2 Sahˬpaˬ 22 - Akha

Yuˇdaˆ sahˬ paˬ Yawˇshiˆ

¹ Yawˇshiˆ-aˬ, aˇ kʼoꞈ yehꞈ kʼoꞈ kʼawˆ ngeh Yuˇdaˆ sahˬ paˬ pyeuꞈ laˇ-awˇ, Yeˬluˇsaˬlehˬ meuˬ-ahˇ jawˇ-awˇ smˬ tseˇ tiꞈ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Bawˇzaˬkaˇ meuˬ-ahˇ jawˇ-eu Aˬdaˬyaˇ-euˬ aˬ buˇ Yeˬdiˇdaˬ meh.

² Yawˇshiˆ-aˬ, Sahˬpaˬ Miˬyehˇ nui ma tsaˬ-eu jeˬ mˇ-euˬ meh. Aˬ yawˬ-euˬ aˬ poeˬ sahˬ paˬ Daˬbiˇ-ahˇ aˬ yawꞈ dzaw geuꞈ-awˇ, Miˬyehˇ-euˬ zahˇ dawˬ kʼoꞈ dawˬ deuˬ-ahˇ yaw muiˬ paˬ-ehˇ caw teh-euˬ meh.

Zahˇ dawˬ kʼoꞈ dawˬ sahˬ boꞈ mawˇ-euˬ

³ Sahˬ paˬ Yawˇshiˆ uˆ lahˇ luꞈ-eu tseˇ yehꞈ kʼoꞈ tiˬ kʼoꞈ-ahˇ, Meˬshuˇlamˬ-euˬ oeˬ paˬ pyeuꞈ-awˇ, Aˬzaˬliˇ-euˬ aˬ li pyeuꞈ-eu saˇ naˇ gaˇ paw aˬ yuiꞈ geuꞈ luꞈ-eu Shaˇpaˬ-ahˇ, aˬ yawꞈ heu loꞈ-ehˇ ehˇ nehˬ-awˇ Uˬ duˬ tahˬ nymˇ nymˇ ma-ahˇ bi le-euˬ meh.

⁴ “Piˇ ma yaw huiˬ gʼaˬ pyeuꞈ-eu Hiˇlaˬkiˇ jawˇ gaˇ le-awˇ, Uˬ duˬ tahˬ nymˇ nymˇ ma-euˬ gʼoˆ kʼehˬ-ahˇ gaˇ mˇ luꞈ-eu piˇ ma deuˬ neh, miˇ kʼahˬ zaˬ deuˬ-ahˇ gʼoˆ uiˬ-euˬ pyuˇ aˇ myaˆ ni jaˆ nga lehˇ haw leˇ sheˇ.

⁵ Uˬ duˬ tahˬ nymˇ nymˇ ma laˆ saˆ gaˇ haw luꞈ pyaˆ luꞈ-eu deuˬ-ahˇ pyuˇ kʼoeˇ deuˬ biꞈ-awˇ, gaˇ mˇ luꞈ-eu deuˬ-ahˇ gʼaˬ gaˇ poeˬ bi biꞈ-awˬ lehˇ, aˬ yawꞈ-ahˇ ehˇ nehˬ-awˬ.

⁶ Laꞈ myawˬ laꞈ sawˆ mˇ-eu deuˬ, nymˇ tsoˆ-eu deuˬ hawˇ-eu, kʼaˬ lo tsaˬ byaˆ gawˬ-eu deuˬ-ahˇ gʼaˬ gaˇ poeˬ biꞈ-awˇ, loˬ-eu daˇ kawˬ hawˇ-eu kʼaˬ lo deuˬ zeuˇ gaˇ kʼawꞈ, pyuˇ kʼoeˇ deuˬ zmˬ-awˬ lehˇ ehˇ nehˬ-awˬ.

⁷ Gaˇ mˇ gaˇ haw luꞈ pyaˆ luꞈ-eu tsawˇ haˬ kʼoeˇ deuˬ-aˬ, yaw sui yaw dawˇ miˇ neh, aˬ yawꞈ maꞈ-euˬ pyuˇ jaˇ laˇ-ahˇ pyehˆ tseˇ haw-eu maˬ loˬ-aˇ.”

⁸ Hiˇlaˬkiˇ jawˇ gaˇ Shaˇpaˬ le-awˇ, sahˬ paˬ-euˬ dawˬ tsaꞈ leˇ ngeh, Hiˇlaˬkiˇ gʼaˬ, aˬ yawꞈ neh Uˬ duˬ tahˬ nymˇ nymˇ ma laꞈ kʼoeˇ Zahˇ dawˬ kʼoꞈ dawˬ sahˬ boꞈ paˇ yoˆ jaˆ-eu ya mawˇ-euˬ gaˇ kawˆ, Shaˇpaˬ-ahˇ dzawˇ nehˬ-euˬ meh. Sahˬ boꞈ kʼoeˇ Shaˇpaˬ-ahˇ biꞈ nehˬ-awˇ, Shaˇpaˬ gui haw-euˬ meh.

