1 Sahˬpaˬ 20 - Akha

Suˇliˆ miˇ kʼahˬ nehˬ-ehˇ guiˇ deuˆ-euˬ

¹ Suˇliˆ sahˬ paˬ Beˬhaˬdaˇ-aˬ, aˬ yawꞈ-euˬ guiˇ maꞈ dawˬ tawˆ luꞈ kuˇ uiˬ-awˇ, sahˬ paˬ smˬ tseˇ nyiꞈ gʼaˬ, mahˬ hawˇ-eu mahˬ laˆ lawˬ deuˬ teh-awˇ aˬ yawꞈ nehˬ-ehˇ gm leˇ-euˬ laꞈ kʼoeˇ, Saˬmaˬliˆ meuˬ-ahˇ loꞈ jawˬ le-awˇ guiˇ deuˆ le-euˬ meh.

² Meuˬ kʼoeˇ meuˬ-ahˇ jawˇ-eu Iˇsaˬleˬlaˆ sahˬ paˬ Aˬhaˆ jawˇ gaˇ aˬ yawꞈ tsawˇ haˬ pyehˬ gʼeh-awˇ, heu loꞈ-ehˇ bi tsaꞈ gaˬ-iˇ-euˬ meh. “Sahˬpaˬ Beˬhaˬdaˇ heu loꞈ-ehˇ ehˇ-eu meh.

³ Nawˬ-euˬ pyuˇ hawˇ-eu shuiˇ deuˬ maˬ ehˇ, nawˬ-euˬ zaˬ miˬ zaˬ deuˬ maˬ ehˇ, nawˬ-euˬ zaˬ deuˬ laꞈ kʼoeˇ aˬ cawˬ naˆ maˬ tseˇ aˬ lmˬ muiˬ dzehˬ-eu deuˬ maˬ ehˇ, aˬ yawꞈ-ahˇ nawˇ ya a nehˬ meh lehˇ ehˇ-eu meh”

⁴ Aˬhaˆ ehˇ kʼoꞈ nehˬ-eu, “Aˬ yawꞈ neh kʼaˇ ehˇ-euˬ loꞈ-ehˇ geuꞈ coeˇ ma lehˇ, ngaˬ-euˬ sahˬ paˬ Beˬhaˬdaˇ-ahˇ ehˇ nehˬ leˇ-awˬ. Ngaˬ-euˬ gʼawˇ mawˇ hawˇ-eu ngaˇ kʼaˇ jaˆ-eu yawˬ jeˬ na luꞈ, aˬ yawꞈ-euˬ tehꞈ meh lehˇ ehˇ nehˬ leˇ-awˬ.”

⁵ Kʼoeˇ naˇ, dawˬ tsaꞈ tsaꞈ gaˬ le-euˬ tsawˇ haˬ kʼoeˇ Aˬhaˆ jawˇ gaˇ tiˬ poˆ paˇ oe-awˇ, Beˬhaˬdaˇ-euˬ dawˬ paˇ tsaꞈ gaˬ le-eu laꞈ kʼoeˇ, “Nawˬ-euˬ pyuˇ hawˇ-eu shuiˇ deuˬ maˬ ehˇ, nawˬ-euˬ zaˬ miˬ zaˬ deuˬ hawˇ-eu zaˬ deuˬ maˬ ehˇ, ngaˬ-ahˇ ya a nehˬ laꞈ meh lehˇ, ngaˇ nawˬ-ahˇ dawˬ tsaꞈ tsaꞈ ahˇ leꞈ gʼaˬ-euˬ ma.

⁶ Ehˇ kʼawꞈ ni, nymˬ-mˇ poˆ jawˇ ngaˬ-euˬ gaˇ mˇ-eu yaw huiˬ yaw mahˇ deuˬ pyehˬ gʼeh leꞈ-awˇ, nawˬ-euˬ hawˇ nymˇ-ahˇ maˬ ehˇ, nawˬ-euˬ gaˇ mˇ-eu yaw huiˬ yaw mahˇ deuˬ-euˬ nymˇ-ahˇ maˬ ehˇ, bi goˬ doe haw jiˇ-awˇ, aˬ yawꞈ maꞈ kʼaˇ geuꞈ mawꞈ-eu jeˬ bi yuˇ geuꞈ jiˇ ma. Ni shawˬ nah heu yamˬ-ahˇ aˬ yawꞈ maꞈ oe keuˆ tehꞈ-a.”

