Richtah 19:16 - Pennsylvania Dutch Bible

¹⁶ Sellah ohvet is en aldah mann rei in di shtatt kumma noch sei dawk's eahvet in di feldah. Eah voah fumm hivvel-land in Ephraim avvah eah hott nau in Gibea gvoond. (Di leit funn Gibea voahra funn em kshlecht fumm Benjamin.)

Richtah 19:16 交叉參考

1. Mosi 3:19

Deich da shvitz funn deim ksicht solsht du dei ess-sach fadeena biss du viddah zu eaht draysht, veil du funn di eaht kumsht. Du bisht eaht, un solsht viddah eaht vadda.”

Psalm 104:23

No gayt da mensh naus an sei eahvet, un shaft biss ohvet.

Psalm 128:2

Du esht di frucht es dei hend kshaft henn difoah; du zaylsht froh sei un's zayld goot gay mitt diah.

Shpricha 13:11

Reichheit es letz grikt voah, vatt vennichah un vennichah, avvah ebbah es geddaht bei shaffa macht's vaxa.

Shpricha 14:23

Selli es hatt shaffa greeya ebbes gedu, avvah selli es yusht shvetza diveyya vadda oahm.

Shpricha 24:27

Mach dei eahvet seahsht faddich draus, un grikk dei feldah grisht; noch sellem bau dei haus.

Breddichah 1:13

Un ich habb miah foah-gnumma fa ausfinna un unnah-sucha deich veisheit alles es gedu vatt unnich em himmel. Es is en shveahrah lasht es Gott uf mensha glaykt hott.

Breddichah 5:12

Da shlohf is sees zu sellem es hatt shaft, eb eah bissel adda feel est, avvah's feel sach es da reich mann hott alawbt eem kenn shlohf.

Hosea 9:9

Di sacha es di leit doon sinn grauslich, grawt vi in di dawwa funn Gibea. Gott zayld iahra ungettlichkeit nett fagessa, un zayld si shtrohfa fa iahra sinda.

Epheser 4:28

Loss deah vo kshtohla hott nimmi shtayla, avvah loss een shaffa mitt sei aykni hend un sell du vass goot is, so es eah ebbes hott zu gevva zu selli in di noht.

2. Thessalonicher 3:10

Vo miah noch bei eich voahra henn miah eich ksawt, “Deah vo nett shaffa vill soll aw nett essa.”

Richtah 19:1

In selli dawwa hott Israel kenn kaynich katt. Nau en Lefiddah es hinna in di hivla funn Ephraim gvoond hott, hott sich en nayva-fraw gnumma funn Bethlehem in Juda.

Richtah 19:14

So sinn si on ganga un di sunn is unnah ganga vi si an Gibea in Benjamin kumma sinn.

Richtah 19:15

Datt henn si kshtobt fa di nacht. Si henn sich anna kokt im shkveah funn di shtatt, avvah nimmand hott si in sei haymet gnumma fa di nacht.

Richtah 19:17

Vo da ald mann ufgegukt hott un hott deah fremd mann ksenna im shtatt-shkveah hokka, hott eah kfrohkt, “Vo bisht am hee gay? Funn vo bisht kumma?”