16 Leka imilimo yako iloleke ku yaomvi yako, nu lulumbi lwako ulukulu luloleke ku ana yao.
We Yawe, natinuvwa vyakulumbuka kwako. We Yawe nupya nuvwa intete. Acino ivicitwa vyako kwene vii, uviswilizye nupya kwene kuti viye vimanyikwe amanda kwene yaa, ivizungusyo vikulu vino wacitanga. Lelo ukwate uluse nanti umu nsita kwene ino watusoka.
We Leza swemo twayuvwilile swenga na matwi itu, ivikolwe ali vino vyatulandile apa vintu vikulu vino wacisile umu nsita yao, umu manda yampiti.
“Yawe ali kacingilila winu uwamaka, ivicitwa vyakwe vyaya ivifumaluke nupya visi vyalufyengo. Leza winu uwakutailwa nupya uwacumi wene akacita sile ivilungame ivisi vyakutitikizya.
Pano ivicitwa vyako ivya lulumbi, nupya pasi pakukuzanzya we Yawe. Apamulandu kwene wa vintu vino wemo ukacita, icaleka nemo namaimbilanga nu luzango.
Namaelenganyanga pali vyonsi vino wacita, namakutumalangapo mu milimo yako yonsi.
“Ndakai nemo lyene nasya mfwe. Mwemo mwensi mumanyile umu myenzo inu yonsi ukuti kusi nanti cimwi cisuma cino Yawe Leza winu wamulaya icitafikiliziwa. Vyonsi kwene vino walavile vyafikiliziwa.
“Lyene Yawe anena swensi ati, ‘Ana inu yano yacili anono atali yamanye kupusanya pakasi ka cisuma ni ciipe, yalingila mu mpanga ilya, ana yaya kwene yano mwatangi yalayasenda mu uzya. Indayapeela impanga ilya, nga nayo yalaipyana.
