2 Sahˬpaˬ 6 - Akha

Deuˆ haˬ seuˬ poˆ mawˇ kʼoꞈ-euˬ

¹ Tiˬ nah keuˆ laˇ ngeh, Eˇliˇshehˇ haw luꞈ pyaˆ luꞈ-eu laꞈ oˆ jawˇ-eu Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ Eˇliˇshehˇ-ahˇ, “Nga maꞈ jawˇ-eu jawˇ duˬ aˇ dzehˬ-ehˇ suꞈ nya.

² Kʼoeˇ miˇ neh, nga maꞈ jawˇ-eu jawˇ duˬ tsoˆ lahˬ-eu gʼaˇ duˬ, Yawˇdaˬ lawˇ baˬ-ahˇ iˇ-awˇ aˇ bawˇ bi deuˆ-iˇ laꞈ” lehˇ shaˇ ngeh, “Iˇ-awˇ deuˆ-iˇ-awˬ” lehˇ Eˇliˇshehˇ ehˇ nehˬ-euˬ meh.

³ Aˬ yawꞈ maꞈ laꞈ kʼoeˇ tiˬ gʼaˬ, “Nawˇ gʼeh nga maꞈ nehˬ-ehˇ oe nehˬ laꞈ-awˬ” lehˇ Eˇliˇshehˇ-ahˇ ehˇ ngeh, “Ngaˇ gʼeh oe tehꞈ-a” lehˇ ehˇ kʼoꞈ nehˬ-euˬ meh.

⁴ Kʼoeˇ naˇ, aˬ yawꞈ maꞈ tiˬ kawˆ loꞈ-ehˇ doˆ-iˇ-euˬ meh. Yawˇdaˬ lawˇ baˬ-ahˇ aˬ yawꞈ maꞈ iˇ keuˆ ngeh, aˇ bawˇ tuˇ-euˬ meh.

⁵ Aˬ yawꞈ maꞈ laꞈ kʼoeˇ tiˬ gʼaˬ aˇ bawˇ tuˇ luꞈ ngeh, deuˆ haˬ seuˬ lehˆ-iˇ-awˇ, iˇ cuꞈ-ahˇ ga puꞈ-euˬ meh. Tsawˇ haˬ kʼoeˇ gʼaˬ Eˇliˇshehˇ-ahˇ, “Aˬ joˆ-ehˇ jahˇ nmˇ. Deuˆ haˬ seuˬ heu seuˬ aˬ cawˬ jawˇ gaˇ shaˇ ngaˬ laꞈ-euˬ ma” lehˇ ehˇ nehˬ-euˬ meh.

⁶ “Aˬ geu tsahˇ-ahˇ ga puꞈ-euˬ ta” lehˇ, Eˇliˇshehˇ aˬ yawꞈ-ahˇ naˇ haˬ-euˬ meh. Deuˆ haˬ seuˬ ga puꞈ-euˬ kʼoeˇ tsahˇ Eˇliˇshehˇ-ahˇ mehˬ nehˬ ngeh, Eˇliˇshehˇ daˇ kawˬ tiˬ kawˬ deuˆ-awˇ, kʼoeˇ gaˇ biˬ puꞈ-euˬ meh. Kʼoeˇ ngeh, deuˆ haˬ seuˬ kʼoeˇ iˇ cuꞈ kʼoeˇ taˆ gʼa doˆ laˇ-euˬ meh.

⁷ “Deuˆ haˬ seuˬ yuˇ doˆ-awˬ” lehˇ Eˇliˇshehˇ ehˇ ngeh, tsawˇ haˬ kʼoeˇ gʼaˬ mˇ jeh-awˇ, deuˆ haˬ seuˬ yuˇ doˆ-euˬ meh.

Suˇliˆ guiˇ maꞈ-ahˇ gaˇ ma sheuˬ bahˬ nehˬ-euˬ

⁸ Iˇsaˬleˬlaˆ miˇ kʼahˬ-ahˇ Suˇliˆ sahˬ paˬ guiˇ deuˆ-euˬ meh. Aˬ yawꞈ-euˬ gaˇ mˇ-eu yaw huiˬ yaw mahˇ deuˬ nehˬ-ehˇ aˬ yawꞈ bawˬ dzaˬ-awˇ, aˬ geu tsahˇ-ahˇ guiˇ daˬ daˬ-awˇ jawˇ-eu tsaˬ nga lehˇ jawˇ duˬ tseˇ-euˬ meh.

