Aina Levi 26:9 - Amazwi Yakwe Leza 2013

⁹ Nkaamupolelela nu kulenga kuti muvyale ana avule cuze. Nkaasunga cipangano cane cino nacisile kunomuli.

Aina Levi 26:9 交叉參考

Masamu 107:38

Ayapolelela iyavyala na ana avule, nu kuteeka amaufyo ya viteekwa aula ukucepelako.

Ezekelo 16:62

Pasi pano ndapangana nawe upangano cipya cipya, nga alino ulamanya ukuti fwandi nene indi Yawe Simwandalali.

Neemiya 9:23

Wasandulwile ana yao aonsi kwati intanda zya mwiyulu, nu kuyatwala umu mpanga ino walavile kupeela ivikolwe vyao. Yingile mwenemo nu kupoka yaiposile.

Ezaya 55:3

Teini amatwi mwize kunondi, munguvwe pakuti imyenzo inu isyukile uumi. Namapangana namwe upangano wa pee, uwaluse uno nalavile Davidi.

Utandiko 28:3

Si Mwene Leza Wamaka yonsi akupolelele akupeele nu uvyazi uce usanduluke uye imitundu ingi!

Yelemiya 33:3

We Yelemiya, ndaizya sile nani namakwasuka, namakunena ni milandu ikulu nupya iyankama ino wemo utamanya.

Malango 28:11

Yawe alamupeela ana avule, ni ng'ombe zivule, ni vyakulya vivule mu mpanga ino walavile ivikolwe vinu ukuti alaipeela kuli mwemwe.

Luka 1:72

Watile alaya na mizu ku antu itu, nu kwiusya upangano wakwe uwamuzilo.

Masamu 89:3

Wemo wavwanzile uti, “Napangana upangano nu musololwe wane, nalapa uku muomvi wane Davidi inti,

Malango 28:4

“Yawe alamupolelela amupeele ana avule, ni vyakulya vivule cuze, nga ni ng'ombe ni mbuzi zivule.

Kufuma 6:4

Nupya nacisile upangano wane nayo, injalaya kuyapeela impanga ya Kenani, impanga ino yatazile yikala mwenemo wa inamasi.

Kufuma 2:25

Leza alola ucuzi wa ina Izlaeli, nga asakamala kuti ayazwe.

Kufuma 1:7

Lelo vizikulula vyao, aina Izlaeli, yavyala ana avule cuze. Impendwa yao ikula cuze yaya na maka, cakuti yalimba impanga yonsi ya Eguputo.

Utandiko 28:14

Ndalenga kuti ana yako yavule wa musensenga uwamu nkumba yakwe Yemba. Ana amu mupanda wako yalasalangana ukuya mu ntunga zyonsi izya nsi. Kupitila munuli nu mu amu mupanda wako indapolelela antu amu nko zyonsi.

Utandiko 26:4

Ndalenga ana yako kuvula wa ntanda zya mwiyulu, nupya ndayapeela impanga ii yonsi. Mitundu yonsi ili nu kunguzya kuti njipolelele wakwe vino natimpolelela ana yako.

Utandiko 17:20

Wati unena pali Isumeli, acino ndamupolelela alaya na ana avule cuze. Alaya a isi wa ntunguluzi ikumi na ziili. Ndalenga amu mupanda wakwe ukuya uluko lukulu.

Utandiko 6:18

Lelo ndacita upangano pakasi kakwe wewe nani. Ingila mu cange pamwi nu muci wako, na ana yako na aci yao.

Ayebulai 8:9

Utalaya wa upangano uno napanzile ni vikolwe vyao pa wanda uno nayatozile ni kasa lyane nu kuyatungulula kuyafumya mu Eguputo. Yene yatali acumi ku upangano uno nacisile nayo. Caleka ntasumvile mano kunoyali.

Neemiya 2:20

Lyene nemo njaasuka inti, “Leza wa mwiyulu alasuka atupeele icituku. Ala swemo, swe aomvi yakwe twasya tutandike uku kuula cipya cipya. Lelo mwemo papo pano muli, mutakweti icipande nanti cimwi muno umu Yelusalemu. Nupya mutakweti insambu nanti imwi. Nanti icimanyililo icakuti yace yamwiusizyako mutakweti.”

2 Yamwene 13:23

Lelo Yawe lyonsi kwene wayanga na mizu apa ina Izlaeli. Wene atalondanga ukuyakoma. Lyonsi wayatuulanga pamulandu sile wa cipangano cino wapangine na Abulaamu, na Isaki, na Yakobo. Wene atatala watazyela antu yakwe foo!

Utandiko 1:28

Nga Leza ayapolelela, ayanena ati, “Muvyalane muvule mulimbe insi yonsi nu kuyangalila. Namupeela uwangalizi pa nswi, ivyunyi ivikapapuka ni nyama zyonsi zyamu nsi.”

Utandiko 22:17

Nalaya ukuti ndakupeela ana avule cuze, nu kuvula kwao kulaya wa ntanda zya mwiyulu, nanti wa musensenga uwamu nkumba yakwe yemba. Ana yako yalacimvya anisi yao.

Utandiko 48:4

Wanenyile ati, ‘Ndalenga kuti uvyale ana avule, pakuti amu mupanda wako yakaye inko zivule. Ndapeela impanga ii ku amu mupanda wako kuti iye impanga yao amanda pe.’ ”

Aina Levi 26:15

Ndi mwakana ukuyela amasunde na malamulo yane, nu kutama icipangano cino nacisile kunomuli,

Malango 7:13

Wene alamutemwa nu kumupolelela, cakuti mulasandana mukakwate na ana avulisye. Wene alapolelela ana inu, ni vilimwa vyamu vyalo vinu pakuti mukakwate imbezu, waini, na mafuta ya miolivi. Nga alamupolelela pa kumupeela ing'ombe ni mfwele izivule. Wene alamupeela upolelelo uu onsi mu mpanga ino walavile ivikolwe vinu ukuti ali nu kumupeela.

Ezekelo 36:9

Nemo indi namwe, nkulondesya nu kuti muce mwalima umusili winu nu kukomelamo imbezu.

1 Yamwene 3:8

Ne muomvi winu indi pakasi ka antu inu yano mwasolola, antu aingi wakwe cimwi cakuti yatangapendwa.

Yelemiya 23:3

Nemo ndakolonganika nemweneco imfwele zino zyasyala penepo. Indazifumya umu mpanga zyonsi muno zyasalanganile, ndaziwezezya uku macemelo yakwezyo, nga alino lyene zilasandana nu kuvula.

Yelemiya 23:4

Alino ndasonta yakacema yano yalazisakamala nu kuzilisya. Zitalaoopa nanti ukuzakaza foo, nupya patalaponga nanti yonga.” Ivyalanda Yawe.