Kulumbaisha 12 - Baibo Busansulushi Bwa Libuku Ili

Mupailo wakusenga lucafwo

Kumutanjilili wa bwiimbi. Lwiimbwe kweelana asheminiti. Lwiimbo lwakwe Defedi.

¹ Amucafwe ono nobaLesa, mukwiinga taaku wacaala munshila shabulesa, alimwi taaku wacaala ucishomeka pakati ka bantu boonse.

² Womwi awomwi ulabeca shikamukobonyina. Balalumbaisha cakubeca akwaamba camyoyo yobilo.

³ NoBaami baLesa amuumushe milomo ilumbaisha cakubeca. Amucale milomo iyo yaamba shakulisumpula ayi,

⁴ “Shintu shoonse nshetusuni tulashicanabo kwiinda mumulaka. Tulakonsha kwaamba cili coonse kwakubula utukasha.”

⁵ Ono Mwaami Lesa waamba ayi, “Ceebo cakwaamba ayi balefukite balyatililwa, ceebo cakwaamba ayi bakandu batongela, ntoonyamuka akubafuna kweelana ambobatoolila.”

⁶ Ee, kushomesha kwa Mwaami Lesa takucite kampenda. Kulibo anga ngusilifa wakeenshikwa mumunyumbi mankanda osanwe aobilo.

⁷ Ncakwiila nobaami baLesa amucite bweenka ubo. Amutufuune lyoonse alyoonse kubantu bamushobo uyu.

⁸ Bamucita shibi balibo koonse koonse, alimwi boonse balalumbaisha shibiibi.