⁹ Ehˇ kʼawꞈ, Eˇliˇshehˇ neh Iˇsaˬleˬlaˆ sahˬ paˬ-ahˇ, “Jawˇ duˬ kʼoeˇ tsahˇ-ahˇ taˬ iˇ. Suˇliˆ tsawˇ haˬ deuˬ dzuˇ zaꞈ-awˇ loꞈ luꞈ meh” lehˇ bi tsaꞈ gaˬ leˇ-euˬ meh.

¹⁰ Kʼoeˇ naˇ, Iˇsaˬleˬlaˆ sahˬ paˬ neh, jawˇ duˬ kʼoeˇ tsahˇ-ahˇ jawˇ-eu tsawˇ haˬ deuˬ yaw muiˬ paˬ-ehˇ yahˇ ni dawˬ biꞈ-awˇ, lehˬ hmˬ-awˇ bi loꞈ-euˬ meh. Iˇsaˬleˬlaˆ sahˬ paˬ-ahˇ, Eˇliˇshehˇ neh kʼoeˇ loꞈ-ehˇ gʼawˬ mya poˆ ehˇ nehˬ-awˇ bi yahˇ-euˬ meh.

¹¹ Gaˇ kʼawˆ kʼoeˇ hmˬ baˬ da neh, Suˇliˆ sahˬ paˬ nui ma cawˆ dui dui laˇ-awˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ kuˇ uiˬ-awˇ, “Naw maꞈ laꞈ kʼoeˇ aˬ geu gʼaˬ Iˇsaˬleˬlaˆ sahˬ paˬ jawˇ paw pyawˬ luꞈ te” lehˇ naˇ haˬ-euˬ meh.

¹² Aˬ yawꞈ maꞈ laꞈ kʼoeˇ tiˬ gʼaˬ ehˇ-eu, “Sahˬ paˬ-oˇ, nga maꞈ tiˬ gʼaˬ-iˬ Iˇsaˬleˬlaˆ sahˬ paˬ jawˇ paw pyawˬ-eu maˬ ngeuˇ, Miˬyehˇ gʼaˇ duˬ ngehˬ dah-eu Eˇliˇshehˇ kʼoeˇ gʼaˬ-aˬ, nawˬ-euˬ naˬ suˬ laꞈ kʼoeˇ nawˬ neh ngehˬ-euˬ dawˬ-ahˇ keuˆ ni, Iˇsaˬleˬlaˆ sahˬ paˬ-ahˇ ehˇ nehˬ luꞈ-eu meh.”

¹³ Sahˬ paˬ ehˇ-eu, “Aˬ yawꞈ aˬ geu gaˇ jawˇ nga lehˇ poˆ tseˇ duˬ sheˇ. Aˬ yawꞈ-ahˇ ngaˇ bi nyehꞈ laˬ-iˇ la.” Eˇliˇshehˇ Doˬdaˬ meuˬ-ahˇ jawˇ-eu gaˇ kawˆ, aˬ yawꞈ-ahˇ aˬ cawˬ ehˇ nehˬ-euˬ meh.

¹⁴ Kʼoeˇ ngeh, mahˬ deuˬ hawˇ-eu mahˬ laˆ lawˬ deuˬ-ahˇ leˇ-ehˇ, guiˇ maꞈ maꞈ ma tiˬ maꞈ aˬ yawꞈ pyehˬ gʼeh-euˬ meh. Guiˇ maꞈ kʼoeˇ maꞈ meuˬ kʼoeˇ meuˬ-ahˇ uˬ ciꞈ paw iˇ keuˆ-awˇ, loꞈ jawˬ-euˬ meh.

¹⁵ Uˬ shawˬ yaw naꞈ-ehˇ, Eˇliˇshehˇ-euˬ zaˬ kʼaˆ uˬ suˇ tuˇ-awˇ laꞈ nyiˇ doˆ-iˇ ngeh, mahˬ hawˇ-eu mahˬ laˆ lawˬ deuˬ teh luꞈ-eu Suˇliˆ guiˇ maꞈ kʼoeˇ maꞈ neh, meuˬ-ahˇ loꞈ jawˬ jiˇ taˬ-euˬ gaˇ ya mawˇ-euˬ meh. Kʼoeˇ ngeh, Eˇliˇshehˇ jawˇ gaˇ aˬ yawꞈ gʼoꞈ leˇ-awˇ, “Aˬ joˆ-ehˇ jahˇ nmˇ. Aˬ dui kʼoeˇ taˆ luˬ-iˇ seˇ-iˇ-eu jeˬ keuˆ le taˬ-euˬ nga” lehˇ ehˇ nehˬ-euˬ meh.