⁷ Kʼoeˇ ngeh, Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu aˬ yuiꞈ aˬ tsu deuˬ-ahˇ Aˬhaˆ kuˇ uiˬ-awˇ, “Tsawˇ haˬ heu gʼaˬ aˬ dui-ahˇ laˆ luˬ laˆ seˇ mawꞈ-eu meh lehˇ naw maꞈ siˬ nya-awˬ. Ngaˬ-euˬ miˬ sawˇ zaˬ hawˇ-eu ngaˬ-euˬ pyuˇ shuiˇ deuˬ aˬ yawꞈ-ahˇ ya a nehˬ laꞈ meh lehˇ, aˬ yawꞈ ngaˬ-ahˇ dawˬ tsaꞈ bi tsaꞈ le ngeh, aˬ yawꞈ neh ehˇ-euˬ loꞈ-ehˇ geuꞈ coeˇ ma lehˇ ngaˇ ehˇ kʼoꞈ nehˬ-euˬ ma” lehˇ ehˇ nehˬ-euˬ meh.

⁸ Kʼoeˇ ngeh, “Aˬ yawꞈ-euˬ ehˇ dawˬ-ahˇ maˬ naˇ haˬ-ehˇ, aˬ yawꞈ-ahˇ tiˬ jeˬ-iˬ maˬ biꞈ nehˬ ni jawˇ-awˬ” lehˇ, aˬ yuiꞈ aˬ tsu kʼoeˇ deuˬ hawˇ-eu Iˇsaˬleˬlaˆ tsawˇ haˬ deuˬ ehˇ-eu meh.

⁹ Kʼoeˇ naˇ, Beˬhaˬdaˇ neh dawˬ tsaꞈ bi tsaꞈ le-euˬ tsawˇ haˬ kʼoeˇ gʼaˬ-ahˇ, “Yaw beh poˆ tsaꞈ le-euˬ dawˬ-ahˇ ngaˇ geuꞈ coeˇ ma. Ehˇ kʼawꞈ nyiˬ poˆ tiˬ poˆ tsaꞈ le-euˬ dawˬ-ahˇ ngaˇ maˬ geuꞈ coeˇ nya lehˇ, ngaˬ-euˬ sahˬ paˬ Beˬhaˬdaˇ-ahˇ ehˇ kʼoꞈ nehˬ leˇ-awˬ” lehˇ, Aˬhaˆ ehˇ nehˬ-euˬ meh. Dawˬ tsaꞈ tsaꞈ le-euˬ tsawˇ haˬ kʼoeˇ gʼaˬ gʼoꞈ leˇ gʼaˬ-awˇ, tiˬ poˆ paˇ oe-awˇ, dawˬ tsaꞈ paˇ tsaꞈ le-euˬ meh.

¹⁰ Beˬhaˬdaˇ neh aˬ yawꞈ-ahˇ paˇ pyehˬ gʼeh leꞈ-awˇ, Aˬhaˆ-ahˇ heu loꞈ-ehˇ bi tsaꞈ gaˬ le-euˬ meh. “Meuˬ heu meuˬ-ahˇ laˆ luˬ laˆ seˇ nya ni, ngaˇ tsawˇ haˬ tiˬ loꞈ sheuˬ leꞈ-awˇ, bi laˆ meuˇ bi laˆ loeˇ ma. Meuˬ heu meuˬ-euˬ kʼaˬ lehˇ-ahˇ, aˬ yawꞈ maꞈ-euˬ aˬ laꞈ neh tawˆ kʼoꞈ gʼeh tehꞈ-a. Ngaˇ kʼoeˇ loꞈ-ehˇ maˬ jahˇ pyeuꞈ nya naˇ, miˬ yehˇ kʼoeˇ deuˬ ngaˬ-ahˇ sehꞈ luꞈ-uˇ.”

¹¹ Aˬhaˆ ehˇ-eu, “Maˇ maˇ ni gʼeh-eu yehˇ tiˬ gʼaˬ-aˬ, guiˇ maˬ deuˆ mi naˆ-ehˇ kʼahˬ sehˇ jeˬ huˬ maˬ jehˆ-aˇ. Guiˇ deuˆ gʼaˬ miˇ tsa hawˇ-eu kʼahˬ sehˇ jehˆ nmˇ lehˇ sahˬ paˬ Beˬhaˬdaˇ-ahˇ ehˇ nehˬ leˇ-awˬ.”

