Amosi 2:10 - Amazwi Yakwe Leza 2013

¹⁰ “Mwe ina Izlaeli anene namufumizye mu mpanga ya Eguputo. Nene namutungulwile mu lwanga pa myaka amakumi yani, kuti imupele impanga ilya ya ina Amoli.

Amosi 2:10 交叉參考

Malango 2:7

“Mwiusye vyonsi vino Yawe wamupolelela mu milimo inu yonsi. Wene wamusakamalanga nu kumuwaka lilyo lyonsi lino mwalulumbanga mu lwanga ulutaikulila. Apa myaka ii yonsi amakumi yani Yawe wali namwe, nupya mutulilwanga icintu nanti cimwi.

Kufuma 12:51

Pa wanda kwene ulya Yawe aleka kuti aina Izlaeli yafume mu Eguputo ukulingana ni mitundu yao.

Amosi 3:1

Mwe uvwini amazwi yano Yawe wavwanzile, amazwi akumukalipila mwe ina Izlaeli. Kuli kuti uluko lonsi luno wafumizye mu mpanga ya Eguputo. Wene wavwanzile ati,

Milimo 13:18

na pa myaka makumi yani ala akuyasunga mu lwanga.

Milimo 7:42

Lelo Leza nawe afwitoka ayafutatila, aleka kuti yatumikila intanda zya mwiyulu, wakwe vino icalembwa mu lupapulo lwakwe yakasema cikati, ‘Mwe ina Izlaeli! Asi kuli nene kuno mwaletanga impolelwa zya nyama zino mwakomanga mu lwanga, pa myaka makumi yani.

Mika 6:4

Nemo namufumizye mu mpanga ya Eguputo. Namupuswisye ku uzya umu mpanga muno mwali azya. Alino ntuma Mose, Aloni, na Milyamu kuti yamutungulule.

Amosi 9:7

“Uzye mwe ina Izlaeli mutakoline na ina Kusyi? Avino Yawe wavwanga. Uzye asi nene nafumizye aina Izlaeli ku Eguputo? Uzye asi nene nafumizye aina Filisti ku Kafitoli na ina Asilya ku Kili?

Kufuma 3:8

Caleka natiniza kuti njatuule ukufuma mu makasa ya ina Eguputo nu kuyafumya mu mpanga ilya, nga njatwale ku mpanga ino ili ni ncende ikulu nupya ivunde cuze. Mpanga ilya ya ina Kenani, aina Hiti, aina Amoli, aina Pelizi, aina Hivi, na ina Yebusi.

Ezekelo 20:10

“Fwandi nani nayafumizye mu mpanga ya Eguputo nu kuyatwala mu lwanga.

Masamu 95:10

Apa myaka amakumi yani umukulo ulya wansosizye, usuka umvwangula inti, “Ala mutundu we nizewanya! Mwakana ukuvwa ukunzila zyane!”

Neemiya 9:21

Umu lwanga wayasakamile wakwe cimwi apa myaka amakumi yani. Yene yatulilwe nanti cimwi, nanti ukusizya yatatazile yasizye. Ingazo zyao nazyo zitatazile zivimbe nu kuwaya.

Malango 1:39

“Lyene Yawe anena swensi ati, ‘Ana inu yano yacili anono atali yamanye kupusanya pakasi ka cisuma ni ciipe, yalingila mu mpanga ilya, ana yaya kwene yano mwatangi yalayasenda mu uzya. Indayapeela impanga ilya, nga nayo yalaipyana.

Kufuma 20:2

“Nene indi Yawe Leza winu, wino walenzile kuti mufume mu mpanga ya Eguputo, kuko kuno mwali azya.

Mpendwa 21:25

Acino aina Izlaeli iyapoka imisumba iya yonsi ikalamba ya ina Amoli, ukwikapo nu musumba ukalamba uwa Hesyiboni kumwi ni misumba inono izingulwike, nga yikala mwenemo.

Yoswa 13:4

Na lwaku kaeya, impanga yonsi iya ina Kenani, ukufuma ku Ala wa ina Sidoni ukufika nu ku Afeki, citungu ca ina Amoli.

Mpendwa 13:32

Acino yasalanganya ni mpwelo iya ntumpu ku ina Izlaeli yonsi iya wiipe wa mpanga ilya, ino yendizye, yati, “Impanga ino twapitanga mwenemo pakwendezya, impanga imwi muli inzala. Antu yonsi yano twaweni atuuluke sana, atali.

Mpendwa 32:13

Yawe wasokile aina Izlaeli nga aleka yalulumba mu lwanga pa myaka amakumi yani, mpaka inkulo yonsi ino itamuzanzizye ifwa.

Yoswa 24:8

Alino lyene namulesile ku mpanga ya ina Amoli, yano yikalanga lwaku ufumondaka wa Luzi lwa Yodani. Yene yamulwisizye, nga lelo nemo nayapile mu makasa inu. Nemo nayononyile pa manso inu, nga namwe imupoka impanga yao.

Yelemiya 2:6

Yene yatatazile yelenganya yati, ‘Uzye Yawe ali kwi, wiyo uwatufumizye ku Eguputo nu kututungulula mu lwanga, impanga ya mapoli ni visengafwafwa, impanga iyumalale iya kanda, mumo muno mutatala mwapita mwenemo umulawa, nanti ukwikalamo umuntu?’