51 Apkelanyexágkek axta apkelásenneykha apwet'a apkexyekmo xa wese' apwányam apchásenneykha nak, aptahak axta apcháneya s'e: —¡Apyennákxeyk apketche!
Aptahak axta apcháneya Jesús se'e: —Etakhoho apxagkok; apyennákxeyk kaxwo' xép apketche. Axta nahan ey'ásekmok wese' apwányam apchásenneykha m'a aptahakxa axta apcháneya Jesús, aptakháwok axta apxagkok.
Apkelmaxneyáha axta apkelásenneykha ekwánxa hora aptakmelwokmo apketche, aptahak axta apcháneya s'e: —Hem axta la una taxnam axta ekmassa ekmexanma apyempehek.
Xénwákxók axta apwáxok sakcha'a apyap ekwánxa axta hora aptaha apcháneya Jesús se'e: “Apyennakwokmek xép apketche”. Aptemék axta mey'áseyam Jesús xa énxet nak, tén han ma'a ekyókxoho ekheykha nak apxagkok.