¹² Beˬhaˬdaˇ hawˇ-eu aˬ yawꞈ-ahˇ nui ma gm-eu sahˬ paˬ kʼoeˇ deuˬ aˬ yawꞈ maꞈ-euˬ sehˬ gʼawˆ laꞈ kʼoeˇ dzaˬ yehꞈ dawˇ yehꞈ luꞈ ngeh, Aˬhaˆ-euˬ dawˬ-ahˇ aˬ yawꞈ maꞈ ya gaˬ-euˬ meh. “Meuˬ kʼoeˇ meuˬ-ahˇ guiˇ deuˆ-iˇ-eu gʼaˇ duˬ lehˬ hmˬ-awˬ” lehˇ, aˬ yawꞈ-euˬ tsawˇ haˬ deuˬ-ahˇ aˬ yawꞈ dawˬ biꞈ-awˇ, aˬ yawꞈ maꞈ jawˇ duˬ yuˇ-awˇ lehˬ hmˬ dah jiˇ-euˬ meh.

¹³ Aˇ yamˬ kʼoeˇ yamˬ-ahˇ, Miˬyehˇ gʼaˇ duˬ ngehˬ dah-eu tiˬ gʼaˬ Aˬhaˆ jawˇ gaˇ iˇ-awˇ, “Huiˬ dui dui-eu guiˇ maꞈ kʼoeˇ maꞈ-ahˇ taˬ guˆ. Ngaˇ nawˬ-ahˇ aˬ yawꞈ maꞈ kʼoeˇ taˆ bi gʼaˬ leˇ-awˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ nawˇ ya siˬ tehꞈ-a lehˇ Sahˬpaˬ Miˬyehˇ ehˇ-eu meh” lehˇ ehˇ nehˬ-euˬ meh.

¹⁴ “Aˬ suˇ gʼaˬ jeˬ huˬ le-awˇ guiˇ deuˆ leˇ nmˇ” lehˇ Aˬhaˆ naˇ haˬ ngeh, “Meuˬ deuˬ-ahˇ uˆ lahˇ-eu sahˬ paˬ sahˬ ma geuꞈ-eu deuˬ-euˬ laꞈ oˆ jawˇ-eu zaˬ guˬ yehˇ deuˬ deuˆ leˇ tehꞈ-a lehˇ Sahˬpaˬ Miˬyehˇ ehˇ-eu meh” lehˇ, Miˬyehˇ gʼaˇ duˬ ngehˬ dah-eu kʼoeˇ gʼaˬ ehˇ-eu meh. “Guiˇ guiˇ maꞈ maꞈ ma kʼoeˇ taˆ aˬ suˇ gʼaˬ uˆ lahˇ-awˇ guiˇ ya deuˆ leˇ nmˇ” lehˇ sahˬ paˬ naˇ haˬ ngeh, “Nawˇ ya uˆ lahˇ meh” lehˇ, Miˬyehˇ gʼaˇ duˬ ngehˬ dah-eu kʼoeˇ gʼaˬ ehˇ-eu meh.

¹⁵ Meuˬ-ahˇ uˆ lahˇ-eu sahˬ paˬ sahˬ ma geuꞈ luꞈ-eu deuˬ-euˬ laꞈ oˆ jawˇ-eu zaˬ guˬ yehˇ deuˬ-ahˇ sahˬ paˬ kuˇ doˆ-awˇ, dawˬ tawˆ luꞈ nyiˬ yaˇ smˬ tseˇ nyiꞈ gʼaˬ doˆ laˇ-euˬ meh. Kʼoeˇ naˇ, Iˇsaˬleˬlaˆ guiˇ maꞈ-ahˇ aˬ yawꞈ kuˇ doˆ-awˇ, dawˬ tawˆ luꞈ shiꞈ heˇ gʼaˬ doˆ laˇ-euˬ meh.

¹⁶ Nah loˆ ceh laˇ-awˇ, Beˬhaˬdaˇ hawˇ-eu aˬ yawꞈ-ahˇ nui ma taꞈ-eu sahˬ paˬ kʼoeˇ smˬ tseˇ nyiꞈ gʼaˬ aˬ yawꞈ maꞈ-euˬ sehˬ gʼawˆ laꞈ kʼoeˇ dzaˬ yehꞈ dawˇ yehꞈ luꞈ ngeh, guiˇ deuˆ dahˬ beh-euˬ meh.