⁹ Kʼoeˇ naˇ, Shaˇpaˬ gʼaˬ sahˬ paˬ jawˇ gaˇ gʼoꞈ leˇ-awˇ, “Nawˬ-euˬ zaˬ kʼaˆ deuˬ Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ yuˇ-awˇ, gaˇ mˇ gaˇ haw luꞈ pyaˆ luꞈ-eu deuˬ-ahˇ biꞈ jiˇ taˬ-euˬ meh” lehˇ ehˇ nehˬ-euˬ meh.

¹⁰ Kʼoeˇ naˇ, “Hiˇlaˬkiˇ neh ngaˬ-ahˇ sahˬ boꞈ paˇ yoˆ tiˬ dmˬ biꞈ laꞈ-euˬ meh” lehˇ ehˇ-awˇ, sahˬ paˬ-ahˇ gui mehˬ nehˬ-euˬ meh.

¹¹ Zahˇ dawˬ kʼoꞈ dawˬ sahˬ boꞈ gui mehˬ nehˬ gaˇ sahˬ paˬ ya gaˬ ngeh, nui ma-ahˇ zaw leˇ-awˇ, aˬ yawꞈ dm luꞈ-eu mehˬ tsoeˬ cehˬ pyaˬ-euˬ meh.

¹² Kʼoeˇ naˇ, piˇ ma Hiˇlaˬkiˇ, Shaˇpaˬ-euˬ aˬ li Aˬhiˇkamˬ, Miˇkaˬyaˇ-euˬ aˬ li Aˬkaˬbawˇ, saˇ naˇ gaˇ paw aˬ yuiꞈ geuꞈ-eu Shaˇpaˬ, sahˬ paˬ-euˬ kuiˇ laꞈ geuꞈ-eu Aˬsaˬyaˆ aˬ ha maꞈ-ahˇ, sahˬ paˬ heu loꞈ-ehˇ dawˬ biꞈ-euˬ meh.

¹³ “Sahˬpaˬ Miˬyehˇ jawˇ gaˇ le-awˇ, ngaˇ hawˇ-eu Yuˇdaˆ miˇ kʼahˬ zaˬ deuˬ gʼaˇ duˬ, sahˬ boꞈ paˇ yoˆ heu yoˆ laꞈ kʼoeˇ boꞈ taˬ-euˬ gaˇ kawˆ deuˬ mehˬ bawˬ mˇ leˇ haw sheˇ. Sahˬ boꞈ paˇ yoˆ heu yoˆ laꞈ kʼoeˇ ya mˇ meh lehˇ ehˇ taˬ-euˬ jeˬ-ahˇ, aˬ dui-euˬ aˬ poeˬ aˬ bawˇ deuˬ maˬ mˇ ni byehˇ-euˬ miˇ neh, aˬ yawꞈ aˬ dui-ahˇ nui ma pehˇ luꞈ meh.”

¹⁴ Hiˇlaˬkiˇ, Aˬhiˇkamˬ, Aˬkaˬbawˇ, Shaˇpaˬ, Aˬsaˬyaˆ aˬ ha maꞈ-aˬ, Yeˬluˇsaˬlehˬ meuˬ yaw shuiꞈ tsoˆ-euˬ paw dzeˇ dzaˬ-ahˇ jawˇ-eu Huˇlaˬdaˬ lehˇ myahˇ-euˬ Miˬyehˇ gʼaˇ duˬ ngehˬ dah-eu zaˬ miˬ zaˬ tiˬ gʼaˬ jawˇ gaˇ iˇ-awˇ, naˇ haˬ-iˇ-euˬ meh. (Zaˬ miˬ zaˬ kʼoeˇ gʼaˬ-euˬ kʼaˬ dzeˇ zaˬ-aˬ, Haˬlaˬhaˇ-euˬ oeˬ paˬ pyeuꞈ-awˇ, Tiˇkaˬbaˬ-euˬ aˬ li pyeuꞈ-eu, Uˬ duˬ tahˬ nymˇ nymˇ ma laꞈ kʼoeˇ pehˇ kʼahˬ pehˇ mahˇ jeˬ hmˬ-eu gaˇ mˇ luꞈ-eu Shaˬlmˬ meh.) Kʼaˇ pyeuꞈ laˇ-euˬ gaˇ kawˆ kʼoeˇ deuˬ, zaˬ miˬ zaˬ kʼoeˇ gʼaˬ-ahˇ aˬ yawꞈ maꞈ dzawˇ nehˬ-euˬ meh.

