Bene Loma 15 - Baibo Busansulushi Bwa Libuku Ili

Tulyeelete kukondelesha bamwi kuteshi ndiswe sobeene

¹ Swebo netushoma cancinencine tulyeelete kucafwa batana kushoma bunene ayi batolelele mulushomo lwabo. Tatweelete kucitabo shintu shitukondelesha.

² Sombi uli woonse pakati kesu ulyeelete kukondelesha muKlistunyina akumucitila shintu shibotu kwaamba ayi amuyuumye mulushomo.

³ Ceebo Klistu taakwe kulikondelesha mwiine, sombi kweelana abwaamba Malembo akwe Lesa ayi, “Matushi bantu ngobakamutukana oonse aboolela pali ndime.”

⁴ Mukwiinga shoonse shili muMalembo akwe Lesa, shilatwiisha ayi tunoolangila kwiinda mukukalika myoyo alimwi akuyuminishikwa kuswa muMalembo.

⁵ Ntoosenga Lesa ulengesha bantu ayi banookalika myoyo akuba bayumu mulushomo kwaamba ayi amucaafwe ayi munoonyumfwana kwiinda mukukonkela citondesho cakwe Klistu Jesu.

⁶ Nkokwaamba ayi noonse mulyeelete kulemeka Lesa Ishi Mwaami wesu Jesu Klistu camoyo womwi.

Makani abotu mbwaakashimikilwa kubaswamashi bakunsengwe

⁷ Anu amutambulane camaansa obilo bweenka Klistu mbwaakamutambula kwaamba ayi mulemeke Lesa.

⁸ Mukwiinga ntoomulwiita ayi Klistu wakesa mukucafwa baJuda kwaamba ayi atondeshe kushomeka kwakwe Lesa. Mukucita boobo shoonse Lesa nshaakashomesha bamashali besu bakulukulu shakacitika cancinencine.

⁹ Wakalengesha abaswamashi bakunsengwe kulumbaisha Lesa ceebo ca nkumbu shakwe. Kweelana abwaamba Malembo akwe Lesa ayi, “Paceebo ceeco ndaakumulumbaisha pakati ka baswamashi bakunsengwe alimwi ndaakwiimba nyimbo shakulumbaisha liina lyanu.”

¹⁰ Alaamba alimwi ayi, “Nobaswamashi bakunsengwe amusekelele pantu pomwi abantu bakwe Lesa.”

¹¹ Alaamba alimwi ayi, “Nobaswamashi bakunsengwe noonse amulumbaishe Lesa, nobantu ba mishobo yoonse amumulumbaishe abuumbi.”

¹² Alakwe Isaya mulaluki mukulukulu wakaamba ayi, “Umwi wa mulunyungu lwakwe Jese ulaakwisa. Lesa ulaakumubusha kwaamba ayi eendeleshe baswamashi bakunsengwe alimwi ulaakulengesha ayi banoolangila nguwe.”

¹³ Ndaseenga ayi Lesa uyo ulengesha ayi munoolangila asushe kusangalala kwancinencine mumyoyo yanu alimwi aluumuno kwiinda mulushomo ndomucite muli Jesu. Nkusu sha Mushimu Usalashi shinooyumya kulangila kwanu.

Paulo mbwaakasansulula ncaakalembela bobulya

¹⁴ Nobene Klistuma nebo ndishinishite kwaamba ayi mulicite buumi bubotu alimwi mulishi shoonse nshemweelete kucita akulwiitana nobeene.

¹⁵ Sombi mumakani amwi ali munkalata iyi ndamulembela cakutashisaawo kwaamba ayi mwiibalushe. Ndacita boobo ceebo ca luse Lesa ndwaakampa lwakuba musebenshi wakwe Klistu Jesu kubaswamashi bakunsengwe.

¹⁶ Ndintooshimikila Makani Abotu, ntoosebensa anga ngumupailishi kwaamba ayi baswamashi bakunsengwe inga baba anga ncipo citambulwa kuli Lesa, ico Mushimu Usalashi nciwakabenga kuli Lesa.

¹⁷ Ceebo ndimuli Klistu Jesu, ndakonsha kulisumpula ceebo ca milimo njeensebensela Lesa.

¹⁸ Ndanookwaamba cakutashisaawo shoonse isho Klistu nshaacita kwiinda muli ndime kwaamba ayi baswamashi bakunsengwe banyumfwile Lesa. Ndakacita sheeshi kwiinda mumaswi alimwi amumicito,

¹⁹ mushaankamiko ashitondesho sha nkusu sha kwiculu alimwi amunkusu sha Mushimu Usalashi. Aboobo ndakashimikila Makani Abotu aamba pali Klistu kuli koonse nkondakaya, kutalikila kuJelusalemu alimwi ashishi shishingulukite kushikila akucishi ca Ililikamu.

²⁰ Lyoonse ndisuni bunene kushimikila Makani Abotu mumisena bantu mobatana kunyumfwaawo kale shapali Klistu kwaamba ayi ntakatoleleli mulimo wakatalika umwi muntu.

²¹ Bweenka bwaamba Malembo akwe Lesa ayi, “Bantu batana kulwitikwa shapali nguwe, balaakubona. Abalo abo batana kunyumfwa, balaakwishiba.”

Paulo mbwaakayeeya kuya kuLoma

²² Ceebo ca milimo iyi ndakalela mankanda aanji kwisa kuli ndimwe.

²³ Kwamyaaka iinji ndalinga kusuni kwisa kooko. Ono mukwiinga bulya ndamanisha milimo mumisena ya kokuno nkoombete,

²⁴ ntooyeeya kwisa mukumubona. Ndisuni kwaamba ayi pakunooya kuSipeeni nkeemikane nkamuboneewo kwaciindi ciniini alimwi mukancafweeko mulweendo lwangu.

²⁵ Sombi bulya ntooya kuJelusalemu mukucafwa bashoma muli Klistu ba kokulya.

²⁶ Ceebo bashomi ba mushoonde sha muMakedoniya alimwi aAkeya, bakakondwa kupa shipo shakucafwa bakandu bali mulikoto lya bantu bakwe Lesa muJelusalemu.

²⁷ Beene mbobakayeeya kucita boobo. Nakubi boobo balyeelete kucafwa bakandu. BaJuda bakabaana shoolwe sha Mushimu abaswamashi bakunsengwe. Paceebo ceeco baswamashi bakunsengwe balyeelete kucafwa baJuda, kwiinda mukubapa shintu shiyandika mubuumi bwabo.

²⁸ Ndaakumanisha mulimo uyu wakubatolela shipo shoonse ishi, ndaakunyamuka kuya kuSipeeni, lyalo ndaakwiimikana nkamuboneewo.

²⁹ Ndishi kwaamba ayi ndaakwisa uko, ndaakumuletela amwebo shoolwe shiswite shiswa kuli Klistu.

³⁰ Ceebo ca lushomo ndotucite muMwaami Jesu Klistu alimwi aceebo ca lusuno lwakatupa Mushimu Usalashi, ndamusenga ayi munoompaililako cankusu kuli Lesa bweenka mboontoopaila.

³¹ Amumpailile kwaamba ayi Lesa akamfuune kubantu batashomi ba kuJudeya. Mumpailile kwaamba ayi bashomi ba muJelusalemu bakatambule cakukondwa shipo ishi nsheentoobatolela.

³² Kuswawaawo na nkuyanda kwakwe Lesa, kufwakasha kwangu kuli ndimwe kulaakunkondelesha alimwi ndaakookesha kabotu.

³³ Lesa upa luumuno abe amwebo noonse. Ameni.