¹⁷ Zaˬ guˬ yehˇ kʼoeˇ deuˬ aˬ cawˬ mehˬ hu guiˇ daˬ daˬ-awˇ, guiˇ deuˆ leˇ-euˬ meh. “Saˬmaˬliˆ meuˬ-ahˇ neh yehˇ tiˬ deuˬ doˆ le luꞈ meh” lehˇ, Beˬhaˬdaˇ neh bi loꞈ-euˬ yehˇ deuˬ aˬ yawꞈ-ahˇ ehˇ gaˬ leˇ ngeh,

¹⁸ “Aˬ yawꞈ maꞈ guiˇ deuˆ-eu lehˇ laˇ-eu maˬ kaˬ, guiˇ maˬ deuˆ-eu gʼaˇ duˬ ja tsaˬ laˇ-eu lehˇ laˇ-eu maˬ kaˬ, aˬ yawꞈ maꞈ-ahˇ yaw dehꞈ-ehˇ nyehꞈ-awˬ” lehˇ, Beˬhaˬdaˇ dawˬ biꞈ-euˬ meh.

¹⁹ Zaˬ guˬ yehˇ kʼoeˇ deuˬ guiˇ daˬ daˬ taˬ-euˬ mehˬ nah, Iˇsaˬleˬlaˆ guiˇ maꞈ deuˬ caw teh-awˇ guiˇ deuˆ-euˬ meh.

²⁰ Aˬ yawꞈ gʼaˬ yawꞈ, yawˬ ha-ahˇ kʼaˇ deuˆ ceh ceh-eu gʼaˬ-ahˇ deuˆ sehꞈ-euˬ meh. Suˇliˆ tsawˇ haˬ deuˬ cehˆ byaˆ jiˇ-awˇ, Iˇsaˬleˬlaˆ tsawˇ haˬ deuˬ aˬ yawꞈ maꞈ-euˬ mehˬ nah teh-euˬ meh. Ehˇ kʼawꞈ, Beˬhaˬdaˇ gʼaˬ mahˬ dziˬ-awˇ, mahˬ dziˬ-eu aˬ yawꞈ-euˬ yehˇ tiˬ paˆ na deuˬ sheuˬ-awˇ cehˆ dzeuˇ-euˬ meh.

²¹ Sahˬ paˬ Aˬhaˆ deh ga-ahˇ iˇ keuˆ-awˇ, mahˬ hawˇ-eu mahˬ laˆ lawˬ deuˬ yuˇ geuꞈ-awˇ, Suˇliˆ tsawˇ haˬ deuˬ-ahˇ yaw kʼaˆ-ehˇ deuˆ sehꞈ-euˬ meh.

²² Kʼoeˇ naˇ, Miˬyehˇ gʼaˇ duˬ ngehˬ dah-eu kʼoeˇ gʼaˬ sahˬ paˬ Aˬhaˆ jawˇ gaˇ iˇ-awˇ ehˇ-eu, “Gʼoꞈ-iˇ-awˇ, nawˬ-euˬ guiˇ maꞈ yaw muiˬ paˬ-ehˇ lehˬ hmˬ taˬ-awˇ, aˬ joˆ-ehˇ ya jahˇ-eu gaˇ kawˆ yaw muiˬ paˬ-ehˇ shaˇ noeˬ taˬ-awˬ. Aˬ jeˬ miˇ neh ehˇ naˇ, jawˇ la doˆ le ngeh Suˇliˆ sahˬ paˬ guiˇ paˇ deuˆ le tehꞈ-a.”

Suˇliˆ tsawˇ haˬ deuˬ nehˬ-ehˇ guiˇ paˇ deuˆ-euˬ

²³ Sahˬ paˬ Beˬhaˬdaˇ-euˬ gaˇ mˇ-eu yaw huiˬ yaw mahˇ deuˬ sahˬ paˬ Beˬhaˬdaˇ-ahˇ ehˇ nehˬ-eu, “Iˇsaˬleˬlaˆ tsawˇ jeuˬ-euˬ miˬ yehˇ deuˬ-aˬ, gawˬ jawˬ gawˬ duˇ miˬ yehˇ deuˬ pyeuꞈ-eu miˇ neh, Iˇsaˬleˬlaˆ tsawˇ haˬ deuˬ neh aˬ dui-ahˇ guiˇ deuˆ gʼaˬ-euˬ meh. Ehˇ kʼawꞈ, deh ga-ahˇ aˬ dui maꞈ aˬ yawꞈ maꞈ-ahˇ deuˆ ceh ceh naˇ, aˬ dui maꞈ aˬ diˇ gʼaˬ leˇ tehꞈ-a.

