uyo ayi ncakwiila Jesu wafwa, Pilato wakasuminisha Josefu ayi aubwese mutuntu.

⁴⁶ Mpomunyaawo Josefu wakoola cisani cituba, waselusha mutuntu pamucilingano akuupombela acisani. Lyalo wakoobika mucuumbwe ncaakakabwa mulibwe, akukunkulushilawo libwe linene pamulyango wa cuumbwe.

⁴⁷ Maliya wa kuMagadala alimwi aMaliya banyina Josesi bakalingaawo akubona mbobakabika mutuntu wakwe Jesu.