¹⁵ Kʼoeˇ ngeh, zaˬ miˬ zaˬ kʼoeˇ gʼaˬ heu loꞈ-ehˇ ehˇ-eu meh. “Naw maꞈ gʼoꞈ leˇ-awˇ, sahˬ paˬ-ahˇ heu loꞈ-ehˇ ehˇ nehˬ leˇ-awˬ.

¹⁶ Sahˬpaˬ Miˬyehˇ heu loꞈ-ehˬ ehˇ-eu meh. ‘Sahˬ paˬ neh gui haw-euˬ sahˬ boꞈ paˇ dmˬ kʼoeˇ dmˬ laꞈ kʼoeˇ boꞈ taˬ-euˬ loꞈ-ehˇ, Yeˬluˇsaˬlehˬ meuˬ hawˇ-eu kʼoeˇ gaˇ jawˇ-eu tsawˇ haˬ deuˬ-ahˇ ngaˇ kʼehˬ nehˬ kʼaˆ nehˬ-eu lehˇ gʼeh-eu ma.

¹⁷ Aˬ yawꞈ maꞈ ngaˬ-ahˇ byehˇ dzeh-awˇ, miˬ yehˇ nui deuˬ-ahˇ lawˇ-eu shehˇ-eu laꞈ kʼoeˇ, aˬ yawꞈ maꞈ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ baˬ da neh, ngaˬ-ahˇ nui ma bi pehˇ laꞈ-euˬ meh. Yeˬluˇsaˬlehˬ meuˬ-ahˇ ngaˇ nui ma pehˇ laˇ-awˇ, ngaˬ-euˬ nui pehˇ tiˬ jawˇ-iˬ maˬ paˇ shuꞈ-iˇ nya miˇ-a.

¹⁸ Iˇsaˬleˬlaˆ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ, Yuˇdaˆ sahˬ paˬ-ahˇ heu loꞈ-ehˇ ehˇ-eu ma. sahˬ boꞈ paˇ yoˆ teu dmˬ laꞈ kʼoeˇ boꞈ taˬ-euˬ je-ahˇ nawˇ naˇ haˬ geuꞈ-euˬ meh.

¹⁹ Yeˬluˇsaˬlehˬ meuˬ hawˇ-eu kʼoeˇ gaˇ jawˇ-eu tsawˇ haˬ deuˬ-ahˇ ngaˇ kʼehˬ nehˬ ma lehˇ ehˇ taˬ-euˬ gaˇ nawˇ ya gaˬ ngeh, nawˬ-euˬ nui ma noeˬ paˇ-awˇ, mehˬ tsoeˬ cehˬ pyaˬ-eu laꞈ kʼoeˇ, ngaˬ-euˬ mehˬ shiˬ nawˇ nui ma nahˬ yu ni taˬ-euˬ meh. Jawˇ duˬ kʼoeˇ tsahˇ-ahˇ, maˬ haw peuˬ ni guˆ laˇ paˬ-ehˇ gʼeh-eu jawˇ duˬ bi pyeuꞈ laˇ-awˇ, tsawˇ haˬ zaˬ deuˬ yaˬ kʼehˇ yaˬ ngeh, jawˇ duˬ kʼoeˇ tsahˇ-euˬ tsawˇ myahˇ kuˇ-awˇ yaˬ tehꞈ-a. Ehˇ kʼawꞈ, nawˬ-euˬ shaˇ dawˬ ngaˇ naˇ haˬ nehˬ ma.

²⁰ Yeˬluˇsaˬlehˬ meuˬ kʼoeˇ taˆ ngaˇ bi keuˆ le-eu lehˇ gʼeh luꞈ-eu kʼehˬ-eu kʼaˆ-eu jeˬ, nawˇ kʼaˇ dehꞈ kʼoeˇ keuˆ ni maˬ bi keuˆ le-ehˇ nyi naˬ ma. Nawˬ-ahˇ nui saˇ oꞈ-eu laꞈ kʼoeˇ ziˇ bi dehꞈ jiˇ ma’ lehˇ ehˇ-eu meh lehˇ, sahˬ paˬ-ahˇ tsaꞈ nehˬ leˇ-awˬ.” Aˬ yawꞈ maꞈ gʼeh, dawˬ kʼoeˇ dawˬ yuˇ-awˇ, sahˬ paˬ Yawˇshiˆ jawˇ gaˇ gʼoꞈ leˇ-euˬ meh.