²⁴ Sahˬ paˬ kʼoeˇ smˬ tseˇ nyiꞈ gʼaˬ-ahˇ aˇ yaˬ yuˇ ka nehˬ-awˇ, aˬ yawꞈ maꞈ-euˬ jawˇ duˬ-ahˇ, guiˇ maꞈ deuˬ kʼoeˇ taˆ uˆ lahˇ-eu deuˬ-ahˇ aˇ yaˬ yuˇ daˆ nehˬ-awˬ.

²⁵ Yaw beh nawˇ guiˇ deuˆ smˬ ngeh poˆ myaˆ ni myaˬ-eu guiˇ maꞈ deuˬ kuˇ uiˬ-awˇ, mahˬ hawˇ-eu mahˬ laˆ lawˬ deuˬ kʼawꞈ, kʼoeˇ ngeh poˆ myaˆ ni lehˬ hmˬ taˬ-awˬ. Iˇsaˬleˬlaˆ tsawˇ haˬ deuˬ-ahˇ deh ga laꞈ kʼoeˇ deuˆ ceh ceh-awˇ, nymˬ-mˇ poˆ jawˇ-aˬ, aˬ dui maꞈ deuˆ gʼaˬ ma.” Aˬ yawꞈ maꞈ neh ehˇ-euˬ dawˬ-ahˇ sahˬ paˬ Beˬhaˬdaˇ nui ma tsaˬ-awˇ, aˬ yawꞈ maꞈ neh kʼaˇ ehˇ-euˬ loꞈ-ehˇ geuꞈ-euˬ meh.

²⁶ Jawˇ la doˆ le ngeh, Beˬhaˬdaˇ gʼaˬ aˬ yawꞈ-euˬ tsawˇ haˬ deuˬ kuˇ uiˬ-awˇ, Aˬpyehˇ meuˬ-ahˇ Iˇsaˬleˬlaˆ tsawˇ haˬ deuˬ-ahˇ guiˇ deuˆ-iˇ-eu lehˇ doˆ-iˇ-euˬ meh.

²⁷ Iˇsaˬleˬlaˆ tsawˇ haˬ deuˬ kʼawꞈ, aˬ yawꞈ maꞈ-euˬ tsawˇ haˬ kuˇ uiˬ-awˇ, guiˇ deuˆ-eu keu ka biˇ nehˬ-euˬ meh. Kʼoeˇ naˇ, guiˇ deuˆ-eu lehˇ doˆ-iˇ-awˇ, tsawˇ haˬ nyiˬ muˇ biˇ paˆ-awˇ, Suˇliˆ tsawˇ haˬ deuˬ nehˬ-ehˇ maˬ kaˬ maˬ kaˇ-ehˇ taˆ tsoˆ-awˇ jawˇ-euˬ meh. Deh ga tiˬ byah ni jawˇ byah taˬ-euˬ Suˇliˆ tsawˇ haˬ deuˬ nehˬ-ehˇ shaˇ cehˆ haw ngeh, Iˇsaˬleˬlaˆ tsawˇ haˬ deuˬ-aˬ, deh ga-ahˇ uiˬ leˇ taˬ-euˬ ciꞈ myehꞈ ciꞈ maꞈ maꞈ zaˬ nyiˬ maꞈ loˆ ni tehꞈ meh.

²⁸ Miˬyehˇ gʼaˇ duˬ ngehˬ dah-eu tiˬ gʼaˬ sahˬ paˬ Aˬhaˆ jawˇ gaˇiˇ-awˇ, heu loꞈ-ehˇ ehˇ nehˬ-euˬ meh. “Sahˬpaˬ Miˬyehˇ ehˇ-eu, Ngaˇ-aˬ, gawˬ jawˬ gawˬ duˇ miˬ yehˇ pyeuꞈ-awˇ, deh ga-euˬ miˬ yehˇ maˬ ngeuˇ-a lehˇ Suˇliˆ tsawˇ haˬ deuˬ ehˇ-eu miˇ neh, huiˬ dui myaˬ dui dui-eu aˬ yawꞈ maꞈ-euˬ guiˇ maꞈ deuˬ kʼoeˇ taˆ, nawˬ-ahˇ ngaˇ bi gʼaˬ leˇ ma. Kʼoeˇ ngeh, ngaˇ Sahˬpaˬ Miˬyehˇ pyeuꞈ-eu gaˇ kawˆ, nawˇ hawˇ-eu nawˬ-euˬ tsawˇ haˬ deuˬ ya siˬ tehꞈ-a lehˇ ehˇ-eu meh.”

