2 Bene Tesalonika 3 - Baibo Busansulushi Bwa Libuku Ili

Amutupailileeko

¹ Cakweelaako nobamakwesu, kamutupaililaako kwaamba ayi Maswi aswa kuMwaami amwaike cakufwambaana kushika kumisena yoonse, akutambulwa cabulemu bweenka mbwaakatambulwa pakati kanu.

² Kamutupaililaako alimwi ayi Lesa atufuune kubantu babiibi, ceebo teshi bantu boonse bashoma Makani Abotu.

³ Sombi Lesa ulashomeka, aboobo utoomuyumyayumya akumufuna kuswa kuMubiibi ulya.

⁴ Lesa ngootulengesha kuba alushomo muli ndimwe, aboobo tulishinishite kwaamba ayi mutoocita alimwi mulaakutolelela kucita nshetumulwiita.

⁵ Mwaami Jesu alengeshe myoyo yanu kwishibishisha lusuno lwakwe Lesa akukomenya moyo uko Klistu nkwaatupa.

Mbwaakabacenjesha pacikani ca butolo

⁶ Ono nobamakwesu, tutoomwaambila muliina lya Mwaami Jesu Klistu ayi abo boonse batolo mulikoto lyanu alimwi batasuni kukonkela nshetwakamwiisha, mubasoonoke.

⁷ Mwebo nobeene mulishi kwaamba ayi mulyeelete kwikala bweenka mbotwakalinga kwikala pakati kanu. Twakalinga kusebensa cankusu,

⁸ alimwi tatukwe kulyawo cakulya ca kutalilipilila swebo sobeene. Sombi twakalinga kusebensa cankusu mashiku amalumwi ceebo tetwakalinga kusuni kupensha muntu nabi womwi mushintu nshetwakalinga kuyanda mubuumi bwesu uko.

⁹ Twakalinga kweelete kunoosengabo shoonse shakalinga kuyandika kuli ndimwe, sombi twakalinga kusebensa kwaamba ayi cibe citondesho kuli ndimwe.

¹⁰ Nditwakalingaanu twakalinga kumulwiita ayi, “Na muntu wakaka kusebensa, akulya mutamusuminishi.”

¹¹ Tutoolemba boobo ceebo twakanyumfwa kwaamba ayi kuli bamwi batolo pakati kanu. Balo ncito yabo nkupilinganyabo babyaabo.

¹² Bantu abo tutoobaambila akubacenjesha muliina lya Mwaami Jesu Klistu ayi bacileeke kwikala buumi bwa kunyonyonganya, akutalika kulisebensela beene.

¹³ Nakubi boobo nobamakwesu, mwebo tamweelete kucileka kucita shibotu.

¹⁴ Na umwi akake kucita mbotwaamba munkalata njetwatuma iyi, mumulabilile akumusoonoka kwaamba ayi akanyumfwe nsoni.

¹⁵ Nakubi boobo mutamweelanishi amulwani wanu, sombi mumucenjeshe mbuli mushominyinaanu.

Maswi akweelaako

¹⁶ Ono Mwaami shiluumuno amupe luumuno lyoonse amunshila shoonse. Mwaami abe amwebo noonse.

¹⁷ Nebo nePaulo ndaleemba mooni uyu alyaansa lyangu nemwiine. Ici ncitondesho nceembika mumakalata angu oonse. Mboonemba bulya.

¹⁸ Luse lwa Mwaami Jesu Klistu lube amwebo noonse.