Jelemiya 35 - Baibo Busansulushi Bwa Libuku Ili

Jelemiya abene Lekabu

¹ Ono Jeoiyakimu mwanaakwe Josiya ndyaakalinga mwaami wa bene Juda, Mwaami Lesa wakaamba kuli ndime neJelemiya ayi,

² “Koya kumukowa wa bene Lekabu ukabataambe ayi bakese kucipinda cimwi ca kulubasu lwa Ŋanda yangu. Lyalo ukabape waini ayi bakanwe.”

³ Mpomunyaawo ndakaya mukuleta Jaasaniya mwanaakwe Jelemiya umwi uyo wakalinga mwanaakwe Abasiniya, bamakwabo abana bakwe boonse, nkokwaamba ayi mukowa wa bene Lekabu boonse.

⁴ Lyalo boonse ndakabaleta muŊanda ya Mwaami Lesa akubenjisha mucipinda ca bana bakwe Anani mwanaakwe Igidaliya muntu wakwe Lesa. Cipinda ici cakalinga kubambene acipinda ca bacinenenene. Cipinda ici cakalinga peculu lya cipinda cakwe Maseiya mwanaakwe Shalumu shikulindilila mulyango wa Ŋanda yakwe Lesa.

⁵ Mpeeke ndakabamba mbale shifongomene shiswite waini alimwi ankomeshi kunembo lya basankwa abo bene Lekabu akubaambila ayi, “Amunweko waini uyu.”

⁶ Sombi balo bakankumbula ayi, “Swebo tatunwiiwo waini ceebo mushali wesu mukulukulu Jonadabu mwanaakwe Lekabu wakatulwiita ayi swebo nabi bamulunyungu lwesu tatweelete kunwa waini.

⁷ Wakatukasha akuyaka maanda, kulima myuunda imwi, kushanga myuunda ya minyansa nabibo kuba acintu nabi comwi pashintu ishi. Sombi tulyeelete kunookalabo mumatente. Twaakucita boobo, ndyeshi tukekaale ciindi cilaamfu mucishi umo motwiingeelabo.

⁸ Aboobo twakanyumfwila shoonse mushali wesu mukulukulu Jonadabu mwanaakwe Lekabu nshaakatwaambila. Taakuuwo nabi womwi pabamakeesu, bana besu basankwa nabi banakashi unwa waini.

⁹ Taaku nabi womwi pakati kesu wakayakawo kale ŋanda ya kwikalaamo, wakabawo kale amuunda wa minyansa, myuunda imwi nabi shishango shimwi.

¹⁰ Swebo twakalinga kwikalabo mumatente alimwi twakalinga kunyumfwila cakumaninina shoonse mushali wesu mukulukulu Jonadabu nshaakatwaambila.

¹¹ Sombi ciindi Nebukadinesa mwaami wa bene Babiloni ndyaakalwana cishi cino, swebo twakaamba ayi, ‘Katiya kuJelusalemu tucice bashilumamba bene Babiloni abene Silya.’ Nceceeco ncetushiitile muJelusalemu.”

^12-13 Mpomunyaawo Mwaami Lesa Shinkusu shoonse, Lesa wa bene Isilaeli wakaamba kuli ndime neJelemiya ayi, “Koya ukaambile bene Juda alimwi abene Jelusalemu ayi, ‘Ceebonshi mwakaaka kunkutika nabi kunyumfwila kwiisha kwangu?

¹⁴ Bamulunyungu lwakwe Jonadabu bakanyumfwila mulawo wakwe wakutanwa waini. Ncakwiila abobulya taaku uunwaawo. Nebo ndalinga kumupa milawo yangu, sombi mwebo tamukwe kunyumfwilaawo.

¹⁵ Ono nebo ndicitekobo kumutumina basebenshi bangu balaluki. Boonse abo bakalinga kumulwiita ayi muleke nshila shanu shibiibi amicito yanu ibiibi. Bakamucenjesha ayi mucileeke kulambila akusebensela balesa bamwi kwaamba ayi mukatolelele kwikala mucishi ico ncendakamupa mwebo alimwi abamashali banu bakulukulu. Sombi mwebo tamukwe kunyumfwila nabi kubikako maano kusheesho nshendakaamba.

¹⁶ Bamulunyungu lwakwe Jonadabu mwanaakwe Lekabu bakanyumfwila mulawo wakabapa mushali wabo mukulukulu, sombi mwebo tamukwe kunyumfwilaawo, sobwe.

¹⁷ Paceebo ceeco nebo neMwaami Lesa Shinkusu shoonse, Lesa wa bene Isilaeli ndaakuletela nobene Juda anobene Jelusalemu mapensho ayo oonse ngondakashomesha kucita. Ndaakucita boobo ceebo tamukwe kunyumfwila ndindakalinga kumwaambila alimwi tamukwe kukumbula ciindi ndindakalinga kumwiita.’ ”

¹⁸ Mpeeke nebo neJelemiya ndakalwiita bamumukowa wa bene Lekabu ayi Mwaami Lesa Shinkusu shoonse, Lesa wa bene Isilaeli wakaamba ayi, “Mwebo mwakanyumfwila mulawo uyo wakamupa Jonadabu mushali wanu mukulukulu, mwakakonkela kwiisha kwakwe koonse alimwi akucita shoonse isho nshaakamwaambila kucita.

¹⁹ Paceebo ceeco nebo neMwaami Lesa, Lesa wa bene Isilaeli, ntooshomesha kwaamba ayi Jonadabu mwanaakwe Lekabu ulaakunoocite musankwa wamulunyungu lwakwe shikunsebensela lyoonsebo.”