Joni 15 - Baibo Busansulushi Bwa Libuku Ili

Jesu ngomunyansa wancinencine

¹ “Nebo ndi munyansa wancinencine alimwi baTa mbobene muunda.

² Balatimbula musampi uli woonse muli ndime utacati shisepo, sombi musampi uyo ucata shisepo balaukwesoola misampi yamweela kwaamba ayi ube kabotu akucata shisepo shiinji kwiindaawo.

³ Mwebo mwasalashikwa kale kwiinda mumaswi ngondamwaambila.

⁴ Amukalilile muli ndime anebo ndaakukalilila muli ndimwe. Taaku musampi utabete kucinyina weenga wacata shisepo. Inga wacatabo shisepo na kooli kucinyina. Mbweeke ubo amwebo tamukoonshi kucata shisepo na mwabuula kukalilila muli ndime.

⁵ “Nebo ndi munyansa, mwebo muli misampi. Uyo woonse ukalilila muli ndime anebo muli nguwe, ulaakucata shisepo shiinji. Ceebo kwakubula ndime taaku nceenga mwaciita.

⁶ Na umwi wabula kukalilila muli ndime, ulasowekwa bweenka mbuli musampi watemwa, aboobo ulayuma. Misampi ya mushobo uyo ilabunganishikwa akuwaalwa mumulilo yapya.

⁷ Na mwakalilila muli ndime aalo maswi angu akalilila muli ndimwe, inga mwaseenga cili coonse ncemusuni, mulaakupekwa.

⁸ Na kamucata shisepo shiinji, ico inga caletela bulemu baTa, alimwi cilaakutondesha ayi muli bashikwiiya bangu bancinencine.

⁹ Bweenka mbuli baTa mbobansuni, mboomusuni amwebo. Aboobo amukalilile mulusuno lwangu.

¹⁰ Na mulakonkela milawo yangu, mulaakukalilila mulusuno lwangu, bweenka mbuli mboonkonkela milawo ya baTa akukalilila mulusuno lwabo.

¹¹ “Ndamulwiita shintu ishi kwaamba ayi kusangalala kwangu kube muli ndimwe alimwi akwaamba ayi kusangalala kwanu kushikeewo.

¹² Mulawo wangu ngooyu, amusunane bweenka mboomusuni anebo.

¹³ Taaku lusuno lunene muntu ndweenga wabaalo kwiinda loolu lwakwaamba ayi aabe buumi bwakwe ceebo ca babye.

¹⁴ Na kamukonkela kwiisha kwangu, nkokwaamba ayi muli babyaanji.

¹⁵ Teshi kamwiiteewo ayi basebenshi ceebo musebenshi taashibi shitoocita mwaami wakwe. Sombi ntoomwiita ayi babyaanji ceebo shoonse nshendakanyumfwa kuli baTa, ndakamulwiita.

¹⁶ Teshi ndimwe mwakansala, sobwe. Sombi ndime ndakamusala kwaamba ayi mukacate shisepo isho shitaloobi. Lyalo baTa balaakumupa cili coonse nceshi mukasenge muliina lyangu.

¹⁷ Anu mulawo wangu ngwakwaamba ayi musunane.

Bantu bamucishi ca panshi mbobapata bene Klistu

¹⁸ “Na bantu bamucishi bakamupaate, mukashibe ayi bakataanguna kupata ndime.

¹⁹ Nemwalinga kwikala mbuli bamucishi ca panshi naakwiinga kabamusuni. Ono mukwiinga mwebo tamubete bamucishi, sombi ndakamusala kuswa muli ncico, balimupatite.

²⁰ Amwiibaluke maswi ngondakamwaambila ayi, ‘Musebenshi taindi mwaami wakwe.’ Na nebo bakampensha amwebo balaakumupensha. Na bakakonkela kwiisha kwangu amwebo kwiisha kwanu balaakukukonkela.

²¹ Sombi balaakucita shintu shoonse ishi pali ndimwe ceebo ca liina lyangu mukwiinga tabamwishi uyo wakantuma.

²² Nintakwe kwisa mukubaiisha, naakwiinga tabacite mulandu pacibiibi cabo, sombi tabacite amwakuyubila.

²³ Uyo upatite ndime ulipatite abaTa.

²⁴ Nintakwe kucita shintu pali mbabo isho shitana kucitawo kale muntu nabi womwi, naakwiinga tabacite mulandu pacibiibi cabo. Nabi bakabona shintu shoonse ishi, bakatupata soonse, nebo abaTa.

²⁵ Ishi shakacitika kweelana ambokulembetwe muMilawo yabo ayi, ‘Bakampatabo pataapu ceebo.’

²⁶ “Ono aakwisa Mucafwi, ngweshi nkamutumine kuswa kuli baTa, Mushimu wiisha shalushinisho uyo uswa kuli baTa, ngweshi akasansulule shapali ndime.

²⁷ Amwebo muli bakamboni bangu mukwiinga mwekala anebo kuswa kumatalikilo.