Malango 12:31 - Amazwi Yakwe Leza 2013

³¹ Cisi cakwezya ukupepa Yawe Leza winu mu musango wao, pamulandu wakuti yene pa kupepa tuleza twao yakacita ivimisango vimwi ivyawinyi vino Yawe Leza winu wapata. Yene yakaoca na ana yao aonsi na anaci pa kuyatuula impolelwa kuli tuleza twao utuluwi.

Malango 12:31 交叉參考

Yelemiya 32:35

Yakuuzile ni ncende ya kupepela mwenemo Baali mu cifoloma ca Beni Hinomu, apakuti amuno yacindikila Moleki, umukupisya ana yao anaci na onsi umu moto. Icintu cimwi cico cino ntatazile njanene, cino citatazile cize nu ku mano yane kuti yangacita iviipe vya mwata ndi uu nu kulenga aina Yuda ukwifya.

Yelemiya 7:31

Nupya yatiyakuula incende umwa kumpepela mwenemo mu Cifoloma ca Beni Hinomu, umwakuti yaocelamo ana yao aonsi na anaci. Icintu cino ntatazile njanena, cino citatazile ciza nu mu mano yane.

2 Yamwene 21:2

Manase wifyanga apa manso yakwe Yawe. Wene wacitanga ivintu ivyawinyi vino ainamasi yacitanga, amu nko zyuze zino Yawe wazinzile umu mpanga yao apakuti aina Izlaeli yikale mwenemo.

Malango 12:4

“Mutakezye ukupepa Leza winu mu musango uno antu yayo yakapepela tuleza twao.

Malango 9:5

Asi pamulandu wakuti mwemo mukacita ivyawololoke nanti kuya ni miyele isuma icingalenga kuti mwemo muyapoke impanga. Lelo pamulandu wa ukakasi wa antu amu nko zii, Yawe Leza winu alayazinga mu mpanga ilya pa manso inu, kuti afikilizye cino walavile ku vikolwe vinu, Abulaamu, na Isaki na Yakobo.

Aina Levi 18:3

Mutalondela micitile ya ina Eguputo kuno mwatenzi, nanti micitile ya ina Kenani, ku mpanga ino nkumutwalako ndakai.

Kufuma 23:2

Utawila kuli cele wensi lino yakucita iviipe. Utazumilizyanya nayo lino yakuvwanga umboni waufi uno ukaonona ulungami pakuti uzanzye aingi.

Mika 6:7

Uzye Yawe alazangila muli yasuuku amazimbi, nu mu nguzi izisikama zya mafuta ya miolivi? Uzye ningapela iyeli lyane kuti nkululwe uku maifyo yane? Uzye umwana wane angaya impolelwa yakulipila apa maifyo yane?

Ezekelo 23:27

Nemo ndaputula umunyanya wa uzelele wako, nkamale ni mipitile yako iipisye, ino wakweti lino wali mu Eguputo. Utalatala nupya ukaluuke aina Eguputo nanti kwiusya impanga yao.

Ezekelo 20:31

Na pilelo kwene mwemo mucili mukatula amawila ali yamwi kwene, nupya mucili mukuikowezya ku tuluwi tuli tumwi kwene, mukututuula impolelwa zyakoca ana inu? Uzye pacani cino mwemo mwe ina Izlaeli ningamuzumilizya ukwiza mukunguzya vino nkalonda? Nalapa, ne Yawe Simwandalali, nemo ntange ntale muzumilizye kwiza mukunguzya.

2 Milandu 36:14

Alino akalamba yonsi yasimapepo kumwi na antu kwene yalunduluka ukuntaya acumi, yala yakulondela imisango iipe ya mitundu yuze iyazingulwike. Umu mipepele ya tuluwi, iyasuka yakowezya ni Ng'anda ikulu yakwe Yawe ino Yawe umweneco wacisile ukuya iyamuzilo.

2 Milandu 33:2

Umu kukonkelezya ivicitwa vya mitundu ino Yawe wazinzile umu mpanga apakuti antu yakwe yikale mwenemo, icalenzile Manase ukwifya kuli Yawe.

Aina Levi 20:2

Nena aina Izlaeli uti, “Mwina Izlaeli ali wensi nanti umwinamasi wino akwikala pakasi kinu, umonsi nanti umwanaci ndi wapeela ana yakwe kuli Moleki alinzile ukukomwa. Iuvi lyonsi lya ina Izlaeli limutame na mawe mpaka afwe.

Aina Levi 18:21

Utapeela umwi uwamu ana yako kuti aomviwe mu mapepo yakwe leza Moleki, pano cico cingaleta muzewanya kwi zina lyakwe Leza, Yawe.

Malango 9:4

“Pacisila lino Yawe Leza winu watayazinga mu mpanga pa manso inu, mutaca mwezye kulanda mu myenzo inu ukuti Yawe wamuleta kuno kuti mupoke impanga ii iye iyakwinu pamulandu wakuti mukacita ivyawololoke. Awe, asi vivyo. Lelo a pamulandu wa ukakasi wa antu amu nko zino Yawe akuzinga pa manso inu.

Malango 12:30

Pacisila lino Yawe alamalila ukonona antu amu nko zizi, namwe muce mutekele pa kukana londelela imipepele yao, pamulandu wakuti mungailetelela pa kuuzya imuti, ‘Uzye mu musango ci uno antu amu mitundu ii yakatumikila tuleza twao? Naswe kwene tulinzile ukucita vino yakacita.’

Malango 20:18

Mulinzile mwayakoma, pakuti yatakaleke kuti mwifye Yawe pakusambilizya mwemwe ukucita vintu vyonsi ivyawinyi vino yakacita mu kupepa tuleza twao.

2 Yamwene 16:3

Wene wacitanga ivintu iviipe kwati sile ivyacitanga yamwene aku Izlaeli. Aazi wiyo wapile umwana wakwe umonsi wa mpolelwa yakoca, umu kulondela imisango iipe iya nko zino Yawe wazinzile umu mpanga ilya lino aina Izlaeli yingile mwenemo.

Masamu 106:37

Yapeela na ana yao aonsi na anaci wa mpolelwa uku mipasi yankota.

2 Yamwene 3:27

Wasuka watola umwana wakwe uwiyeli, uwali nu kupyana apa wene. Ali wino wamupeela impolelwa kuli kaleza ka ina Moabu, apapela yi linga lya musumba ulya. Aina Izlaeli apakulola cico, iyuvwa intete, nga yatandika ukwelenganya ukuti kaleza kao akaluwi limwi kangacita penepo cimwi. Fwandi lyene ali vino yafumile ku musumba, yaswilila nu kumwao ku mpanga kuno yafumile.

2 Yamwene 17:31

Aina Aavi nayo yapanga akaluwi kakwe tuleza Nibiazi na Talitaki. Alino antu aku Sefalavaimu yene yocelanga ana yao impolelwa kuli tuleza twao, Adilameleki na Anameleki.