Jaceuq 145 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Huiq-awr Muiq-eu Ya’we Miqyaer

Daqbir-euq jaceuq-eu dawqcar

¹ Ngaq-euq Miqyaer-or! Ngar, nawq-anr ciqpoeq ciqgor ma; Ngar, nawq-euq tsawrmyanr-anr, mqmaq maqbyav yarzir, li-eu maqbawni jaceuq ma.

² Yawqnan navluf, ngar, nawq-anr jaceuq ma. Ngar, nawq-euq tsawrmyanr-anr, mqmaq maqbyav yarzir, li-eu maqbawni jaceuq ma.

³ Ya’we Miqyaer-aq, huiq-awr manr-eu mae; Aqyawf-anr yawkhav-aer jaceuq-eu tsaq mae; Aqyawf-euq yawhuiq yawmanr-anr maq povduq nya-a.

⁴ Nawq nae mr-euq gardeuq-euq garkawv, tiqzir sair tiqzir jaceuq taef-a; Nawq nae baoq-euq lafkhoer mr-euq deuq, dzawrgaqnaeq taef-a.

⁵ Ngar, nawq nae mr-euq zanqler paq-aer ghae-eu gardeuq-euq garkawv hawr-eu, Nawq-euq jaqlaq yawbya, arnavni yawshaef khanqsaer byan-eu garkawv dzardzivdziv ma.

⁶ Tsawrhaqzaq, nawq nae baoq-euq lafkhoer, Yawzeu bawlar paq-aer ghae-eu jeq mr-euq garkawv ja taef-a; Ngar, nawq-euq yawhuiq yawmanr-euq garkawv dawqdzawr mr ma.

⁷ Aqyawfmaf, nawq-euq zawr muiq-eu garkawv noeqmawr-awr ja taef-a; Aqyawfmaf, nawr tsaq-awr dawr-eu garkawv car taef-a.

⁸ Ya’we Miqyaer-aq, guiqlanq yawdzanr byan-awr, ghoernya gaqnya duidui-eu uqtaf, Nuima yawkawr-aer maqpaerni, ghawqshaq yawkhav-aer gaqnya-eu mae.

⁹ Ya’we Miqyaer-aq, yawqghaq navluf-anr muiq-awr; Aqyawf-euq lafzar-euq khoertav, nanqyuni ghawqshaq gaq-eu mae.

¹⁰ Ya’we Miqyaer-or! Nawq-euq lafzar nawq-anr jaceuq-awr; Nawq-euq tsawrshawr khawf, nawq-euq guiqlanq-anr jaceuq taef-a.

¹¹ Aqyawfmaf, nawr uvlanr-eu jeq-euq yawshaef khanqsaer-euq garkawv ja-awr, Nawq-euq baoq-euq garkawv ja taef-a.

¹² Khoermirnae, tsawrhaqzaq, baoq-euq lafkhoer aqyawf nae mr-euq garkawv hawr-eu, Aqyawf uvlanr-eu jeq-euq jaqlaq yawbya-euq yawshaef khanqsaer siqnyalar taef-a.

¹³ Nawr uvlanr-eu jeq-aq, mqmaq maqbyav yarzir zif-eu uvlanr-eu jeq pyeuf-awr; Nawq-euq dzoeqdzaq-aq, tiqzir sair tiqzir zif-eu mae.

¹⁴ Ya’we Miqyaer, kharcoq-ir-eu tsawrhaq-anr ciqtur naeq-awr; Khar awbyav-eu tsawrhaq-anr ciqgor naeq-eu mae.

¹⁵ Yawdaef khardaef-eu jeq-euq myavnuiv, nawq-anr noeqtmq-awr hawluf-eu mae; Nawr yamqlaw tsaq ngae, aqyawf maf-anr dzaqdzaq dawrdawr bif-eu mae.

¹⁶ Nawr, nawq-euq aqlaf pyaeq-awr, Yawdaef khardaef-eu jeq-anr, tiqdaev bidzaq bi dawrdaev-eu mae.

¹⁷ Ya’we Miqyaer-euq garma dawqtawvluf tsaq-awr dawr-eu mae; Aqyawf kharmr kharshar-eu jeq guiqlanq yawdzanr byan-eu mae.

¹⁸ Ya’we Miqyaer-aq, aqyawf-anr kharkur-eu tsawrhaq deuq-euq dawqpae jawr-eu mae. Yawtsaq yawdawr-euq lafkhoer kharkur-eu tsawrhaq-euq dawqpae jawr-eu mae.

¹⁹ Aqyawf, aqyawf-anr guv-eu tsawrhaq deuq geufmawf-eu jeq tiqlof bifnaeq-awr, Aqyawfmaf kur ngae, narhaq-awr kakhof naeq-eu mae.

²⁰ Ya’we Miqyaer, aqyawf-anr khargaq-eu tsawrhaq-anr hawpir-eu mae; Aerkhawf, tsawrcawv dawqtawv luf-anr aqyawf lavcawv taef-a.

²¹ Ngaq-euq khaqmae, Ya’we Miqyaer-anr jaceuq-eu jeq ngaeq ma; Shiqshaq dawqtawvluf mqmaq maqbyav yarzir, li-eu maqbawni; Aqyawf-euq shawr-eu tsawrmyanr-anr jaceuq taef-a.