1 Timoti 5 - Baibo Busansulushi Bwa Libuku Ili

Milasho imwi

¹ Utanookalalila munene, sombi ulyeelete kumwaambila cabulemu anga mbaiso. Abalo bacikula bwangu kobacita anga mbanandumi shako,

² bamacembele banakashi anga mbanyoko alimwi abamyooye anga mbanankashi shako, cakubula lunkumbwa kuli mbabo.

³ Kolemeka bamukalubinje banakashi batacite beshikubacafwa.

⁴ Ono na mukalubinje mwanakashi kaacite baana nabi bashikulu, baana abashikulu abo bataangune kucita sheesho Lesa nshaasuni kumishaabo. Mukucita boobo balabooshesha bashali babo abankambiyabo nshebakabacitila ceebo ico ncecikondelesha Lesa.

⁵ Mukalubinje mwanakashi utacite beshikumucafwa nabi beshikumulama, wakabika kulangila kwakwe muli Lesa alimwi ulatolelela kupaila akumusenga shalucafwo lwakwe mashiku amalumwi.

⁶ Sombi mukalubinje mwanakashi walyaaba kushintu shakulisangalasha, wafwa kale nabi ngumuumi.

⁷ Upe bantu milasho ayalo iyi kwaamba ayi babule kampenda.

⁸ Sombi na muntu umwi taasuni kucafwa bamakwabo bunene bunene bamumukowa wakwe mwiine, wakaka lushomo lwakwe alimwi uleendaawo kuluba pamuntu utashomi.

⁹ Mutanungiiwo aumwi mukalubinje mwanakashi pabaabo balembetwe, sombibo kaacite myaaka iindilila pamakumi osanwe alyomwi. Ulyeelete kuba muntu wakeebwa kumusankwa womwibo,

¹⁰ ucite mpuwo ibotu ya milimo yakwe. Ulyeelete kuba mwanakashi wakakusha kabotu bana bakwe, wakalinga kutambula beensu muŋanda yakwe, wakalinga kucita milimo yakulibombya kubashominyina, wakalinga kucafwa bantu mumapensho alimwi wakalibenga kucita shintu shibotu.

¹¹ Sombi bamukalubinje banakashi bacanike mutababiki palembetwe bamwi ceebo na lunkumbwa lwa mubili lwabalengesha kuyanda kweebwa alimwi, balaswa kuli Klistu.

¹² Aboobo balapekwa mulandu wakupwaya cipangano cabo citaanshi anguwe.

¹³ Alimwi balaba batolo akutalika kunoobalabo milyango amilyango. Teshibo ceeco ceenka, sombi balaba bafuishi, bankulwe alimwi mbeshi kwaambabo shikani nshebateelete.

¹⁴ Nceceeco nceensunini ayi bamukalubinje banakashi bacanike beebwe, babe abaana akubamba maandaabo kwaamba ayi balwani besu babule pakutubekeshesha.

¹⁵ Ceebo mpobali kale bamukalubinje banakashi bamwi basanduka akukonkela Satana.

¹⁶ Ono na kuli mwanakashi mushomi ucite bamakwabo bamukalubinje banakashi, lakwe abacaafwe kwaamba ayi coonde citabi amukuli uyu, sombi cicafwe bamukalubinje batacite beshikubacafwa.

¹⁷ Ono bamatanjilili beendelesha coonde abo basebensa kabotu milimo yabo, balyeelete kulipilwa abuumbi, bunene bunene abo basebensa kabotu mukushimikila alimwi akwiisha.

¹⁸ Ceebo Malembo akwe Lesa alaamba ayi, “Mutafwaliki cinsangala musune utoomulyatweetako maila kwaamba ayi alupuke.” “Musebenshi ulyeelete kupekwa malipilo akwe.”

¹⁹ Utanoosumina cikani caambwa pamutanjilili wa coonde, sombibo na caletwa abakamboni bobilo nabi botatwe.

²⁰ Abo bacita shibiibi balyeelete kukalalilwa pameenso a bantu boonse kwaamba ayi bamwi bacenjeleleewo.

²¹ Ndakusenga cankusu, pameenso akwe Lesa, Klistu Jesu alimwi abaanjelo basalitwe, kwaamba ayi ukonkele milasho yoonse iyi cakutasalulula alimwi mushintu shoonse nshoocita tooelete kusuula umwi.

²² Utanoofwambaana kubika maansa pamutwi wa muntu kumubenga kumulimo wakwe Lesa ceebo inga wacanika ayi utoosuminisha shibiibi sha bamwi bantu. Kolilama cakubula kampenda.

²³ Utanoonwa maanshi eenka, sombi kobikaako atuwaini tuniini kucafwa kusungulula shakulya ceebo utoociswaciswa.

²⁴ Shibiibi sha bantu bamwi shilaboneka patuba, shalo shilataanguna kushika kumusena wakoomboloshesha. Shibiibi sha bamwi shilabonekabo pesule.

²⁵ Mbweeke ubo milimo ibotu ilaboneka patuba alimwi ayeeyo itaboneki patuba teekoonshi kushisikwa.