2 Baami 12 - Baibo Busansulushi Bwa Libuku Ili

Joashi mwaami wa bene Juda

¹ Mumwaaka wasanu ayobilo wa bwaami bwakwe Jewu mwaami wa bene Isilaeli, Joashi wakaba mwaami wa bene Juda. Wakalela mundabala ya Jelusalemu kwamyaaka makumi one. Banyina bakalinga mbaSibiya bene Biyasheba.

² Joashi wakacita shiluleme pameenso a Mwaami Lesa mubuumi bwakwe boonse mukwiinga Jeoiyada mupailishi wakalinga kumupa milasho yoonse.

³ Nakubi boobo misena yakulambililaako ya patulundu taikwe kunyonyoolwa. Aboobo bantu bakatolelela kubenga milambu akuya mukutenta tununkila kabotu uko.

⁴ Joashi wakaambila bapailishi ayi, “Kamubwesa maali oonse aletwa ayi nshipo shisalalite kuŊanda yakwe Lesa, nkokwaamba ayi maali amusonko alimwi amaali apekwa ncipo cakulyaaba.

⁵ Mupailishi womwi awomwi ulyeelete kubwesa maali kuswa kubantu abo mbwaasebensela. Maali ayo alyeelete kusebenseshekwa mukubambulula Ŋanda yakwe Lesa pali poonse payandika boobo.”

⁶ Sombi kushikila akumwaaka wa makumi obilo ayotatwe wa bwaami bwakwe Joashi, bapailishi kabatana kubambululawo Ŋanda yakwe Lesa.

⁷ Mpeeke Joashi wakeeta Jeoiyada mupailishi abapailishi bamwi boonse akubeepusha ayi, “Ino tamutoobambulwitanshi Ŋanda yakwe Lesa? Ono kuswa sunu mutanoobika maali ayo ngomutambula. Mulyeelete kwaaleta kwaamba ayi Ŋanda yakwe Lesa ibambululwe.”

⁸ Bapailishi bakasumina ayi teshi banoobwesa maali kubantu alimwi ayi teshi bakabambulule Ŋanda yakwe Lesa beene.

⁹ Lyalo Jeoiyada mupailishi wakabwesa libokoshi akutulula bulyango pacakufwekaawo. Wakabika libokoshi ilyo kucipaililo kulubasu lwalulyo na muntu keenjila muŊanda yakwe Lesa. Bapailishi abo bakalinga kusebensela kumulyango wa Ŋanda yakwe Lesa bakalinga kubika maali oonse akalinga kuletwa mumo mulibokoshi ilyo.

¹⁰ Lyoonse na kwacanika maali maanji mulibokoshi mulembi wa mwaami amupailishi munene bakalinga kubwesa maali ayo, baabelenga akwaabika mumasaka.

¹¹ Na bamana kwaabelenga, bakalinga kupa bamanene ba beshikubambulula muŊanda yakwe Lesa. Abalo bakalinga kulipila beshikubambulula boonse. Nkokwaamba ayi beshikubesa mapulanga, bayaki,

¹² beshikuyaka mabwe, beshikutimbula mabwe. Bakoola mapulanga amabwe akusebensesha alimwi akulipilila shimwi shoonse shiyandika.

¹³ Taaku maali akasebenseshekwa kulipila beshikupanga nkomeshi sha silifa, mbale, mapeenga, shisebensesho sha malampi, nabi shintu sha silifa nabi golodi sha kuŊanda yakwe Lesa.

¹⁴ Maali aya oonse akalinga akufolesha beshikubambulula akuula shintu shakalinga kuyandika kusebensesha.

¹⁵ Bamanene ba beshikubambulula bakalinga kushomeka cakwaamba tecakalinga akuyandika kubona maali mbwaakalinga kweenda.

¹⁶ Maali akalinga kubengwa ayi ncipo cakumana mulandu acipo cakulekelelwa shibiibi taakalinga kubikwa mulibokoshi ilyo. Sombi akalinga kupekwa kubapailishi.

¹⁷ Paciindi ico Asayelo mwaami wa bene Silya wakalwana ndabala ya Gati akwiinyonyoola. Lyalo wakayeeya kulwana ndabala ya Jelusalemu.

¹⁸ Mpeeke Joashi mwaami wa bene Juda wakabwesa shoonse nshakalinga kubenga bamashali bakwe bakulukulu, nkokwaamba ayi Jeoshafati, Jeolamu alimwi Aasiya, pantu pomwi ashintu shoonse isho nshaakalinga kubenga mwiine kuMwaami Lesa alimwi agolodi wakalinga mushipinda shakusungilamo buboni sha muŊanda yakwe Lesa amuŋanda ya bwaami. Shoonse isho wakashitumina Asayelo mwaami wa bene Silya ayi nshipo, alakwe wakaswaamo muJelusalemu akuboolela abashilumamba bakwe.

¹⁹ Shintu shimwi shoonse shakacita Joashi shililembetwe mulibuku lya buumi bwa bamaami ba bene Juda.

²⁰ Bacinenenene bakapinga kumucaya. Lyalo bakamucaya kuBeti Milo munshila yakuya kuSila.

²¹ Bacinenenene bakamucaya bakalinga Josaka mwanaakwe Shimeyati aJeosabadi mwanaakwe Shoma. Joashi wakafwa akubikwa kushuumbwe sha bamaami muNdabala yakwe Defedi. Amasiya mwanaakwe ngowakapyana bwaami bwakwe.