Kulumbaisha 30 - Baibo Busansulushi Bwa Libuku Ili

Mupailo wakulumba

Lwiimbo lwakwe Defedi lwakwiimba pakubenga Ŋanda yakwe Lesa kuli Lesa mwiine.

¹ Ndamulumbaisha noBaami baLesa mukwiinga mwakampulusha, alimwi mwakakasha balwani bangu kusamwa ceebo ca ndime.

² NoBaami baLesa, baLesa bangu ndakamulilila ayi muncaafwe, ncakwiila mwebo mwakanshilika.

³ NoBaami baLesa mwakampulusha kuswa kucuumbwe. Mwakamfuna ayi ntayi kumusena wa bafu.

⁴ Amwiimbe nyimbo shakulumba Mwaami Lesa mwebo noonse nobantu bakwe, mulumbaishe liina lyakwe lisalalite.

⁵ Bukali bwakwe mbwa ciindi ciniinibo, sombi luse lwakwe ndwa lyoonse alyoonse. Ee, kulila inga kwaba mashiku oonse, sombi kukondwa kulesa macuunsa na bwaca.

⁶ Shintu ndishakanyendela kabotu ndakaamba ayi, “Teshi nkakomweewo napaceyi.”

⁷ NoBaami baLesa, ndimwakalinga kuncafwa muluse lwanu, ndakalinga kushimpite anga nkalundu. Sombi ndimwakamfutatila ndakenjilwa boowa.

⁸ Mpomunyaawo ndakalila kuli ndimwe noBaami baLesa, ndushinisho kuli ndimwe ndakasenga ayi muncaafwe.

⁹ Ndakapaila ayi, “Ino nimpindunshi ili mukucaya ndime? Ino nimpindunshi ili mukuya kumusena wa bafu? Sa bantu bafwite balakonsha kumulumbaisha? Sa bulongo bulakonsha kwaambilisha kushomeka kwanu kutamaani?

¹⁰ Amunkutike noBaami baLesa akunyumfwila nkumbu, NoBaami baLesa amuncaafwe.”

¹¹ Mwakapilula kulila kwangu ayi kube kushana. Ncakwiila mwakankusha buumba akundetela kusangalala.

¹² Aboobo teshi nkoomune, sombi ndaakunoomwiimbila lyoonse. NoBaami baLesa, baLesa bangu, ndaakunoomulumba kwalyoonse alyoonse.