NEHEMIA 7:2 - KITTA KAREBA MADECENG

² Apparéntanna kota Yérusalém uwabbéréyangngi lao ri silessurekku Hanani sibawa lao ri Hananya, pallimana bénténgngé, nasaba lebbiwi naiya tau laingngé, métaui lao ri Allataala sibawa weddingngi riyatepperi.

NEHEMIA 7:2 交叉參考

KAJAJIYANG 42:18

Ri esso matellué makkedani Yusuf lao ri mennang, “Iyya tau métauka sibawa mapato lao ri Allataala. Maéloka passalama'ko sibawa séddi sara'.

2 SAMUEL 23:3

Allataalana Yakub pura mabbicara; lao ri aléku pallinrunna Israélié makkeda: “Arung iya paréntaéngngi ra'ya'é sibawa adélé iya mappimpingngé sibawa apatong ri Puwangnge.

1 ARUNG-NGARUNG 18:12

Rékko usalaini kuwaé, naullé Rohna Puwangnge tiwii matu Bapa' ri onrong iya dé'é uwissengngi! Narékko upaissengiwi Ahab makkedaé engkai Bapa' kuwaé, narimunri dé' naruntu'i Bapa', tentuni naunoka matu. Issenni Pa', iyya'é tonget-tongekka massompa lao ri Puwangnge mappammulai baiccu'ku!

1 ARUNG-NGARUNG 18:3

Rimakkuwannanaro riyobbini Obaja ri Ahab untu' lao mangolo. (Obaja iyanaritu kapala ruma tanggana saorajaé. Séddiwi tau iya tonget-tongengngé massompa lao ri Puwangnge.

NEHEMIA 1:2

Iyaro wettué, silessurekku Hanani, engkai polé ri Yéhuda silaong siyagangngaré tau. Nainappa utanai mennang passalenna keadaangngé ri Yérusalém sibawa sining tau Yahudié iya lisuénna polé ri appalirengngé ri Babél.

NEHEMIA 13:13

Usuroi sining tau mangoloéwé untu' jagaiwi bili-bili bokongngéro: Imang Sélémya, Zadok séddiwi ahli Hukkung sibawa Pédaya séddiwi tau Léwi. Hanan ana' Zakur sibawa eppona Matanya usuro bantui mennang. Uwisseng makkedaé iyaro sining tauwé weddingngi riyatepperi sibawa maéloi murusu'i abbagéngeng sining bahangngéro lao ri sellao-sellao siyajjamanna sibawa malempu.

NEHEMIA 2:8

Ri lainnaéro, méllau tokka sure' untu' Asaf, panganrowanna ale akkarungengngé, kuwammengngi napassadiya aju untu' pintu gerbanna bénténgngé ri seddé Bolana Puwangnge, sibawa untu' témbo'na kotaé enrengngé bola iya uwonroiyé matu. Napennoini arungngé sininna paréllaukkuro, nasaba Allataala tulukka.

NEHEMIA 5:15

Gubernur-gubernur ri yoloku, mancaji répomi lao ri ra'ya'é saba' natuntu'i 40 dowi péra' siesso untu' inanré sibawa anggoro. Mala sining pegawénna tenre towi ra'ya'é. Iyakiya iyya dé' umaélo pogau'i makkuwaéro nasaba métauka lao ri Allataala.

NEHEMIA 7:3

Upowadangngi mennang, “Pintu gerbanna Yérusalém nappai wedding ritimpa rékko matajanni essoé sibawa harusu'i ritongkona nenniya ripasang paccala'na ri wettu dé'napa naleppe jamang arawéng sining panganrowangngé. Ri lainnaéro harusu'i rijello panganrowangngé polé ri yelle'na pabbanuwana Yérusalém, sibagiyang untu' pos-pos anganrowangengngé na sibagiyassi untu' mappataroli ri daéra mattulilinna bolana mennang.”

AYUB 1:1

Ri tana Us monroi séddi tau worowané riyasengngé Ayub. Nasompai Allataala sibawa matinulu na lao ri Aléna. Séddiwi tau iya makessing atié sibawa dé' napogau' ja muwi céddé.

MAZMUR 101:6

Upoji tau iya matinulué lao ri Allataala; weddingngi mennang monro ri bolaku. Tau iya tuwoé temmakkécella wedding tumanika.

ASSURENG 18:21

Iyakiya ri lainnaéro harusu'ko pilé siyagangngaré tau worowané iya mapanré, sibawa jello'i mennang mancaji pamimpinna ri yasé'na sisebbu tau, sératu tau, limappulo tau, sibawa seppulo tau. Sitinajai mennang sining tau iya métaué sibawa turusiyéngngi Allataala, wedding riyatepperi sibawa dé' namaélo tarima dowi pasoso.

DANIEL 6:4

Masitta'ni manessa makkedaé jama-jamanna Daniél lebbi makessingngi naiya jama-jamanna sining gubernur nenniya sining jennang laingngé. Rimakkuwannanaro, macinnai arungngé makkai mancaji panguwasana sininna akkarungengngé.

ABBILANGENG 12:7

Iyakiya dé' nakkuwaro sibawa atak-Ku Musa. Aléna ritu tau iya matinulué ri yelle'na umma'-Ku.

MATIUS 24:45

Nakkedasi Yésus, “Rékko makkuwaitu, pattumani nigana matinulu sibawa mapanré? Aléna ritu riyakka ri puwanna mancaji kapala lao ri sining pattumani laingngé; kuwammengngi napanréi mennang ri wettunna.

MATIUS 25:21

Nakkeda iyaro puwanna, ‘Madécénni, iko iyanaritu pattumani iya makessingngé sibawa matinulué. Nasaba weddikko riyatepperi lao ri iya céddé'é, maéloka mappaddettangengngi iya maégaé lao ri iko. Uttama'no sibawa accowéno massennas-sennang sibawa iyya.’

1 KORINTUS 4:2

Iya bunge'-bunge' natuntu'é polé ri pattumani makkuwaéro iyanaritu matinului ri puwanna.

2 TIMOTIUS 2:2

Pappagguruwang iya puraé muwéngkalinga riyolo polé ri iyya ri yolona maéga tau, sitinajai muwappaddettangeng lao risining tau iya weddingngé riyatepperi sibawa iya maccaé paggurui tau laingngé.