2 Samwelo 14 - Baibo Busansulushi Bwa Libuku Ili

Abusalomu mbwaakaboolela kuJelusalemu

¹ Ono Joabu mwanaakwe Seluiya wakeshiba ayi mwaami Defedi wayeeya Abusalomu abuumbi.

² Mpeeke Joabu wakatuma muntu kuTekowa ayi eete mwanakashi umwi uyo wakalinga kucenjete abuumbi. Mwanakashi uyo ndyaakesa wakamwaambila ayi, “Bela kuba anga ulicite cililo alimwi ufwale acakufwala ca cililo. Utanani mafuta alimwi uliboneshe anga calaampa ciindi koolila.

³ Lyalo uye kumwaami ukaambe maswi ngweshi nkulwiite.” Mpeeke Joabu wakalwiita mwanakashi uyo bwakwaamba.

⁴ Mwanakashi uyo wa kuTekowa wakaya kumwaami akufukama cakushisha ciwa panshi mukumupa bulemu. Mpomunyaawo wakaamba ayi, “Amuncaafwe noBaami!”

⁵ Mpeeke mwaami wakeepusha ayi, “Nciinshi cakushupa?” Wakakumbula ayi, “Nebo ndi mukalubinje, beebaangu bakafwa.

⁶ Nebo nemusebenshi wanu ndakalinga kucite baana basankwa bobilo. Bumwi bushiku bakalwana kabali muluundu alimwi kakutaaku ashikubafunina. Lyalo umwi wakacaya mubye.

⁷ Ono beshikamukowa boonse bambukila nemusebenshi wanu akwaamba ayi balisuni ngabe wooyo wakacaya mubye mumaansaabo ayi bamucaaye alakwe, ceebo cakucaya mukwabo. Na bakacite boobo, ingayi nebo ndaakucaalabo kwakubulawo mwaana musankwa. Nkokwaamba ayi balaakunyonyoola wakucinkamo manungo eenkabo ngooncite, abalo beebaangu inga babula weenga wacaasha liina lyabo pacishi ca panshi coonse cino.”

⁸ Lyalo Mwaami wakakumbula ayi, “Boolela kuŋanda, ntoobikaako maano kucikani ici.”

⁹ Sombi mwanakashi uyo wakaamba ayi, “Nkambo cili coonse nceshi mucite mulandu ngwaangu abamuŋanda yangu. Mwebo abamulunyungu lwanu tamucite mulandu.”

¹⁰ Mwaami wakakumbula ayi, “Uli woonse eshi akakukonge, ukamulete kokuno. Ncakwiila teshi akakupenshewo tubili.”

¹¹ Kuswawaawo wakaamba ayi, “Ndaseenga nkambo mupaile kuMwaami Lesa, Lesa wanu kwaamba ayi shikamukowa uyo weelete kuboosha cishole pamwanaangu ateendilishiiwo kubisha kwiinda mukucaya mwanaangu musankwa aumwi.” Mpomunyaawo mwaami Defedi wakaamba ayi, “Mbweeke mbocibete lushinisho ayi Mwaami Lesa ngumuumi, ncakwiila taaku nabi mususu weshi ukaswe mumutwi wa mwanaako musankwa akulokela panshi.”

¹² Lyalo mwanakashi uyo wakaamba ayi, “Ono nkambo amunsuminishe njilikewobo cintu comwi cacaala.” Mwaami wakakumbula ayi, “Ncibotu, amba.”

¹³ Mpeeke mwanakashi uyo wakaamba ayi, “Ino mwacitilanshi cilubo ca mushobo uyu kubantu bakwe Lesa? Amubone tamukwe kusuminisha mwanaanu musankwa kupiluka kuswa mucishi ncaakalobokelaako. Sa te bulya mwalipa mulandu nobeene musheesho nshemwaswa mukwaamba?

¹⁴ Soonse tulyeelete kufwa. Ono nditufwa buumi bwesu bulababo anga ngamaanshi apukulwa atakonshaniki kuyolwa. Lesa lakwe taanyayi buumi, sombi ulalangoola nshila yakuboosha mwanaakwe kuswa mucishi ncaakalobokelaako.

¹⁵ “Ono ndesa mukwaamba cikani ici kuli ndimwe nkambo nobaami bangu ceebo bantu banenga boowa. Nebo nemusebenshi wanu ndakayeeya ayi nse mbandikaanu, mukuyeeya kwaamba ayi ndabona inga mwacita mbweenga ndaseenga.

¹⁶ Ndakayeeya ayi mpashi nobaami inga mwasumina kumpulusha kumusankwa uyo usuni kuncaya pantu pomwi amwanaangu musankwa, ee kutukusha mucishi cakatupa Mwaami Lesa ayi ncesu.

