2 Lósok axta anhan xa kelán'a nak, payheykha axta átog eñama ekmáske awáxok, eñama nahan eklegeykegkoho ekteme nakláwa.
Wánxa agkok, cháxa eyesextexa sekxo' kéllegeykegkoho ekmáske xa.
Peyk agkok kategkesek étche kelán'a, kayakhapmakha awáxok ma'a ekwokmo enxoho ekhem yakwánxa kategkesek étche; wánxa agkok, apteyekmek agkok étche, kalwagkámak ma'a ekmáske eñama ekpayheykekxa awáxok apteyekmo enxoho xama sakcha'a keso náxop.
Etchek ahancha'awo nak, eklegágkok makham ko'o ekmáske, ektémol'a kañegkohok kelán'a amonye ektegkeso étche, alenxanmohok sat ko'o seklegeykegkoho ekwokmoho kélhágwákxoho kéxegke Cristo.
Hakte temegkek eknaktáxésamaxche s'e: “kapayhekxa awáxok, kelán'a megkaté étche nak; kalpáxamha yetlo ekpayheykekxa awáxok xeye' kelán'a megkay'áseyak nak ektémakxa ekmáske ekteme nakláwa. Hakte kelán'a ektaha axta apyamasma atáwa, exámagkok sat étchek megkaxók sat ma'a kelán'a apha nak atáwa.”
Epakyek axta kelyenyawásak nápakha yaw'a m'a néten, kexeyntek axta náxop. Yakwa'ak axta yakwánxa kategkesek étche kelán'a xa yéwa ekwányam nak, kelhaxneyk axta yakwayam kanaksapok ekmanyehe agko' sakcha'a kaxwé aptéyam.