²⁹ Shiꞈ nah keuˆ ni, Suˇliˆ tsawˇ haˬ deuˬ hawˇ-eu Iˇsaˬleˬlaˆ tsawˇ haˬ deuˬ yawˬ ha-euˬ taˆ-ahˇ jawˇ-awˇ, tiˬ muˇ tiˇ muˇ haw tsoˆ taˬ-euˬ meh. Shiꞈ nah aˬ yawꞈ nah-ahˇ aˬ yawꞈ maꞈ guiˇ deuˆ ceh ceh-awˇ, Suˇliˆ tsawˇ haˬ tiˬ seh gʼaˬ Iˇsaˬleˬlaˆ tsawˇ haˬ deuˬ neh bi deuˆ sehꞈ-euˬ meh.

³⁰ Maˬ bi deuˆ sehꞈ-ehˇ kʼaˇ dzeˇ-eu deuˬ Aˬpyehˇ meuˬ-ahˇ cehˆ leˇ-awˇ, meuˬ meuˬ lahˇ neh nyiˬ muiˇ shiꞈ heˇ gʼaˬ bi coˬ tehˬ sehꞈ-euˬ meh. Beˬhaˬdaˇ gʼaˬ kʼawꞈ meuˬ kʼoeˇ meuˬ laꞈ kʼoeˇ cehˆ uˇ leˇ-awˇ, nymˇ tiˬ nymˇ-euˬ naˬ shuˬ-ahˇ dzuˇ zaꞈ-euˬ meh.

³¹ Aˬ yawꞈ-euˬ gaˇ mˇ-eu yaw huiˬ yaw mahˇ deuˬ aˬ yawꞈ jawˇ gaˇ iˇ-awˇ ehˇ-eu, “Iˇsaˬleˬlaˆ sahˬ paˬ deuˬ gʼawˬ shaˬ gaˬ-eu siˬ nya meh lehˇ ehˇ-eu nga maꞈ gaˬ haw-euˬ ma. Nga maꞈ-euˬ joꞈ-ahˇ guˬ daˇ pehˇ zeuˇ dm-awˇ, nga maꞈ-euˬ kawˬ lahˇ-ahˇ aˇ caˆ sheu lahˇ-awˇ, Iˇsaˬleˬlaˆ sahˬ paˬ jawˇ gaˇ bi le laꞈ-awˬ. Aˬ yawꞈ nawˬ-ahˇ maˬ sehꞈ ni taˬ nehˬ laꞈ-eu baw tehꞈ-a.”

³² Kʼoeˇ naˇ, aˬ yawꞈ maꞈ-euˬ joꞈ-ahˇ guˬ daˇ pehˇ zeuˇ lahˇ-awˇ, aˬ yawꞈ maꞈ-euˬ kawˬ lahˇ-ahˇ aˇ caˆ sheu lahˇ-awˇ, Aˬhaˆ jawˇ gaˇ le-awˇ, “Nawˬ-euˬ zaˬ kʼaˆ Beˬhaˬdaˇ-ahˇ taˬ sehꞈ nehˬ laꞈ lehˇ shaˇ luꞈ meh” lehˇ ehˇ nehˬ leˇ-euˬ meh. Aˬhaˆ gʼeh, “Aˬ yawꞈ dehꞈ luꞈ-a siˬ loˇ. Aˬ yawꞈ-aˬ, ngaˬ-eu mehˇ nmˇ loꞈ-ehˇ gʼeh-eu tsawˇ haˬ meh” lehˇ ehˇ-eu meh.

