Luka 21 - Baibo Busansulushi Bwa Libuku Ili

Cipo ca mwanakashi mukalubinje

¹ Jesu ndyaakalangalanga wakabona bantu babile kababika shipo shabo mucakubikaamo shipo sha maali ca muŊanda yakwe Lesa.

² Wakabona amwanakashi mukalubinje mukandu kaabikaamo tumaali twa mukuba tobilo.

³ Lyalo wakaamba ayi, “Ntoomulwiita calushinisho ayi uyu mukalubinje mukandu wabikamo bupe bwiinda bwa bamwi boonse

⁴ mukwiinga boonse balikukusha pamaali aanji ngobacite, sombi lakwe mubukandu bwakwe wabikamo maali oonse ngaali kucite muŋanda yakwe.”

Jesu mbwaakaamba shakunyonyoolwa kwa Ŋanda yakwe Lesa

⁵ Bashikwiiya bakwe Jesu bamwi bakalinga kwaamba pamakani a Ŋanda yakwe Lesa, mbuli mbweeyakitwe amabwe abotu ashipo shikankamika shakapekwa mukulemeka Lesa. Mpeeke Jesu wakaamba ayi,

⁶ “Ishi shoonse nshemubwene, cilaakushika ciindi ndyeshi kukabule libwe nabi lyomwi palibwenyina. Mabwe oonse alaakumwayululwa.”

Makatasho alimwi amapensho

⁷ Lyalo bashikwiiya bakeepusha ayi, “Bafundishi, ino ishi shilaakucitika lili alimwi tulaakwishibila kunshi ayi shintu shoonse ishi shitooyanda kucitika?”

⁸ Jesu wakaamba ayi, “Amucenjele kwaamba ayi kutakabi muntu nabi womwi eshi akamucenjeeke. Mukwiinga bantu baanji balaakwisa muliina lyangu kabaamba ayi, ‘Ndime wooyo Usalitwe wakwe Lesa!’ alimwi ayi, ‘Ciindi cashikila!’ Mutakabakonkeli.

⁹ Mwaakunyumfwa makani a nkondo alimwi ashimfulunganya mushishi, mutakaloondi. Ishi shintu shilyeelete kutaanguna kucitika, sombi tashaambi ayi mamanino a cishi ali pafwaafwi.”

¹⁰ Mpeeke Jesu wakatolelela kubaambila ayi, “Mushobo umwi ulaakubukila ubye, abwalo buleelo bulaakubukila bulelonyina.

¹¹ Kulaakuba shitentanshi shiyoosha, nsala, malwashi mumisena ipusenepusene. Kulaakucitika shintu shiloondesha ashitondesho shikankamika kuswa kwiculu.

¹² Sombi shoonse ishi kashitana kucitika, mulaakwaangwa akupenshekwa. Mulaakutolwa mushoonde sha baJuda mukoomboloshekwa akubikwa muntolongo. Mulaakwiimikana kunembo lya bamaami abaleli ceebo ca liina lyangu.

¹³ Ici cilaakuba nceciindi ca kwaambilisha Makani Abotu pameenso abo.

¹⁴ Ono mutakalisukami mumyoyo kuyeeya mbweshi mukaambe

¹⁵ mukwiinga ndaakumupa maswi a busongo bwakwaamba ayi taaku mulwani wanu eshi akacikoonshe kwaakaka nabi kupikisha.

¹⁶ Abashali banu boonse, bamakwabanu, beshikamukowa ababyaanu balaakumwaaba kubalwani, bamwi pakati kanu balaakucaikwa.

¹⁷ Bantu boonse balaakumupata ceebo ca liina lyangu.

¹⁸ Nakubi boobo taaku mususu nabi womwi weshi ukakushikwe mumitwi yanu.

¹⁹ Kwiinda mukushoma cakutaboola pesule mulaakutambula buumi bwancinencine.

