Rebaleisan - end blo ebriting 4:11 - Torres Strait Creole (Yumplatok)

¹¹ ‘BosLod ane God blo mipla, yu prapa gad da rait po gede da truglori ane ona ane paua blo eben. Bikoz yu bin meke ebriting lo da wold, ane yu bin gibe laip po ebriting bikoz yu bin wande mekem.’

Rebaleisan - end blo ebriting 4:11 交叉參考

Zenasis - Stat blo ebriting 1:1

Mina prapa longtaim, bipotaim, God i bin meke da skai ane ebriting de antap wea da skai, da lan ya daun ane ebriting lo da lan.

Pas misnare wok 14:15

‘Ei, wanem yupla meke demkainting po? Mitu wase yupla, mitu no God. Mitu bin kam po spik yupla da Gudniuz, so yupla ken slu prom ol dem nambalas god blo yupla ane paine da tru God. Dis tru God, em i laipwan. Em bin meke da skai ane da ert ane da solwata ane ebriting wea dis wold.

Pas misnare wok 17:24

‘Dis seim God em da wan uda bin meke dis wold, ol dem plant ane animal ane ebriting wanem i stap ya. Bikoz em da rula blo eben ane ert, em no stap wea dem seikredples wea man i bin mekem.

Leta po Sos blo Rom 11:36

Ebriting i kamaut prom AntapGod bikoz prom da paua blo em. Ebriting i po soe da bigpaua blo em ane ona em poeba! Amen.

Leta po Sos blo Episis 3:9

God uda i bin meke ebriting, em bin suze mi po eksplein po ebriwan baut dis sikret trutok wea em no bin spik de pas po dem bipotaim pipol.

Leta po Ibrupipol 1:10

Ane God i kip spik: ‘BosLod, de prapa longtaim pas, yu bin meke da ert. Wea oun an blo yu, yu bin meke da skai ane ebriting de.

Leta po Ibrupipol 1:2

Nau lo dem lasdei, God i tok po yumpla tru Boi blo em. Ane em i bin promis ebriting po Boi blo em. Em i bos blo ebriting. Ane tru Boi blo em, God i bin meke da wold ane ebriting wea i stap insaid.

Rebaleisan - end blo ebriting 1:6

Zizas i bin meke yumpla ol king andanit lo em, ane em bin meke yumpla po kam ol prist blo em po wosip God, uda i papa blo em. Yumpla ebribodi go liptemap neim blo Zizas ane preize em bikoz prom dat bigpaua ane glori blo em, ane dis bigpaua ane glori blo em i mata go go, no sabe pinis. Amen.

Rebaleisan - end blo ebriting 10:6

Ane dis einzel i bin meke wan strongpromis wea em spik, ‘Taim po weit, em pinis nau! God nomo go weit.’ Em bin spik diskain wea neim blo da wan uda mata stap wea longlaip poeba, wea em no sabe ded, da wan uda bin meke eben, ert ane solwata ane ebriting wea i stap insaid lo dempla.

Rebaleisan - end blo ebriting 14:7

Em i bin singaut mina laudwan diskain, ‘God em i da wan uda bin meke eben ane ert ane solwata ane ol preswata. Yupla mas prapa rispekt em ane yupla mas liptemap neim blo em, bikoz taim blo em po zaze ol pipol i kam nau. Yupla mas wosip em.’

Rebaleisan - end blo ebriting 19:1

Nau apta ol demting ya, ai bin lisen prapa big noiz blo prapa plenti pipol. Prapa tumas olgeda i singaut de lo eben diskain: ‘Yumpla preize da AntapGod! God blo yumpla i seibe yumpla. Liptemap neim blo da God uda gad nadakain bigpaua.

Rebaleisan - end blo ebriting 5:12

Ane dempla i bin sing wea prapa nadakain laud bois dis sing ya: ‘Da Smolsip i gad rait, dat wan wea ebridem pipol i bin kile em. Em i da wan uda gad rait po gede strongpaua ane po gede ebridem prapa plasting, ane em i gad rait po gad prapa sabe ane po bi prapa strong. Em i gad rait po gede ona, truglori ane preiz ebritaim.’

Rebaleisan - end blo ebriting 5:2

Nau ai bin luk gen ane bin luk wan prapa strong einzel ane em i ala mina laudwan, ‘Uda gad rait po kam ane broke dem seben lok ya ane po opene dis skrol?’

Rebaleisan - end blo ebriting 5:9

Ane dempla ebribodi i bin sing wan niu sing diskain po dat Smolsip: ‘Yu da rait man po go ane teke da skrol ane broke dem lok ane openem. Bikoz ol i bin kile yu, yu bin ded, ane blad blo yu i bin sakripais po ebridem pipol blo God. Ol i kam prom ebri pamlelain, ebri langus, ebri pipol ane ebri kantri lo da wold.