Jaceuq 66 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guiqlanq-anr Noeqkeuv-awr Jaceuq-eu

Car-eu paw sheuqghae-eu aqyuif ghaq-anr bofnaeq-euq, dawqcar cardawq

¹ Mirtsaq tanqkhawr dawqtawvluf, laqkhaq caertavni Miqyaer-anr gurgaq-awq.

² Aqyawf-euq tsawrmyanr-anr taqhuiq taqmanr-eu jeq car-awr, Aqyawf-euq yawshaef khanqsaer-anr tiqbyanni jaceuq-awq.

³ Miqyaer-anr heulof-aer aernaeq-awq, “Nawq nae mr-euq gardeuq yawzeu arnavni bawlar paq-aer ghae-eu nga. Nawq-euq baoq huiqdui manr duidui-eu mirnae, Nawq-anr muir-eu deuq, nawq-euq uqmov jawrlar taef-a.

⁴ Mirtsaq tanqkhawr dawqtawvluf, nawq-anr uqduq tanq-eu laer, Nawq-anr car-awr jaceuq taef-a. Aqyawfmaf, nawq-euq tsawrmyanr-anr car-awr jaceuq taef-a.” Sela.

⁵ Lar-awr, Miqyaer nae mrtaq-euq gardeuq-anr hawlar-awq. Aqyawf nae tsawrhaq-euq zaqdeuq-euq gharduq mrtaq-euq jeq-aq, Yawzeu bawlar paq-aer ghae-eu mae.

⁶ Aqyawf, iqmalavshav-anr guicorni ghae-eu mirtsaq bipyeuf-ir-awr, Aqyawfmaf, lawrgawv gawvma-anr aqkuir nae cantsaev-euq mae. Khoer baqda’nae, aqdui, aqyawf-euq lafkhoer laqkhaq caer-eu ma.

⁷ Aqyawf, aqyawf-euq baoq-anr ghoe-awr mqmaq maqbyav yarzir uvlanr-eu lafkhoer; Aqyawf-euq myavnuiv, tsawrjeuq tsawrca deuq-anr hawluf-awr, Puiq-awr muir-eu deuq yawqhar yawqha taqbi ciqgor. Sela.

⁸ Tsawrhaqzaq-or! Nawmaf, nga’maf-euq Miqyaer-anr jaceuq-awq. Aqyawf-anr jaceuq-eu tersar bi gaqdoe-ir-awq.

⁹ Aqyawf, aqdui-euq nuima saflar, daef-eu deuq-euq ghanrcae bijawr naeqlaf-awr, Aqdui-euq aqkuir sanqtif maqya tif-ir ni hawrpir naeqlaf-eu mae.

¹⁰ Aqjeq mirnae aernar-aq, Miqyaer-or! Nawr, nga’maf-anr tsermr haw-euq mae; Pyur-anr lavshawr-eu lof-aer, nawr, nga’maf-anr lavshawr naeqlaf-euq mae.

¹¹ Nawr, nga’maf-anr bawghaf khmrtaq-euq gar bi pafler naeqlaf-awr, Nawr, nga’maf-euq narkhan kan-eu shaqzanq ciqpi naeqlaf-euq mae.

¹² Nawr, nga’maf-euq uqduq-euq khoertav tsawrhaq bidziq taq-awr, Nga’maf, miqdzaq hawr-eu ircuf-anr ya cantsaev-euq ma. Aerkhawf, nawr, nga’maf-anr bawle zale-eu jawrduq-anr sheuqkeuv naeqlaf-euq mae.

¹³ Ngar, nawq-euq nymr-anr le-awr dzanpuiv-awr lawr-eu jeq yurlaf-awr, Ngar, nawq-anr kamqtaq-euq lof-aer mrbyan ma.

¹⁴ Khoer-aq, ngaq-euq maeqluq nae aer-euq jeq pyeuf-eu mae. Ngar gardzaq garkawv jav ngae, ngaq-euq khaqmae nae ngaeq-euq ma.

¹⁵ Ngar, dzanpuiv-awr lawr-eu jeq, nawq-anr jeqzaq yawtsur damqnaeqlar ma. Yawr-euq saf yawsaw lawrnaeqlar ma; Ngar, mawrner hawr-eu cifmyaef lawrnaeqlar ma. Sela.

¹⁶ Miqyaer-anr guv-eu nawmaf dawqtawvluf lar-awr narhaq lar-awq. Ngar, nawmaf-anr aqyawf nae ngaq-euq nuima saflar-euq gharduq, Mrnaeq laf-euq jeq dzawrnaeq nyar.

¹⁷ Ngar, aqyawf-anr ngaq-euq khaqmae nae gurgaq-euq ma. Ngaq-euq maeqlar nae aqyawf-anr ciqpoeq ciqgor-euq ma.

¹⁸ Ngar, ngaq-euq nuima-euq lafkhoer yawlaeq yawca jeq bijav nar-aq, Sanqpaq Miqyaer, ngaq-anr maq narhaq naeqlaf-a.

¹⁹ Aerkhawf, ngaq-euq dawq aqdir Miqyaer-anr gaqler-awr, Aqyawf, ngar guiqlanq shar-eu tersar-anr narhaq naeqlaf-euq mae.

²⁰ Miqyaer-anr jaceuq ma. Aqyawf, ngaq-euq guiqlanq shardawq-anr maq byaerdzae-aer, Aqyawf, ngaq-anr ghawqshaq maqgaq-aer maq ghaenaeq laf-aq.