2 Makani 33 - Baibo Busansulushi Bwa Libuku Ili

Manase mwaami wa bene Juda

¹ Manase wakaba mwaami wa bene Juda kaacite myaaka likumi ayobilo. Wakalela muJelusalemu kwamyaaka makumi osanwe amyaaka yosanwe.

² Wakabishisha Mwaami Lesa mukukonkela kwishibila kulensha bunya kwa baabo Mwaami Lesa mbwaakatanda mucishi cabo.

³ Wakayakulula misena yakulambililaako ya patulundu iyo yakanyonyoola Esekiya ishi. Wakayaka ashipaililo shakulambililaawo Baali, kubumba cikoshanyo cakwe Ashela lesa mwanakashi alimwi akulambila nyenyeenshi.

⁴ Wakayaka shipaililo sha bakunsengwe muŊanda yakwe Lesa umo Mwaami Lesa mwakaamba ayi, “MuJelusalemu mweshi nkanoolambililwa kwalyoonse alyoonse.”

⁵ Mumansa shobilo sha Ŋanda yakwe Lesa, wakayakaamo shipaililo shakulambililaamo nyenyeenshi.

⁶ Wakabenga bana bakwe basankwa ayi njimilambu yakutenta muCinyika ca Inomu. Wakalinga kusonda, kucita buloshi alimwi wakalinga kucebusha akwiipusha kubeshikwaamba abafu. Paceebo ceeco wakabisha abuumbi kuMwaami Lesa akusonkomona bukali bwakwe.

⁷ Wakabika cikoshanyo cakubesa muŊanda yakwe Lesa, mumusena uyo Mwaami Lesa ngwaakaamba kuli Defedi aSolomoni mwanaakwe musankwa ayi, “Muno muJelusalemu muŊanda yakwe Lesa iyi, ngomusena ngondakasala mucishi coonse ca mikowa ya bene Isilaeli ili likumi ayobilo kwaamba ayi mweshi nkanoolambililwa.

⁸ Na bene Isilaeli boonse bakanookonkela milawo yangu akunoobamba Milawo yoonse iyo Mose musebenshi wangu njaakabapa, lyalo teshi nkabatandeewo mucishi ico ncendakapa bamashali babo bakulukulu.”

⁹ Manase wakabalengesha ayi beendeewo kubisha pabaabo Mwaami Lesa mbwaakatanda mucishi kunembo lyabo.

Manase mbwaakaboolela kumwaami Lesa

¹⁰ Nabi Mwaami Lesa wakacenjesha Manase abantu bakwe boonse, bakakaka kukonkela ncaakalinga kubalwiita.

¹¹ Kuswawaawo Mwaami Lesa wakaletela bamatanjilili ba bashilumamba ba bene Asilya ayi balwane bene Juda. Mpeeke bakacata Manase busha. Bakamubika ndobo munshono yakwe, bamwaanga ncetani sha bulonse akumutola kuBabiloni.

¹² Mukupenga kwakwe wakaliceesha akusandukila kuMwaami Lesa, Lesa wakwe akumusenga ayi amucaafwe.

¹³ Lyalo Mwaami Lesa wakanyumfwa kusenga kwakwe Manase akumuleka ayi aboolele kuJelusalemu kuya mukulela alimwi. Ici cakabonesha mwaami Manase ayi Mwaami Lesa nguLesa wancinencine.

¹⁴ Pesule wakayaka lubumbu lwa Ndabala yakwe Defedi kumbo lya Kantupu ka Giyoni kulubasu lwa cinyika kuya mukushika kuMwinjililo wa Nswi. Kalundu ka Ofelo waakabika mukati ka lubumbu ulo ndwaakayaka cakululaampya kuya mwiculu. Lyalo wakabika bamatanjilili ba bashilumamba mumandabala oonse akalinga kucite malinga mucishi ca Juda.

¹⁵ Wakakusha balesa beensu akukusha cikoshanyo cakubesa muŊanda yakwe Lesa kubikaawo ashipaililo isho nshaakalinga wayaka pakalundu ka Ŋanda yakwe Lesa muJelusalemu. Lyalo shoonse wakashisowa kunsengwe lya ndabala.

¹⁶ Mpeeke wakayakulula cipaililo apo Mwaami Lesa mpwaakalinga kulambililwa. Wakabenga milambu ya bwanabwankashi amilambu yakulumba pali ncico. Lyalo wakaambila bene Juda boonse ayi banoosebenselabo Mwaami Lesa, Lesa wa bene Isilaeli.

¹⁷ Kuswawaawo nabi bantu bakalinga kubenga milambu mumisena imwi yakulambililaamo, bakalinga kwiibengabo kuMwaami Lesa.

Kufwa kwakwe Manase

¹⁸ Shintu shimwi shoonse shakacita Manase, kubikaawo amupailo kuli Lesa wakwe ashakaamba balaluki abo bakamwaambila muliina lya Mwaami Lesa, Lesa wa bene Isilaeli, shoonse shililembetwe mulibuku lya buumi bwa bamaami ba bene Isilaeli.

¹⁹ Mupailo wakwe akukumbula kwakwe Lesa, shibiibi nshaakacita kaatana kusanduka, nkokwaamba ayi bubi mbwaakacita, misena yakulambililaako ya patulundu, shikoshanyo shakwe Ashela lesa mwanakashi isho nshaakapanga alimwi ashibumbwabumbwa nshaakalinga kulambila, shoonse shililembetwe mulibuku lya balaluki.

²⁰ Manase wakafwa akubikwa palubansa lwa ŋanda ya bwaami. Lyalo Amoni mwanaakwe musankwa ngowakapyana bwaami bwakwe.

Amoni mwaami wa bene Juda

²¹ Amoni wakaba mwaami wa bene Juda kaacite myaaka makumi obilo amyaaka yobilo. Wakalela muJelusalemu kwamyaaka yobilo.

²² Ono alakwe wakabishisha Mwaami Lesa bweenka bwakacita Manase ishi. Wakalambila shibumbwabumbwa isho shakapanga baishi.

²³ Lakwe Amoni taakwe kuliceesha kuMwaami Lesa bweenka bwakacita baishi. Ncakwiila Amoni wakeendaawo kubisha pali baishi.

²⁴ Lyalo bacinenenene bakwe Amoni bakamupingila kumucaya. Ncakwiila bakamucaya muŋanda yakwe ya bwaami.

²⁵ Kuswawaawo bene Juda bakacaya baabo bakacaya mwaami Amoni akupa Josiya mwanaakwe bwaami bwakwe.