¹⁶ “Taˬ guˆ. Aˬ dui jawˇ paw jawˇ-eu deuˬ aˬ yawꞈ maꞈ myaˆ maˬ tseˇ myaˬ ma” lehˇ Eˇliˇshehˇ ehˇ-eu meh.

¹⁷ Kʼoeˇ naˇ, “Sahˬpaˬ Miˬyehˇ-oˇ, aˬ yawꞈ-ahˇ myaˆ nuiˆ pah nehˬ-awˇ bi mawˇ-awˬ” lehˇ Eˇliˇshehˇ guiˬ lahˬ shaˇ-euˬ meh. Aˬ yawꞈ-euˬ shaˇ dawˬ-ahˇ Sahˬpaˬ Miˬyehˇ naˇ haˬ nehˬ-awˇ, aˬ yawꞈ-euˬ zaˬ kʼaˆ kʼoeˇ gʼaˬ haw gʼeh ngeh, Eˇliˇshehˇ-euˬ jawˬ jawˬ-ehˇ, miˬ dzaˬ mahˬ hawˇ-eu miˬ dzaˬ mahˬ laˆ lawˬ deuˬ, gawˬ jawˬ jawˬ lah-ehˇ jawˇ byah taˬ-euˬ gaˇ ya mawˇ-euˬ meh.

¹⁸ Suˇliˆ tsawˇ haˬ deuˬ guiˇ deuˆ le-eu lehˇ oe ngeh, “Sahˬpaˬ Miˬyehˇ-oˇ, tsawˇ haˬ heu deuˬ tahˬ sawˇ bi sawˇ-iˇ jiˇ-awˬ” lehˇ, Eˇliˇshehˇ guiˬ lahˬ shaˇ-euˬ meh. Aˬ yawꞈ-euˬ shaˇ dawˬ-ahˇ Sahˬpaˬ Miˬyehˇ naˇ haˬ-awˇ, tsawˇ haˬ kʼoeˇ deuˬ-ahˇ tahˬ sawˇ bi sawˇ-iˇjiˇ-euˬ meh.

¹⁹ Kʼoeˇ naˇ, aˬ yawꞈ maꞈ jawˇ gaˇ Eˇliˇshehˇ le-awˇ, “Naw maꞈ gaˇ ma oe bahˬ-euˬ nga. Naw maꞈ poˆ le-euˬ meuˬ-aˬ, heu meuˬ maˬ ngeuˇ-a. Ngaˬ-euˬ mehˬ nah caw teh laˇ-awˬ. Naw maꞈ shaˇ caw luꞈ-eu tsawˇ haˬ kʼoeˇ gʼaˬ jawˇ gaˇ naw maꞈ-ahˇ ngaˇ sheuˬ gʼeh nehˬ nyaˇ” lehˇ ehˇ neh-euˬ meh. Kʼoeˇ naˇ, aˬ yawꞈ maꞈ-ahˇ Saˬmaˬliˆ meuˬ laꞈ kʼoeˇ aˬ yawꞈ sheuˬ uˇ gʼeh-euˬ meh.

²⁰ Saˬmaˬliˆ meuˬ-ahˇ aˬ yawꞈ maꞈ uˇ keuˆ leˇ-euˬ nehˬ-ehˇ, “Sahˬpaˬ Miˬyehˇ-oˇ, aˬ yawꞈ maꞈ myaˆ nuiˆ paˇ mawˇ laˇ ni myaˆ nuiˆ pah nehˬ-awˬ” lehˇ, Eˇliˇshehˇ guiˬ lahˬ shaˇ-euˬ meh. Aˬ yawꞈ-euˬ shaˇ dawˬ-ahˇ Sahˬpaˬ Miˬyehˇ naˇ haˬ-awˇ, aˬ yawꞈ maꞈ-euˬ myaˆ nuiˆ paˇ bi mawˇ laˇ-euˬ meh. Kʼoeˇ ngeh jawˇ, Saˬmaˬliˆ meuˬ laꞈ kʼoeˇ aˬ yawꞈ maꞈ jawˇ luꞈ gaˇ ya mawˇ-euˬ meh.

