Masamu 36:8 - Amazwi Yakwe Leza 2013

⁸ Yene yakalya ivyakulya mpe, umu ng'anda umwako, iyikuta. Ukayamwesya nu mukaluzi ka nsansa zyako.

Masamu 36:8 交叉參考

Masamu 16:11

Uwandanga inzila zyakuntwala ku umi, nga nani ndazanga cuze lino wemo waya pipi nani. Ulandetela isyuko ilyakunzanzya, amanda pe.

Masamu 65:4

Alongo antu yano wemo wasolola, apakuti yangaikala umwi sano lyako ilyamuzilo! Tumasekelanga apa vintu ivizipe ivyaya umwako, apa upolelelo uwaya mung'anda yako yamuzilo!

Ezaya 58:11

Lyene nene ndamutungulula lyonsi sile, nu kumwimula ivintu visuma. Ndaamukomelezya nu kumusunga ningo, mulaya wa calo cino yakakontelela usaka. Mulaya wa kafukoka ka manzi yano yasiipwa.

Ezaya 25:6

Apa mwamba uu uwa Zioni ali pano Yawe Wamaka yonsi alimula antu amitundu yonsi pyu iya pano nsi. Palaya ukuilyokezya ivyakulya visuma na waini umusuma wakwe cimwi, inyama isuma na waini wampomvu wakwe cimwi.

Masamu 63:5

Umwenzo wane ulaikuta, ndaimbila ni nyimbo zya luzango izya kukulumbanya.

Mateo 5:6

Alongo antu yano yakalondesya kucita ivyawololoke vyakwe Leza ni myenzo yao yonsi. Pano Leza alayapeela vyonsi vino yakulonda.

Masamu 46:4

Kwaya uluzi lumwi ulukazanzya umusumba wakwe Leza, incende yamuzilo muno Leza Wapapelapela umweneco wikalamo.

Ezaya 48:21

Lino Yawe wapisyanga antu yakwe umu lwanga, umukaye see uku cipuki, nupya umuume ndi, antu yakwe yataculanga ku lusala awe. Wene walenzile ukuti amanzi yafukoka umu ciliwe. Yawe walepwile iciliwe na manzi yapongwela.

Yobo 20:17

Ala calala casila. Atange nupya aye na maka akulola inguzi izikapongoloka amafuta. Nanti wa tunguzi utukakonkolola iziya nu uci.

Yoane 7:37

Pa wanda wa kumalila kuzevya kwa cimulo nupya uli wanda ukulu, Yesu aimilila, asanzika izwi ati, “Wino wensi ali nu lusala alinzile kwiza kunondi kuti amwe manzi!

Ezaya 43:20

Ni nyama zya mpanga nazyo kwene zimantaizyanga. Yankusa yamancindikanga kumwi ni mbuni, apamulandu wakuti namaleta amanzi umu lwanga ni nguzi mu mpanga iyumalale, kuti mpeele amanzi ku antu yane asololwe.

Masamu 17:15

Lelo nemo umu ulungami wane, ndiza nkulole. Lino ndakatuka ndiza ndole icata cako, nupya ndaya nu luzango wakwe cimwi.

Lwimbo lwakwe Solomoni 5:1

We mutemwikwa wane, nawinga wane, ala nemo natimfika mu calo cane. Nkuzombola usule wane ni vintu vyane vya mununko usuma. Nkulya uci wane na nacisenga wane uwa uci. Nkumwa waini wane ni ziya lyane. Mwemuno mwakundana, lyangini nu kumwa. Mwemuno mwakundana mwangini sile wakwe cimwi.

Zakaliya 9:17

Iye mwe vino mpanga ilya ilaloleka kuyemba! Ingano zilaleka alumendo yakula na amaka, na waini wa matingi umupya alaleka akazyana yakula ayembe

Masamu 17:8

Unsunge wakwe vino ungacingilila nyinalinso uwi linso lyako, umfise mu cisao ca mapa yako,

Masamu 31:20

Ukayasungilila kunuli, nu kuyacingilila uku mapange aipe a antu. Ukayasunga umwi cele lyako, nu kuyafuntusya uku ntusi zya anisi yao.