³³ Beˬhaˬdaˇ-euˬ yaw huiˬ yaw mahˇ deuˬ-aˬ, aˬ joˆ-ehˇ ya ngehˬ ya tmˇ-eu gaˇ kawˆ shaˇ noeˬ dui dui luꞈ-eu meh. “Ngaˬ-euˬ mehˇ nmˇ” lehˇ ehˇ-eu dawˬ kʼoeˇ dawˬ Aˬhaˆ ngehˬ doˆ laˇ-eu nehˬ-ehˇ, dawˬ kʼoeˇ dawˬ-ahˇ aˬ yawꞈ maꞈ ja tawˆ ni tuˆ tehˬ-awˇ, “Nawˇ ehˇ-eu loꞈ-ehˇ, Beˬhaˬdaˇ-aˬ, nawˬ-euˬ mehˇ nmˇ tsi tsi ni gʼeh gaˇ duˇ-eu meh” lehˇ ehˇ kʼoꞈ nehˬ-euˬ meh. Kʼoeˇ ngeh, “Aˬ yawꞈ-ahˇ ngaˇ jawˇ gaˇ sheuˬ laꞈ-awˬ” lehˇ Aˬhaˆ dawˬ biꞈ-euˬ meh. Beˬhaˬdaˇ laˇ keuˆ ngeh, aˬ yawꞈ nehˬ-ehˇ mahˬ laˆ lawˬ bi dziˬ-euˬ meh.

³⁴ Aˬhaˆ-ahˇ Beˬhaˬdaˇ ehˇ nehˬ-eu, “Nawˬ da-euˬ laꞈ-ahˇ ngaˬ da neh yuˇ taˬ-euˬ meuˬ deuˬ nawˬ-ahˇ ngaˇ biꞈ kʼoꞈ-awˇ, ngaˬ da neh Saˬmaˬliˆ meuˬ laꞈ kʼoeˇ jeˬ gaꞈ jeˬ ka mˇ-eu jawˇ duˬ bi baw-euˬ loꞈ-ehˇ, nawˇ kʼawꞈ nawˬ-euˬ gʼaˇ duˬ Daˬmaˬsehˇ meuˬ laꞈ kʼoeˇ jeˬ gaꞈ jeˬ ka mˇ-eu jawˇ duˬ bi jaˆ nya tehꞈ-a.” Aˬhaˆ ehˇ-eu, “Toˆ-ehˇ ngeuˇ naˇ, nawˬ-ahˇ ngaˇ pyehˬ nehˬ ma.” Kʼoeˇ naˇ, aˬ yawꞈ nehˬ-ehˇ saˇ jaˇ dzaˬ taꞈ-eu laꞈ kʼoeˇ, pyehˬ nehˬ-awˇ bi gʼoꞈ leˇ-euˬ meh.

Aˬhaˆ-euˬ guiˇ maꞈ ya luˬ ya seˇ-iˇ meh lehˇ Miˬyehˇ gʼaˇ duˬ ngehˬ dah-eu tiˬ gʼaˬ ehˇ-eu

³⁵ Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Miˬyehˇ gʼaˇ duˬ ngehˬ dah-eu tiˬ gʼaˬ neh, Miˬyehˇ gʼaˇ duˬ ngehˬ dah-eu yawˬ gʼaˬ yawˬ-ahˇ, “Ngaˬ-ahˇ diˬ sheˇ” lehˇ ehˇ nehˬ-euˬ meh. Ehˇ kʼawꞈ, kʼoeˇ gʼaˬ aˬ yawꞈ-ahˇ maˬ diˬ-a.

³⁶ Kʼoeˇ ngeh, “Sahˬpaˬ Miˬyehˇ-euˬ ehˇ dawˬ-ahˇ nawˇ maˬ naˇ haˬ geuꞈ-ehˇ ngaˬ-ahˇ maˬ diˬ-eu miˇ neh, ngaˇ jawˇ gaˇ neh nawˇ doˆ-iˇ-eu nehˬ-ehˇ, aˇ laˬ jaˬ shiˇ neh bi kawꞈ sehꞈ tehꞈ-a” lehˇ ehˇ nehˬ-euˬ meh. Kʼoeˇ gʼaˬ doˆ-iˇ-euˬ nehˬ-ehˇ, aˇ laˬ jaˬ shiˇ tiˬ mawˇ doˆ le-awˇ bi kawꞈ sehꞈ-euˬ meh.

³⁷ Miˬyehˇ gʼaˇ duˬ ngehˬ dah-eu kʼoeˇ gʼaˬ tsawˇ haˬ yawˬ gʼaˬ yawˬ jawˇ gaˇ paˇ iˇ-awˇ, “Ngaˬ-ahˇ diˬ sheˇ” lehˇ ehˇ nehˬ ngeh, tsawˇ haˬ kʼoeˇ gʼaˬ aˬ yawꞈ-ahˇ yaw kʼaˆ-ehˇ diˬ naˇ diˬ gawˇ nehˬ-euˬ meh.

