2 Timoti 2 - Baibo Busansulushi Bwa Libuku Ili

Shilumamba mubotu wakwe Klistu

¹ Ono omwanaangu liyumyeyumye muluse ndootucite muli Klistu Jesu.

² Maswi oonse ngowakanyumfwa kuswa kuli ndime pameenso a bakamboni baanji, ukaabike mumaansa a bantu bashomeka kwaamba ayi abalo bakeeisheko bamwi.

³ Kopengela pantu pomwi anebo mukuba shilumamba mubotu wakwe Klistu Jesu.

⁴ Shilumamba pamulimo wakwe ulisuni kukondelesha mutanjilili wakwe. Aboobo taalinyonyonganyi mubuumi bwa baabo bateshi bashilumamba.

⁵ Shilubilo taakoonshi kutambula cilambu na wabula kukonkela milawo ya kupingana uko.

⁶ Mulimi wasebensa cankusu ngooelete kutambula shitaanshi sha bulimi.

⁷ Ono yeeya pashintu nshentokwaamba ceebo Mwaami Lesa utookulengesha ayi ushinyumfwishishe.

⁸ Ibaluka Jesu Klistu uyo wakabushikwa kuswa kubafu alimwi wakashalwa mulunyungu lwakwe Defedi, mbuli bwaamba Makani Abotu ngoonshimikila.

⁹ Ceebo cakushimikila Makani Abotu, ndapenga akwaangwa ncetani bulya anga ngushikusotoka milawo, sombi maswi akwe Lesa taangitwe muncetani napaceyi!

¹⁰ Aboobo ndatolelela mushintu shoonse ceebo ca bantu Lesa mbwaakasala kwaamba ayi abalo bakatambule lupulusho lwakesa kwiinda muli Klistu Jesu, ulo luleta bulemu butamaani.

¹¹ Ono ngaaya makani alushinisho, “Na twakafwa anguwe, tulaakunooli boomi anguwe.

¹² Na tutolelele kushoma, tulaakweendelesha anguwe. Na twamukaka, alakwe ulaakutukaka.

¹³ Na tatushomeki, lakwe ulatolelela kushomeka, ceebo taakoonshi kulikaka, sobwe.”

Musebenshi mubotu

¹⁴ Ono koibalusha bantu maswi aya, akubacenjesha pameenso akwe Lesa ayi kabataambanini pamaswibo. Tacicafwi, sombi cilakolonganyabo batookutika.

¹⁵ Koelesha cankusu ayi ulyaabe kuli Lesa, mbuli musebenshi usuminishikwa ucita mulimo utamulenshi nsoni, uyo wiisha ciluleme maswi a lushinisho.

¹⁶ Koswa kumibandi iteshi ya buLesa alimwi aya buluya, iyo ilengesha bantu kusena kulaale aLesa.

¹⁷ Kwiisha kwa mushobo uyo kuli anga ncipwaloonda cilya mubili woonse. Basankwa bobilo balinga kwiisha shintu sha mushobo uyo nguAimeneyusi aFiletasi.

¹⁸ Bakashiya nshila ya lushinisho alimwi batooya cikolonganya lushomo lwa bashomi bamwi kwiinda mukunokwaamba ayi kubushikwa kwesu kwakuswa kubafu kwakacitika kale.

¹⁹ Sombi lwiimbi luyumu lwakwe Lesa talukoonshi kutenkanishikwa alimwi palilembetwe maswi akwaamba ayi, “Mwaami ulishi baakwe,” alimwi ayi, “Uyo woonse waamba ayi uli mumaansa a Mwaami ulyeelete kucileka kucita shitaluleme.”

²⁰ Muŋanda inene muli mbale shipusenepusene, shimwi nshasilifa shimwi nshagolodi, shimwi nshashisamu shimwi nshabulongo. Shimwi nshaciindi ceelete, shimwi shilasebenseshekwa lyoonse.

²¹ Na muntu walisalasha akushiya shintu shitaluleme isho, ulaba mbuli cisebensesho ca ciindi ceelete mukwiinga walyaaba kuMwaami wakwe kwaamba ayi amusebenseshe mumicito ibotu ili yoonse.

²² Ucileeke lunkumbwa lwa mubili lwa bwanike, ukonkelebo bululami, lushomo, lusuno aluumuno pantu pomwi abaabo basenga lucafwo kuMwaami Lesa amoyo utacite kampenda.

²³ Sombi ucileeke kupikishanya kwabuluya alimwi kwakubula lushibo ceebo ulishi ayi kulaletelabo kwaambana.

²⁴ Musebenshi wa Mwaami teelete kwaambana abantu. Ulyeelete kunyumfwa nkumbu kubantu boonse, kuba mufundishi wiisha kabotu camoyonteeka,

²⁵ muntu ulibombya pakulwiita beshikumupikisha, mukwishiba kwaamba ayi mpashi Lesa inga wabapa ciindi cakusanduka kuswa kushibiibi shabo akwishiba shalushinisho.

²⁶ Mpeeke maano abo alaakuboolaamo akusupuka mukoose ka Mubiibi uyo wakabacatisha akubalengesha kunoocita kweelana akuyanda kwakwe.