Kulumbaisha 73 - Baibo Busansulushi Bwa Libuku Ili

LIBUKU LYATATU (Kulu 73—89) Koombolosha kwakutanyengelela kwakwe Lesa

Lwiimbo lwakwe Asafu.

¹ Ncakwiila Lesa ngumubotu kubene Isilaeli, kubantu batacite kampenda.

² Nebo pakacaalabo paniini kuwa mukucileka kushoma. Myeendo yangu pakacaalabo paniini kutelemuka,

³ mukwiinga ndakakumbwa camunyono kubalisumpula. Ee, ndindakabona bantu babiibi batalika kubila.

⁴ Balo abo tabaciiswi, sobwe. Mbayumu alimwi baleendela buumi.

⁵ Tabacite mapensho aanji mbuli bamwi, tabacite makatasho mbuli bamwi bantu.

⁶ Balafwala kulisumpula anga mbulungu bwa munshingo, alimwi kunyonyongana kwabafwekelesha anga cakufwala ca peculu.

⁷ Mumyoyo yabo mulaswa shibiibi, kuyeeya kwabo nkwa shintu shitaluleme.

⁸ Balaseka bantu bamwi akwaamba shintu shibiibi. Balalisumpula akupangana kulyatilila bamwi.

⁹ Balaamba shintu shibiibi kuli Lesa kwiculu, cishi caba cabo kwiinda mumilaka yabo.

¹⁰ Paceebo ceeco bantu bakwe Lesa balasandukila kuli mbabo, alimwi balakuta makani aambwa anga ngamaanshi akunwa.

¹¹ Balaamba ayi, “Ino Lesa inga weshiba buyani? Sa Lesa Shinkusu shoonse inga weshiba shintu shoonse?”

¹² Amubone bantu babiibi mbobabete. Balo lyoonse balaba ashiinji alimwi balabililaawo.

¹³ Nebo ndabamba moyo wangu ayi unoosalalite, ndasamba kumaansa kubonesha ayi nshicite cibiibi. Sombi shoonse ishi tashikwe kuba ampindu kuli ndime

¹⁴ mukwiinga ndacana mapensho lyoonsebo. Macuunsa kulila bwaca ndapenshekwa.

¹⁵ Nindakaamba ayi, “Ndaakwaamba bwakaamba bamucita shibi abo,” naakwiinga ndabishisha bantu banu.

¹⁶ Ndindakeelesha kunyumfwisha shintu ishi, sombi shakanjumina abuumbi kushinyumfwisha

¹⁷ kushikila ndindakenjila mumusena usalalite wakwe Lesa. Lyalo ndakeshiba kweshi kukaye bamucita shibi.

¹⁸ Ncakwiila bamucita shibi mwebo mulaakubatola pabuteshi. Mulaakubawisha kushikila balo bakanyonyooke.

¹⁹ Balaakunyonyoolwa cakufwambaana, lufu luyoosha lulaakubapyanga boonse!

²⁰ Bweenka bulubwa ciloto na muntu wabuka macuunsa, mbweshi bakaloobe bamucita shibi na noBaami baLesa mukabuke.

²¹ Ndindakapenga amiyeeyo, moyo wangu ndiwakaciswa abuumbi,

²² ndakalinga muluya utanyumfwi, ndakababo anga ngumunyama kuli ndimwe.

²³ Nakubi boobo ndaba amwebo lyoonsebo. Mwebo mulancata kulyaansa lyalulyo.

²⁴ Mulantanjilila amilasho yanu nobeene, kumamanino mulaakunjisha mubulemu bwanu.

²⁵ Ino ngani ngoonshi kwiculu kwiinda ndimwe? Apalo pacishi ca panshi taaku ngoonsuni kwiinda ndimwe.

²⁶ Mubili abuumi bwangu shilaakumana. Sombi Lesa nshenkusu shangu, ngoompa shiyandika shoonse mubuumi bwangu.

²⁷ Abo boonse bali kulaale amwebo balaakuloba, Ncakwiila mulaakunyonyoola abo boonse batashomeki kuli ndimwe.

²⁸ Sombi nebo ndikondetwe kuba pafwaafwi aLesa. Mwaami Lesa Shinkusu shoonse waba nceciyubilo cangu. Ncakwiila nebo ndaakushimikila shamicito yakwe yoonse.