2 Wo butɔ, a bata dunuya diyanankoe to, a ni sɔ Ala sagona koe kɔma a la simaya butɔ min be toren a ye.
Wonu la sɔtɛ bele fatanden base la, ka wo ma Adamadeŋɛ sagoe, ka wo ma musu nun kayiya, a be fatanden Ala le la.
Ka mɔgɔ yo be a hanigeren a ni Ala sagoe ma, wo tigi si a lɔn de, ka kɛ karaŋɛ be fatanden Ala le la, ka wo ma a be fatanden n yɛtɛ le la.
Wo be koe min bɛ tɔ, wo ni Ala tantu, bayi Ala sagoe le mu wo la wo ye, wole minnu be toren a la mɔgɔ masubɛreŋɛ Isa kɔma.
A yɛtɛ sagoe, a bata wo mɔ ma a la deŋɛnu la a la tɔɲa kuma sabu la, a ka wo mɔle fɔlɔfɔlɔ le kɛrɛkɛrɛ wo mɔ ni ma a tɛŋɛ la a la dalifeŋɛnu bɛ tɛma.
Wo ni to iko deŋɛ min be tola a baaba sagoe tɔ. Wo butɔ, wo kana sɔ wo hanige koroŋɛnu kɔma iko wo be a mala ki min na nun yannun wo be Isa lɔnna wagate min tɔ nun.
Wo butɔ, wo ni ko koroŋɛ mɔɔle bɛ boloka. A mata foniya la ba, filankafuya, miilanteya, anun mɔgɔ tɔgɔtiɲa mɔɔle bɛ, wo ni a bɛ boloka.
