10 Umwenzo wane uku kulukunta, na maka yatiyasila, na kanda katikaya pa manso.
Ulanda watiuleka amanso yane iyayenza, nu kukota natinkota apamulandu na anisi yane.
Ivipa vyane vyativinyomelwa nu kunyunguluka. Cila wanda nkalaizya kunuli, we Yawe, nkutumpula amakasa kunuli, nkupepa.
Natintonta wakwe cimwi muno nkulaizya inti, “Ntuulwe!” Uku nsingo nako kwatikuuma. Amanso nayo yati yasuka iyatumbuka muno nkukulolekesya kuti wize untuule.
Amanso yane yatiyatontekana pamulandu nu kulila. Umwenzo wane pasi pakunyongoloka. Amaka yatiyasila pamulandu wakwelenganya vino antu yane yononwa. Ana anono kumwi nu tunya yakufwa ulwezwe mu misolo ya musumba pamulandu nu lusala.
Amano yane yatiyavulungana, nupya nkuzakaza sile uku ntete. Muno nali nkaulolela nkuti umaila, intete nazyo zyasuka zyandema.
Amanso yane yatiyatonta muno yakulolela ufyusi wako, ukuluzi uno walavile.
Ndi vino inswela ikayaseela apa kulonda ukuli amanzi azuke, avino nani kwene nkukulukisya cuze we Leza.
Amalanda yatiyalenga umi wane ukupomponteka, nu kulosya kwati kwipimpazya imyaka yane. Natintemboka pamulandu na malanda, nga namafupa yane nayo yatiyasokonteka.
