15 Xa c'u jubik' man cäsakaric, ri tako'nib aj caj xquibij che ri Lot: “We man cawaj catcämic aretak cäkasach u wäch we tinimit ri', aninak chatwalijok, chac'ama' c'u bic ri awixokil, xukuje' ri quieb a mia'l.”
Xbe ri Lot che qui siq'uixic ri e u ji' ri e towinak ri u mia'l che c'ulanem, xubij chque: “¡Chixwalijok, chixel bic waral, cäsach c'u u wäch we tinimit ri' rumal ri Ajawaxel!” E are c'u ri e u ji' man xeboc ta il che ri xubij ri Lot chque.
Xbeytaj c'u ri Lot, ri quieb tako'nib aj caj xquiyukej bic che ri u k'ab, rumal rech chi xel u c'u'x ri Ajawaxel che. Xukuje' xquic'am bic ri rixokil, ri quieb u mia'l, naj xequic'am wi bic che ri tinimit rech queto'tajic.
Aretak e c'o chrij ri tinimit, jun chque ri tako'nib xubij: “¡Chatxiq'uinok, chato' awib! Matca'y chawij, mawi jubik' mak'il awib pa ri beya'. Chatpakal cho tak ri juyub, we cawaj catc'asi'c.”
Cubij c'ut ri are' chquipam ri e tz'ibatalic: “Chupam ri jok'otaj ri takalic xatintatabej; chupam ri k'ij rech ri colobal ib xatinto'o.” Camic c'ut are wa' ri k'ij utz chiwe, are wa' ri k'ij rech quixcolotajic.
Xinta' jun ch'abal chic chicaj, ri xubij: “Chixel bic pa ri Babilon, ix ri ix nu tinimit rech man quebikajbej taj ri e u mac mawi quebirik tak iwech ri c'ax ri queburiko.
