11 Simón Pedro la̠li̠huán taju̠pá nac barco y sakacútulh a̠má tza̠lh hasta nac xquilhtú̠n chúchut, hua̠k laclanca squi̠ti hasta aktum ciento a̠ti̠puxamacu̠tutu, pero ma̠squi luu lhu̠hua squi̠ti xuani̠t, a̠má tza̠lh ni̠ talacáxti̠tli.
Jesús chiné ca̠huánilh: —Caca̠li̠tátit ca̠na caj tancli̠t squi̠ti hua̠ntu̠ a̠cu chipátit huixinín.
—¡Calacapalátit, uú catátit hua̠yaná̠tit! —ca̠huánilh Jesús. Y ni̠para cha̠tum xdiscípulo xkalhásquilh para tícu xuani̠t a̠má chixcú, porque xlacán xtacatzi̠y pi̠ xli̠ca̠na huá Quimpu̠chinacán.
Pus lhu̠hua xlacán taca̠nájlalh hua̠ntu̠ xca̠huanima Pedro y tali̠pá̠hualh Jesús, y cha̠tunu cha̠tunu tataakmúnulh a̠má quilhtamacú, la̠mpara aktutu mi̠lh cristianos.