Jesu mbwaakaamba shakunyonyoolwa kwa Jelusalemu

²⁰ “Mwaakubona ayi ndabala inene ya Jelusalemu yashingulukwa abashilumamba, mukeshibe ayi kunyonyoolwa kwa njiyo kuli pafwaafwi.

²¹ Lyalo abo bali muJudeya bakacicile kutulundu. Abo beshi bakanooli mukati mundabala inene bakasweemo, abalo abo beshi bakanooli mumishi batakenjiliimo mundabala inene iyi.

²² Mukwiinga ici cilaakuba ciindi Lesa ndyeshi akaboneshe bantu bakwe ayi bakabisha kwaamba ayi shoonse shilembetwe muMalembo akwe Lesa shicitike cancinencine.

²³ Mapensho kubanakashi beshi bakanooli pakati abeshi bakanoocite baana bayamwa munshiku isho. Mukwiinga mapensho anene alaakuba mucishi ca panshi alimwi bukali bwakwe Lesa bulaakuba pabantu aba bene Isilaeli.

²⁴ Bamwi balaakuyaswa amipeeni alimwi balaakutolwa busha kushishi shimwi. Lyalo Jelusalemu ilaakulyatoolwa abaswamashi bakunsengwe kushikila ciindi cabo cikamaane.

Kwisa kwa MwanaaMuntu

²⁵ “Kulaakuba shitondesho kulisuba, kumweenshi akunyenyeenshi. Pacishi ca panshi, bantu balaakulisukama akuloonda abuumbi mushishi shoonse, pakunyumfwa kuwoota kwa lweenge amaaba.

²⁶ Bantu balaakuwisuka ceebo ca boowa pakunoolangila ceshi cikese mukucitika mucishi ca panshi coonse mukwiinga nkusu sha kwiculu shilaakutenkaanishikwa.

²⁷ Lyalo balaakubona MwanaaMuntu keesa mulikumbi ankusu alimwi abulemu bukankamika.

²⁸ Ono na shintu ishi shikatalike kucitika, mukanyamuke akwiinuna mitwi yanu ceebo kulubulwa kwanu kuli pafwaafwi.”

Ciiyo ca cisamu ca mukuyu

²⁹ Mpomunyaawo Jesu wakabaambila cikoshanyo ayi, “Amuyeeye mukuyu ashisamu shimwi shoonse.

³⁰ Na mwaboona matewu atalika kusonsa, muleshiba ayi meensa ali pafwaafwi.

³¹ Mbweeke ubo amwebo na mukabone shintu ishi kashicitika, mukeshibe kwaamba ayi Bweene bwakwe Lesa buli pafwaafwi.

³² “Ntoomulwiita calushinisho ayi shintu shoonse ishi shilaakucitika bantu boonse baliiwo bulya kabatana kumaninina kufwa.

³³ Liculu alimwi acishi ca panshi shilaakumana, sombi maswi angu teshi akamaneewo, sobwe.

Ceebo cinene ncemweelete kwikala kamulibambite

³⁴ “Amucenjele kwaamba ayi mutabi bantu basunibo kulya mumibala, bacakolwa alimwi balisukamabo shintu sha buumi bwa panshi pano mukwiinga inga bushiku bulya bwamucana kamutalibambite.

³⁵ Bushiku ubo bulaakwisa bweenka mbuli koose akucata bantu boonse ba mucishi ca panshi.

³⁶ Amwikale kamulibambite lyoonse, kamupaila ayi mube ankusu shakwiinda musheeshi shintu sheshi shikacitike kwaamba ayi mukeemikane kunembo lya MwanaaMuntu.”

³⁷ Munshiku isho, Jesu wakalinga kwiisha muŊanda yakwe Lesa, sombi macolesha lyoonse wakalinga kuya kuKalundu ka Olifi akwikala kweenka kulya kushikila bwaca.

³⁸ Mpeeke macuunsacuunsa bantu baanji bakalinga kuya kuŊanda yakwe Lesa kwaamba ayi bakakutike kwiisha kwakwe.