³⁸ Miˬyehˇ gʼaˇ duˬ ngehˬ dah-eu kʼoeˇ gʼaˬ, aˬ cawˬ maˬ bi haw siˬ-eu gʼaˇ duˬ myaˆ pyawˬ-ahˇ saˬ paˇ paˇ cehˇ lahˇ-awˇ gaˇ ma gaˇ dzeˇ yawꞈ-awˇ, Iˇsaˬleˬlaˆ sahˬ paˬ iˇ tsehˆ laˇ tsehˆ gaˇ loꞈ-euˬ meh.

³⁹ Sahˬ paˬ laˇ ngeh, Miˬyehˇ gʼaˇ duˬ ngehˬ dah-eu kʼoeˇ gʼaˬ sahˬ paˬ-ahˇ kuˇ-awˇ ehˇ-eu, “Sahˬ paˬ-oˇ, ngaˇ guiˇ deuˆ luꞈ ngeh, yehˇ tiˬ gʼaˬ aˬ yawꞈ neh nyehꞈ mi-euˬ aˬ cawˬ tsawˇ haˬ tiˬ gʼaˬ-ahˇ ngaˇ jawˇ gaˇ nyehꞈ laꞈ-awˇ, heu loꞈ-ehˇ ehˇ-eu meh. Tsawˇ haˬ heu gʼaˬ-ahˇ loꞈ-awˬ. Tsawˇ haˬ heu gʼaˬ cehˆ byoˆ naˇ, nawˬ-euˬ saꞈ laˇ ya biꞈ tsoeˬ tehꞈ-a. Maˬ ngeuˇ naˇ, pyuˇ maˇ byaˆ smˬ heˇ byaˆ nawˇ ya lawˬ tehꞈ-a lehˇ ehˇ-eu meh.

⁴⁰ Ehˇ kʼawꞈ, ngaˇ gaˇ myaˬ luꞈ-eu miˇ neh, tsawˇ haˬ kʼoeˇ gʼaˬ cehˆ byoˆ-euˬ meh.” Sahˬ paˬ ehˇ-eu, “Nawˇ-aˬ, yawˬ haˇ yawˬ ha yaˇ kʼaˬ daˇ gʼaˬ-euˬ meh. Nawˬ neh mˇ lehˬ-euˬ poeˬ nawˇ ya biꞈ tsoeˬ tehꞈ-a.”

⁴¹ Miˬyehˇ gʼaˇ duˬ ngehˬ dah-eu kʼoeˇ gʼaˬ aˬ yawꞈ-euˬ myaˆ pyawˬ-ahˇ lahˇ taˬ-euˬ saˬ paˇ paˇ cehˇ gʼeu paˆ dzeh ngeh, aˬ yawꞈ Miˬyehˇ gʼaˇ duˬ ngehˬ dah-eu tsawˇ haˬ pyeuꞈ gaˇ sahˬ paˬ tiˬ poˆ tehꞈ-ehˇ haw siˬ-euˬ meh.

⁴² Kʼoeˇ ngeh, Miˬyehˇ gʼaˇ duˬ ngehˬ dah-eu kʼoeˇ gʼaˬ sahˬ paˬ-ahˇ ehˇ-eu, “Sahˬpaˬ Miˬyehˇ heu loꞈ-ehˇ ehˇ-eu meh. Ngaˇ ya sehꞈ meh lehˇ ehˇ taˬ-euˬ tsawˇ haˬ-ahˇ nawˇ bi buˬ-iˇ-euˬ miˇ neh, kʼoeˇ-euˬ aˇ poeˬ nawˬ-euˬ saꞈ laˇ ya biꞈ tsoeˬ-awˇ, aˬ yawꞈ-euˬ guiˇ maꞈ-ahˇ bi cehˆ buˬ-euˬ miˇ neh, nawˬ-euˬ guiˇ maꞈ ya luˬ ya seˇ-iˇ tehꞈ-a lehˇ ehˇ-eu meh.”

⁴³ Iˇsaˬleˬlaˆ sahˬ paˬ-aˬ, noeˬ shaˬ noeˬ zahˬ-eu laꞈ kʼoeˇ Saˬmaˬliˆ meuˬ-ahˇ gʼoꞈ leˇ-euˬ meh.