10 Even vann diah di gans Chaldayah army beeda daydet es am eich fechta is, un's veahra yusht mennah ivvahrich in iahra tents es vay gedu voahra, doch dayda si kumma un dee shtatt nunnah brenna.”
Em Hah sei shtimm dunnaht fannich sei greeks-gnechta; sei greeks-mennah sinn shteik un feel, un mechtich sinn selli es eem heicha. Da dawk fumm Hah is grohs un shreklich, veah kann's ausleida?
Fasell, heichet vass da Hah auskshaft hott geyyich Babylon, vass eah im sinn hott fa du geyyich's land funn di Chaldayah: Iahra glenni shiblen vadda vekk kshlayft, un iahra vayt-land vatt leah deich si.
En dausend funn eich zayla shpringa vann aynah eich droit, un vann fimfa eich droiya shpringa diah awl fatt, biss nix ivvahrich is funn eich es vi en pohl es uf en berg shtayt, vi en flag uf en hivvel.”
Fasell, heichet vass da Hah auskshaft hott geyyich Edom, vass eah im sinn hott fa du geyyich selli es in Theman voona: Even iahra glenna shiblen vadda vekk kshlayft, un iahra vayt-land vatt leah deich si.
Avvah du bisht aus deim grawb kshmissa vadda, vi en nasht es nimmand vill. Du bisht geglayt mitt selli es doht gmacht voahra, selli es deich kshtohsa voahra mitt em shvatt, un in en shtaynichi pitt kshmissa voahra, vi ebbah dohdes es fadredda vatt.
'Sis no nix ivvahrich es vi fa unnich di kfangana gneeya, adda fa nunnah falla unnich di dohda. Un deich awl dess is sei zann nett vekk gedrayt; sei shtrohf-hand is alsnoch naus kshtrekt.
Ich habb ausgmacht fa dee shtatt shawda du un nett goot sei zu iahra, sawkt da Hah. Di shtatt zayld ivvah-gevva sei in di hend fumm kaynich funn Babylon, un eah zayld si ufbrenna mitt feiyah.’
Di Chaldayah es am fechta sinn geyyich dee shtatt zayla rei kumma un si ohshtekka mitt feiyah. Si zayla di shtatt nunnah brenna, mitt di heisah vo di leit insens brenna uf di dechah zumm abgott Baal, un vo si drink-opfahra ausleahra zu anri gettah. Dee sacha henn mich bays gmacht.
Da Hah hott awl mei shteikshti greeks-gnechta nunnah gedredda es ich katt habb. Eah hott greeks-leit bei groofa geyyich mich, fa mei yungi mennah nunnah shlauwa. Vi imma vei-press hott da Hah em land Juda sei leddich maydel nunnah gedredda.