²¹ Suˇliˆ tsawˇ haˬ deuˬ-ahˇ Iˇsaˬleˬlaˆ sahˬ paˬ ya mawˇ ngeh, “Aˬ yawꞈ maꞈ-ahˇ sehꞈ-awˬ loˇ. Aˬ yawꞈ maꞈ-ahˇ sehꞈ-awˬ loˇ” lehˇ, Eˇliˇshehˇ-ahˇ naˇ haˬ-euˬ meh.

²² Eˇliˇshehˇ ehˇ-eu, “Aˬ yawꞈ maꞈ-ahˇ taˬ sehꞈ. Guiˇ deuˆ gaˇ nyehꞈ mi-euˬ yehˇ deuˬ-ahˇ kʼawꞈ, nawˇ maˬ sehꞈ ni taˬ nehˬ-euˬ maˬ ngeuˇ loˇ. Aˬ yawꞈ maꞈ-ahˇ dzaˬ dzaˬ dawˇ dawˇ liˬ nehˬ-awˇ, aˬ yawꞈ maꞈ-euˬ sahˬ paˬ jawˇ gaˇ pyehˬ kʼoꞈ gʼeh-awˬ.”

²³ Kʼoeˇ ngeh, Iˇsaˬleˬlaˆ sahˬ paˬ neh aˬ yawꞈ maꞈ-ahˇ dzaˬ byawˇ byawˇ ma liˬ nehˬ-awˇ, aˬ yawꞈ maꞈ dzaˬ yehꞈ dawˇ yehꞈ gʼaˬ ngeh, Suˇliˆ sahˬ paˬ jawˇ gaˇ pyehˬ kʼoꞈ gʼeh-euˬ meh. Kʼoeˇ ngeh neh naˇ, Suˇliˆ tsawˇ haˬ deuˬ Iˇsaˬleˬlaˆ miˇ kʼahˬ-ahˇ guiˇ maˬ paˇ deuˆ le ni byehˇ-euˬ meh.

Saˬmaˬliˆ meuˬ bi loꞈ jawˬ-euˬ

²⁴ Aˇ yamˬ ui cuiˆ myahˇ laˇ ngeh jawˇ, Suˇliˆ sahˬ paˬ Beˬhaˬdaˇ-aˬ, aˬ yawꞈ-euˬ guiˇ maꞈ dawˬ tawˆ luꞈ sheuˬ-awˇ, Iˇsaˬleˬlaˆ miˇ kʼahˬ-ahˇ guiˇ deuˆ-eu lehˇ oe-awˇ, Saˬmaˬliˆ meuˬ-ahˇ loꞈ jawˬ taˬ-euˬ meh.

²⁵ Kʼoeˇ loꞈ-ehˇ loꞈ jawˬ taˬ-euˬ baˬ da neh, meuˬ laꞈ kʼoeˇ mehꞈ dui shuꞈ dui dui-eu jeˬ keuˆ le-awˇ, mahˬ tahˬ laˆ uˬ duˬ tiˬ siˬ-euˬ pyuˇ maˇ byaˆ yehꞈ tseˇ byaˆ poeˬ keuˆ-awˇ, nuiˆ gahˬ tiˬ kaˇ saˆ-euˬ pyuˇ maˇ byaˆ ngaˬ byaˆ poeˬ keuˆ-euˬ meh.

²⁶ Iˇsaˬleˬlaˆ sahˬ paˬ meuˬ lahˇ dawˬ peh gaˇ ma cah luꞈ ngeh, “Sahˬ paˬ-oˇ, caw ba nehˬ laꞈ-awˬ” lehˇ, zaˬ miˬ zaˬ tiˬ gʼaˬ guˇ-eu meh.

²⁷ “Sahˬpaˬ Miˬyehˇ nawˬ-ahˇ maˬ caw ba nehˬ-eu-aˬ, ngaˇ aˬ joˆ-ehˇ paˇ caw ba nehˬ nmˇ” lehˇ, sahˬ paˬ ehˇ nehˬ-euˬ meh.

