10 “Fwandi nemo natenzi pa mwamba akasanya konsi nu usiku onsi, pa manda amakumi yani wakwe vino nacisile ilyankolelo. Yawe nawe uvwile kunondi nu kuzumila ukuti atalonona mwemwe.
“Nemo naponyile pansi ala mfupime pa manso yakwe Yawe pa manda yalya amakumi yani, musanya nu usiku, pamulandu wakuti namanyile ukuti wene wavwanzile vino ali nu konona mwemwe.
Lyene Mose aikala pamwi na Yawe kuku kwene amanda amakumi yani, musanya nu usiku, kwaula ukulya nanti cimwi. Lyene Yawe alemba pa vipampa vya mawe yaya yaili amazwi yonsi a upangano, kuli kuti amasunde ikumi.
Lyene Yawe anena Mose ati, “Cisuma pamulandu wakuti nakumanya ningo nupya nkazangila munuli, namacita wakwe vino wavwanga.”
“Watuulanga auze, lelo wene atangaituule! Ndi cakuti wene Mwene wa Izlaeli, lekini aike ku lupanda ndakai kwene. Lyene tumataila!
Caleka Yawe awezya umwenzo atalenzile kuti uzanzo ucitike uno wakasi kuti acite pa antu yakwe, aina Izlaeli.
Mose aingila mwi kumbi, atwalilila kukwela mwamba mpaka afika papela. Mose aikala kuku kwene amanda amakumi yani, musanya nu usiku.
Ali lino lyene wanenyile ukuya ku kutungulula mwemwe, pakuti mukapoke impanga ilya iye iyakwinu, ilya kwene ino walavile ukupeela ku vikolwe vinu.