¹⁷ Ono nemusebenshi wanu ntokwaamba ayi, ‘Maswi anu nobaami aabe aayo eshi ankalike moyo, mukwiinga nkambo nobaami mulibo anga ngumunjelo wakwe Lesa mukwishiba cibotu acibiibi. Mwaami Lesa, Lesa wanu abe amwebo’ ”

¹⁸ Lyalo mwaami wakaamba ayi, “Ntookwiipusha, ono utanshisi.” Mwanakashi uyo wakakumbula ayi, “Amwiipushe nkambo nobaami bangu.”

¹⁹ Mpomunyaawo mwaami wakeepusha ayi, “Sa Joabu wakucafwaako kubamba cikani ici?” Mwanakashi wakakumbula ayi, “Mbweeke mbocibete lushinisho ayi mwebo nkambo nobaami muli boomi, ncakwiila taaku muntu weenga wapikisha nsheenga mwaamba. Ndushinisho nguJoabu musebenshi wanu wandwiita bwakucita alimwi ngowandwiita bwakukonka boonse mbondakonka.

²⁰ Nakubi boobo Joabu ncaacitila bobulya nkwaamba ayi shintu shilulame. Mwebo nkambo busongo mbomucite bulibo anga mbwa munjelo alimwi mulishi shoonse shicitika mucishi cino.”

²¹ Mukuya kwanshiku mwaami Defedi wakaambila Joabu ayi, “Ncilibo kabotu, ntoocita kweelana ambowakasenga. Koya ukalete Abusalomu cikula bwangu ulya apiluke kuno.”

²² Mpomunyaawo Joabu wakaliwaala panshi mukumupa bulemu akwaamba ayi, “Mwaami Lesa amupe coolwe nkambo! Ono nebo nemusebenshi wanu ndeshiiba ayi mulisangalete pali ndime mukwiinga kusenga kwangu mwakunyumfwa.”

²³ Kuswawaawo Joabu wakanyamuka akuya kuGeshuli akuboosha Abusalomu kuJelusalemu.

²⁴ Sombi mwaami Defedi wakaamba ayi, “Abusalomu aye kuŋanda yakwe, nshisuni kubonanaakwe.” Mpeeke Abusalomu wakaya kuŋanda yakwe cakutabonanaawo amwaami.

Abusalomu aDefedi mbobakabooshanya kumubili

²⁵ Ono mucishi ca Isilaeli coonse temwakalinga musankwa wakalinga kulumbaishikwa pakuboneka kabotu mbuli Abusalomu. Taakalinga kucitewo kampenda kuswabo kumutwi kushika akumyeendo.

²⁶ Misusu yakwe wakalinga kwiicesa na peenda mwaaka. Ono lyoonse na weecesa, wakalinga kwiipima mboitoolema alimwi yakalinga kulema makilogilamu ali 2.3 kweelana acipimo cakasuminishikwa ca kubwalo.

²⁷ Abusalomu wakalinga kucite baana basankwa botatwe amwanakashi womwi. Mwanaakwe mwanakashi wakalinga kwiitwa ayi Tama alimwi wakaba mwanakashi mubotu abuumbi.

²⁸ Abusalomu wakekala myaaka yobilo muJelusalemu kutabonanaawo amwaami Defedi.

²⁹ Bumwi bushiku Abusalomu wakatumina Joabu nkombe ayi ese amutume kumwaami, sombi lakwe wakakaka kwisa. Mpeeke wakamutumina nkombe lwabili, sombi wakakaka alimwi kwisa.

³⁰ Mpomunyaawo Abusalomu wakaambila basebenshi bakwe ayi, “Amubone muunda wakwe Joabu ulibambenebo awaangu alimwi muli bale. Kamuya mukauteente.” Mpeeke basebenshi bakwe Abusalomu bakaya bautenta.

³¹ Lyalo Joabu wakanyamuka akuya kuŋanda kuli Abusalomu akumwiipusha ayi, “Ino basebenshi bako batentelanshi muunda wangu?”

³² Abusalomu wakakumbula Joabu ayi, “Bona ndatuma nkombe shakukwiita kwaamba ayi nkutume kubaami mukwiipusha ncindakaswita kuGeshuli. Mukwiinga bulya calingabo kabotu akunooshitebo nkuko! Ono bulya ntooyanda kubonana abaami, kwaamba ayi na kuli mulandu ngooncite, bancaayebo cimane.”

³³ Mpeeke Joabu wakaya kumwaami Defedi akumulwiita makani akaamba Abusalomu. Lyalo mwaami wakatumina nkombe Abusalomu ayi ese. Alakwe wakaya akufukama cakushisha ciwa panshi kunembo lya mwaami. Mpomunyaawo mwaami wakatambula Abusalomu kwiinda mukumufyonta.