Yuhana 2 - Alla la Kitabu Seniman

Kɔɲɔmalɔ tolon mɛn kɛra Kana so kɔndɔ

¹ Nba, a tele sawanan lon, kɔɲɔmalɔ kɛra Kana so kɔndɔ Kalile mara rɔ. Isa na tɛrɛ ye.

² Isa a ni a karandenilu fanan kilini tɛrɛ kɔɲɔmalɔ rɔ.

³ A sera waati do ma rɛsɛnji banda fewu. Isa na ka a fɔ a yɛ ko: «Rɛsɛnji ra ban fewu.»

⁴ Isa ka a jabi: «N na, nfen ye nde ni ile tɛma? N na waati ma se fɔlɔ.»

⁵ A na ka a fɔ baaradenilu yɛ ko: «A ye mɛn fɔla ai yɛ, ai ye wo kɛ.»

⁶ Jundaa kabalaman belebele ba wɔɔrɔ tɛrɛ ye ii bolo ye, mɔɔ ri se litiri biseyin haan litiri kɛmɛ ni a kɔ ɲɔɔn kɛla a kɔndɔ. Woilu ye ii bolo ka ii sɛninya mɛn bɛnni ii la namun ma.

⁷ Isa ka a fɔ baaradenilu yɛ ko: «Ai ye jundaa lafa ji la.» Baaradenilu ka jundaa lafa haan a da la.

⁸ Wo kɔ rɔ, Isa ka a fɔ ii yɛ ko: «Ii ye ji ɲin ta ka wa a ri dɔɔnninta ko ɲanabɔla kunnasiiba ma sisen.» Baaradenilu ka wo kɛ.

⁹ Damununta ko ɲanabɔla kunnasiiba a ka ji wo nene, ji mɛn yɛlɛmanda ka kɛ rɛsɛnji ri. A ma a lɔn rɛsɛnji bɔni fan si, kɔni baaraden mɛnilu ka ji ta jundaa kɔndɔ, woilu ka a lɔn. A ka kɔɲɔcɛ kili,

¹⁰ ka a fɔ a yɛ ko: «Mɔɔ wa kɛ rɛsɛnji ratalanna mɔɔilu la, a ye rɛsɛnji ɲumaɲuma fɔlɔ le ratalanna ii la. Ii ɲa wa laminin minin tuma mɛn na, a ri rɛsɛnji gbɛrɛ ratalan ii la, mɛn duman tɛ kosɛbɛ. Kɔni ile ra rɛsɛnji ɲumaɲuma lamara fɔɔ sisen!»

¹¹ Nba, Isa la tɔɔmasere kabannako fɔlɔ le wo ri, a ka mɛn kɛ Kana so kɔndɔ Kalile mara rɔ. Isa ka a la nɔɔrɔ yiraka tende. Wo kɛra sababu ri, a la karandenilu lara a la.

¹² Wo taminnin kɔrɔ, a wara Kapɛrinahumu so kɔndɔ, a ni a na a ni a dɔɔcɛilu a ni a la karandenilu. Ii tora ye ka tele dando kɛ ye.

Isa ka julailu gbɛn Allabatobonba la Jerusalɛmu

¹³ Nba, Yahudiyailu la Taminkunna Sali tun da sudunya. Wo rɔ, Isa wara Jerusalɛmu.

¹⁴ A donda Allabatobonba jin kɔndɔ ka julailu tɛrɛn ye, mɛnilu tɛrɛ ye nisiilu ni saailu ni sokɔndɔ kanbailu fɛrɛla. A ka wodifalonnailu siini tɛrɛn ii la tabaliilu kɔfɛ fanan.

¹⁵ Nba, Isa ka fojulu kɛ bonsan di, ka mɔɔilu labɔ Allabatobonba jin kɔndɔ a ni ii la nisi ni ii la saa, ka wodifalonnailu la wodi gbanan dawuya duu ma, ka ii la tabali labe.

¹⁶ A ka a fɔ kanba majiralailu fanan yɛ ko: «Ai ye kanbailu labɔ yan! Ai kana n Fa la bon kɛ julaya bon de.»

¹⁷ Isa la karandenilu hankili bilara sɛbɛli kuma wo rɔ ko: «I la bon na ko gbɛlɛman n ma a ɲa jɛrɛ jɛrɛ ma.»

¹⁸ Nba, Yahudiyailu la ɲɛmɔɔilu ka Isa maɲininka ko: «I ra ko mɛnilu kɛ ɲin, i ri tɔɔmasere kabannakoma su ɲuman kɛ ka a yiraka an na ko ɲin kɛ saratii ye i bolo?»

¹⁹ Isa ka ii jabi: «Ai ye Allabatobonba ɲin tiɲan, yani tele sawanan n di a lawuli.»

²⁰ Yahudiya ɲɛmɔɔilu ka a fɔ a yɛ ko: «An ka Allabatobonba lɔ san binaanin ni san wɔɔrɔ le kɔrɔ. I ri se a lɔla tele sawa kɔrɔ wa?»

²¹ Kɔni Isa kan tɛrɛ ye Allabatobonba mɛn ma, a tɛrɛ ye wo fɔla a farikolo le ma.

²² Wo le ka a kɛ, Isa ka i wuli sayabatɔilu tɛma, a la karandenilu hankili bilara a la kuma wo rɔ. Ii lara kuma fanan na mɛn sɛbɛni Alla la kitabu kɔndɔ, a ni ii lara Isa la kuma fannan na.

Isa ka a lɔn mɛn ye mɔɔ sɔnɔmɛ rɔ

²³ Isa ka Taminkunna Sali kɛ Jerusalɛmu so kɔndɔ. Mɔɔilu ka a la tɔɔmasere kabannakoilu yen, wo rɔ mɔɔ siyaman ba lara a la.

²⁴ Kɔni Isa ma la mɔɔ woilu la baa a ka adamaden bɛɛ lɔn.

²⁵ A mako ma kɛ mɔɔ la sereyala, baa a ka a lɔn mɛn ye adamaden sɔnɔmɛ rɔ.