²⁸ Kʼoeˇ naˇ, “Nawˬ-ahˇ aˬ jeˬ gʼeh taˬ” lehˇ, zaˬ miˬ zaˬ kʼoeˇ gʼaˬ-ahˇ sahˬ paˬ naˇ haˬ-euˬ meh. Zaˬ miˬ zaˬ kʼoeˇ gʼaˬ ehˇ-eu, “ ‘Iˬ nah ngaˬ-euˬ zaˬ caꞈ dzaˬ-awˇ, ni shawˬ nah aˬ yawꞈ-euˬ zaˬ caꞈ dzaˬ kaˇ-euˇ’ lehˇ, zaˬ miˬ zaˬ heu gʼaˬ miˇ nah huˬ nah ngaˬ-ahˇ ehˇ-eu meh.

²⁹ Kʼoeˇ miˇ neh ngaˬ-euˬ aˬ li puꞈ-awˇ dzaˬ-euˬ ma. Ehˇ kʼawꞈ, aˬ yawꞈ-euˬ aˬ li ya puꞈ dzaˬ-eu aˇ nah keuˆ laˇ ngeh, maˬ puꞈ dzaˬ ni ciˬ yaꞈ taˬ-euˬ meh.”

³⁰ Dawˬ kʼoeˇ dawˬ-ahˇ sahˬ paˬ ya gaˬ ngeh, nui ma-ahˇ zaw dui dui leˇ-awˇ, aˬ yawꞈ dm luꞈ-eu mehˬ tsoeˬ cehˬ pyaˬ-euˬ meh. Kʼoeˇ ngeh, sahˬ paˬ guˬ daˇ pehˇ zeuˇ mehˬ tsoeˬ dm ahˇ taˬ-euˬ gaˇ, meuˬ meuˬ lahˇ dawˬ peh jawˇ-eu tsawˇ haˬ deuˬ ya mawˇ-euˬ meh.

³¹ “Iˬ nah Eˇliˇshehˇ-euˬ uˬ duˬ ngaˇ maˬ deuˆ tsehˆ nya naˇ, Sahˬpaˬ Miˬyehˇ ngaˬ-ahˇ sehꞈ luꞈ-uˇ” lehˇ aˬ yawꞈ ehˇ-eu meh.

³² Eˇliˇshehˇ-aˬ, aˬ yawꞈ jawˇ gaˇ dawˬ deh gʼa le-euˬ tsawˇ mawˬ tsawˇ kʼaˆ deuˬ nehˬ-ehˇ, nymˇ laꞈ kʼoeˇ nuiˇ luꞈ-eu meh. Kʼoeˇ ngeh, sahˬ paˬ neh tsawˇ haˬ tiˬ gʼaˬ pyehˬ gʼeh leꞈ-euˬ meh. Ehˇ kʼawꞈ, tsawˇ haˬ kʼoeˇ gʼaˬ maˬ oe keuˆ mi naˆ-ehˇ, tsawˇ mawˬ tsawˇ kʼaˆ kʼoeˇ deuˬ-ahˇ Eˇliˇshehˇ ehˇ nehˬ-eu, “Tsawˇ haˬ-ahˇ sehꞈ-eu kʼoeˇ gʼaˬ tsawˇ haˬ tiˬ gʼaˬ pyehˬ leꞈ-awˇ, ngaˬ-ahˇ bi sehꞈ le-eu lehˇ bi oe luꞈ meh. Aˬ yawꞈ heu gaˇ oe keuˆ naˇ, maˬ bi uˇ laˇ ni laˇ gʼoˆ piˬ tehˬ-awˬ. Sahˬ paˬ kʼawꞈ aˬ yawꞈ-euˬ mehˬ nah caw teh leꞈ tehꞈ-a.”

³³ Aˬ yawꞈ kʼoeˇ loꞈ-ehˇ ehˇ gʼaˬ-eu maˬ dah ni, sahˬ paˬ oe keuˆ-awˇ ehˇ-eu, “Nga maꞈ kʼoeˇ taˆ shaˬ-eu zahˬ-eu heu bi keuˆ le-euˬ gʼaˬ Sahˬpaˬ Miˬyehˇ meh loˇ. Aˬ yawꞈ tiˬ jeˬ paˬ jahˇ nehˬ laꞈ gaˇ ngaˇ dawˬ dawˬ-ehˇ maˬ paˇ jawˇ ma.”